Maschen

Dit Woort hett noch annere Bedüden: kiek dorför ünner Maschen (Mehrdüdig Begreep).

Maschen (hoochdüütsch Maschen) is en Dörp in de Gemeen Seevdaal in’n Landkreis Horborg, Neddersassen.

Wapen/Flagg	Koort
Basisdaten
Bundsland: Neddersassen Landkreis: Horborg Gemeen: Seevdaal
Inwahners:	9.028 (2017-12-3131. Dezember 2017)
Hööchd:	14 m över NN
Postleettall:	21220
Vörwahl:	04105
Geograafsche Laag:	53° 24′ N, 10° 2′ O
Laag von Maschen in de Gemeen Seevdaal (Koort lett sik anklicken)

De Oort besteiht ut twee Delen. Dat ole Dörp Maschen, fakener Maschen-Dörp nöömt, un en ne’ere Wahnsiedlung in’n Süden, de ok Maschen-Heid nöömt warrt. Maschen-Heid is deelwies mit dat Dörp Host tohoopwussen. To Maschen höört ok de Hoff Freschenhusen mit bi.

Geografie

Dat Dörp liggt an’n Noordrand von de Lümbörger Heid an dat rechte Över von de Seev. In’n Westen is dat Naturschuulrebeed Oold Moor un in’n Oosten de Stemmbrook.

De Naveröörd sünd Hössen in’n Noordoosten, Stell mit Fachenfelln in’n Oosten, Ashusen mit Büllhorn un Kieselshöh in’n Süüdosten, Ohlendörp, Ramßel un Host in’n Süden, Helmstörp un Lindhost in’n Süüdwesten, Jehrden, Karoxbossel, Hittfeld un Emmelndörp in’n Westen un Fleest, Glüsen un Mäkelfeld in’n Noordwesten.

Historie

Maschen kummt 1294 as Merschene (Enn von de Masch) toeerst in de Oorkunnen vör. Bi Maschen is 1958 aver ok en Grafffeld ut de Sassentied in dat 9. Johrhunnert funnen worrn. To de Funnen von dit Grafffeld höört ünner annern de Schievenfibel von Maschen.

In de Franzosentied von 1810 bet 1814 hett de Oort to de Mairie Parrns in’n Kanton Winsen höört. Dat Rebeed hett in disse Tied 1810 to dat Königriek Westfalen un von 1811 bet 1814 to dat Franzöösche Kaiserriek ünner Napoleon höört.

De Oort hett vör 1885 to de Vaagdie Parrns in dat Amt Winsen tohöört. Blots in de Tied von 1852 bet 1859 weer de Oort kort in dat Amt Parrns. Na 1885 weer Maschen in’n Kreis Winsen. 1932 is dat Dörp Deel von’n Landkreis Horborg worrn.

De Oort is an’n 1. Juli 1972 tohoop mit 18 annere Gemenen Deel von de Gemeen Seevdaal worrn.

In’n Eersten Weltkrieg sünd 23 Soldaten ut Maschen fullen oder vermisst un in’n Tweten Weltkrieg 95.

Inwahnertall

Johr	Inwahners
1812-00-001812	302
1824-00-001824	30 Füürsteden
1848-00-001848	376 Lüüd, 48 Hüüs
1871-12-011. Dezember 1871	435 Lüüd, 65 Hüüs
1885-00-001885	473
1910-12-011. Dezember 1910	622
1925-00-001925	717
1933-00-001933	983
1939-00-001939	1.064

Religion

Fredenskark in Maschen-Heid

Maschen is evangeelsch-luthersch präägt un billt mit de Fredenskark en egen Kaspel. Maschen hett vörher to dat Kaspel von de Mauritius-Kark in Hittfeld höört. De Fredenskark is denn an’n 17. Oktober 1952 wieht worrn. In’n April 1953 is de Karkengemeen Maschen denn egenstännig worrn.

De Karkhoff in Maschen is 1931 anleggt worrn.

För de Kathoolschen is de St.-Ansgar-Kark in Hittfeld tostännig, de siet 2014 Deel von de Karkengemeen Goden Hirt in Winsen is. Toeerst hett de Oort to de Karkengemeen St. Petrus in Bookholt tohöört. De St.-Ansgar-Kark is 1964 boot worrn un hett bet 1978 noch to de Parree Bookholt höört. To’n 1. April 1978 is St. Altfrid in Mäkelfeld egenstännige Parree un Hittfeld Filialkark worrn.

Wapen

Dat Wapen von Maschen wiest baven op sülvern Grund dree gollen Eckern un twee gröne Ekenbläder. Ünnen wiest dat op grönen Grund en sülvern Wellenlien.

Dat Gröön un de Wellenlien staht för de Masch un de Seev.

Kultur

In Maschen gifft dat en Denkmaal för de Fullenen ut de twee Weltkrieg’.

Verenen

Maschen hett en egene freewillige Füürwehr, de an’n 17. Februar 1928 grünnt worrn is. Dat is siet 1983 de Swoorpunktfüürwehr för de Gemeen Seevdaal. De Schüttenvereen Maschen mit egen Speelmannstog is 1922 grünnt worrn. Dat Schüttenfest warrt jümmer in’n Juli fiert. Dat gifft twee Sportvereens. Den VfL Maschen, de 1911 grünnt worrn is, un den ESV Maschen von 1980. De VfL Maschen büddt Badminton, Ballsport, Basketball, Football, Kampfsport, Koronar, Swemmen, Danzen, Tennis, Dischtennis, Turnen un Volleyball an un de ESV Maschen Angeln, Tennis un Football.

Weertschop un Infrastruktur

Dat Dörphuus Maschen in de Schoolstraat is en Filiaal von dat Raadhuus von de Gemeen Seevdaal in Hittfeld.

De Oort hett Filialen von de Volksbank Lümborger Heid un de Spoorkass Horborg-Buxthu.

Verkehr

Rangeerbahnhoff Maschen 1977

Maschen liggt an en wichtigen Autobahn-Knüttpunkt, de dör Hoster Dreeeck (A 1 un A 7) un Maschener Krüüz (A 1 un A 39) billt warrt. De A 39 geiht in’n Süüdoosten na Winsen un Lümborg. De A 1 löppt in’n Noordoosten dör Hamborg un na Lübeck un in’n Süüdwesten na Bremen. De A 7 kummt von Noorden ut Hamborg un geiht in’n Süden na Hannover. De Opfohrt 2 Maschen op de A 39 liggt direkt twüschen Maschen-Dörp un Maschen-Heid.

In Maschen draapt sik de Kreisstraten K 86 (geiht in’n Oosten över Stell na Winsen), K 10 (geiht in’n Süden na Ramßel) un K 77 (geiht in’n Westen na Hittfeld an de Landsstraat 213 ran). Von de K 77 geiht ok noch de K 79 af, de in’n Noordwesten na Fleest löppt. Lüttjere Straten gifft dat ans na Hössen un Glüsen un över Host na Ohlendörp, Helmstörp un Lindhost.

Maschen hett en Bahnhoff an de Bahnlien Hannover–Hamborg, de en beten butendörps na Noordoosten to liggt. An disse Bahnlien liggt ok de Rangeerbahnhoff Maschen, de 1977 anleggt worrn is. Dat is de gröttste Rangeerbahnhoff in Europa.

De Bahnhoff is 1905 kamen. De A 1 is 1937 boot worrn un de A 7 na Süden 1956. Dat Stück von de A 7 na Noorden is 1975 tokamen un de A 250 (wat later de A 39 worrn is) in de Johren 1980.

Scholen

De Oort hett mit de Grundschool Maschen en egen Grundschool.

Versorgung

In de Hoster Möhl is 1910 en lütt Elektrizitätswark inboot worrn, dat de Öörd Maschen un Host mit Stroom versorgt hett. Düt Elektrizitätswark is bi en Brand in de Möhl 1936 verbrennt.

Lüüd

• De Poppenspeler Walter Büttner leevt in Maschen un hett dor sien Open-Air-Theater.
• De Schauspelerin Sophie Schütt stammt ut Maschen.
• De Countryband Truck Stop kummt ut Maschen un hett dor von 1977 bet 1995 in Joe Menke sien Toonstudio ehr Platten opnahmen. Dat Dörp kummt ok in dat Leed Der wilde, wilde Westen vör (Der wilde, wilde Westen fängt gleich hinter Hamburg an, in einem Studio in Maschen…). De Truck-Stop-Musiker Günter „Cisco“ Berndt (1942–2014) hett bet to sien Dood in Maschen leevt un is dor ok begraven.
• Uschi Nerke, bekannt ut’n Beat-Club von de Johren 1960 un 1970, leevt in Maschen.
• De NDW-Sängerin Franziska Menke (Frl. Menke) leevt in Maschen.
• De Speelbaas Nicolas Stemann is in Maschen opwussen.
• De fröhere Footballspeler Dirk Zander leevt in Maschen.
• Patrick Müller - Schauspeler bi de Sepenoper Unter uns, kummt ut Maschen.
• De plattdüütsche Schriever Hans-Ludolf Flügge is 1907 in Maschen boren.

Literatur

• Wilhelm Beneke: Zwischen Seeve und Hallonen: Ortsgeschichte von Maschen am Übergang von der Geest zur Marsch. 1998

Weblenken

Maschen. Mehr Biller, Videos oder Audiodateien to’t Thema gifft dat bi Wikimedia Commons.

Öörd in de Gemeen Seevdaal

Bääkdörp | Bullenhuus | Emmelndörp | Fleest | Glüsen | Groot-Moor | Helmstörp | Hittfeld mit Eddels un Karoxbossel | Holtörp | Host | Hössen | Lütt-Moor | Lindhost | Maschen | Mäkelfeld | Metzendörp mit Wooxdörp | Ohlendörp | Over | Ramßel