Mairie Mäkelfeld
De Mairie Mäkelfeld weer in de Franzosentied (1810 bet 1813) een von de dree Mairien, in de de Kanton Hittfeld indeelt weer. De Seet weer in Mäkelfeld. Se harr 2309 Inwahners.[1]
Historie ännern
De Ümgegend von Mäkelfeld hett vör de Franzosentied to de Vaagdien Höpen, Hittfeld un Neeland-Over von dat Amt Horborg in dat Förstendom Lümborg höört, wat in dat Kurförstendom Hannover leeg. Dat Kurförstendom Hannover weer in de Tied von de Koalitschoonskriege siet 1801 von Franzosen un Prüßen besett. To’n 1. März 1810 is dat Rebeed denn Deel von dat Königriek Westfalen worrn, wat en Satellitenstaat von Frankriek weer.
Binnen Westfalen hett Mäkelfeld to de Mairie Glüsen in’n Kanton Hittfeld von’n Distrikt Horborg, Departement von de Nedderelv höört.[2] Man to’n 1. Januar 1811 hett sik dat ännert. Dat Königriek Westfalen müss dat Departement direkt an dat Franzöösche Kaiserriek afgeven. De Mairie Mäkelfeld is nee billt worrn un weer een von de dree Mairien in’n Kanton Hittfeld, Distrikt Lümborg, Departement von de Elvmünnen. In de Mairie sünd Öörd in tohoopfaat worrn, de vörher in Westfalen to de söss Mairien Glüsen, Rönnborg, Bääkdörp, Over, Bullenhuus un Neeland höört harrn (all söss in’n Kanton Hittfeld). Von de Mairie Neeland is blots de lüttje Oort Seevenhusen an de Mairie Mäkelfeld gahn. De annere Oort, Neeland, is in de Mairie Horborg wesselt.
1813/1814 hebbt de Russen de Franzosen slahn un dat Rebeed befreet. Dat Kurförstendom Hannover is denn wedder herstellt worrn un de ole Stand von vör 1810 wedder dor. Mit’n Wiener Kungress is 1815 ut dat Kurförstendom dat Königriek Hannover worrn.
Öörd ännern
Dor hebbt düsse Öörd tohöört:
- Kaiserriek Frankriek:[1]
- Mäkelfeld (396 Inwahners), Rönnborg (198), Sinsdörp, Weid (168), Bääkdörp (58), Wittenbarg (24), Wooxdörp (21), Metzendörp (37), Fleest (184), Pulvermöhl, Glüsen (156), Hössen (83), Over (416), Seevenhusen (6), Bullenhuus (176), Groot Moor (201), Lütt Moor (79), Freeswardermoor (106)
Vondaag sünd düsse Öörd Deel von de Gemeen Seevdaal. En lütten Deel höört vondaag ok to de Stadt Hamborg.
Footnoten ännern
- ↑ a b Albrecht Friedrich Ludolph Lasius: Der französische Kayser-Staat unter der Regierung des Kaysers Napoleon des Großen, im Jahre 1812, Band 1. Kißling 1813, Sied 60
- ↑ Bulletin des lois du Royaume de Westphalie. Königliche Bookdruckeree, Kassel 1810, Sied 39