Mairie Moorborg

De Mairie Moorborg weer in de Franzosentied (1811 bet 1813) een von de twee Mairien, in de de Kanton Horborg indeelt weer. De Seet weer in Moorborg. Se harr 2184 Inwahners.

Historie

Moorborg sülvs hett vör de Franzosentied to de Stadt Hamborg höört. De Ümgegend von Moorborg aver hett to de Vaagdie Höpen von dat Amt Horborg un de Huusvaagdie Mesborg von dat Amt Mesborg in dat Förstendom Lümborg höört, wat in dat Kurförstendom Hannover leeg. Dat Kurförstendom Hannover weer in de Tied von de Koalitschoonskriege siet 1801 von Franzosen un Prüßen besett. To’n 1. März 1810 is dat hannöversche Rebeed denn Deel von dat Königriek Westfalen worrn, wat en Satellitenstaat von Frankriek weer. Moorborg sülvs is 1810 aver noch hambörgsch bleven.

Man al to’n 1. Januar 1811 hett sik dat allens ännert. Dat Königriek Westfalen müss dat Departement von de Nedderelv direkt an dat Franzöösche Kaiserriek afgeven. Dat hambörgsche Moorborg is mit de vörmaals hannöverschen, nu westfäälschen Öörd ut de Ümgegend to de Mairie Moorborg tohoopslaten worrn. Dat weer nu een von de twee Mairien in’n Kanton Horborg, Distrikt Horborg, Departement von de Elvmünnen. In de Mairie sünd blangen dat hambörgsche Moorborg Öörd in tohoopfaat worrn, de vörher in Westfalen to twee Mairien höört harrn: de Mairie Neewiedendaal ut’n Kanton Horborg un de Mairie Fischbeek ut’n Kanton Mesborg.

1813/1814 hebbt de Russen de Franzosen slahn un dat Rebeed befreet. Hamborg un dat Kurförstendom Hannover sünd denn wedder herstellt worrn un de ole Stand von vör 1810 wedder dor. Mit’n Wiener Kungress is 1815 ut dat Kurförstendom dat Königriek Hannover worrn.

Öörd

Dor hebbt düsse Öörd tohöört:

• Kaiserriek Frankriek:

  Moorborg (1616 Inwahners), Neewiedendaal, Ooldwiedendaal, Huusbrook (79), Neegraven (285), Scheedholt, Fischbeek (204)

Vondaag sünd düsse Öörd all Deel von de Stadt Hamborg.