Hauptmenü öffnen
Oldřich Duras, 1909

Oldřich Duras (* 30. Oktober 1882 in Humny, Böhmen; † 5. Januar 1957 in Prag) weer en tschechisch Schachmeester un Studienkomponist. 1950 hörr he mit to de eersten Spelern, de van de FIDE de Titel van en Grootmeester tospraaken wurr.[1]

WerdegangÄnnern

Duras fung sien Schachloopbahn 1903 an, as he bi en Turnier in Hilversum den 2. Platz belegg. 1905 wurr hüm de Meestertetel verleeht, nahdem he gemeensam mit Akiba Rubinstein dat Hööftturnier in Barmen wunnen harr.

In de folgen Johren kunn he groot Erfolge fiern. 1906 wurr he in Nürnbarg Tweet (achter Frank James Marshall, aber vör Leó Forgács, Carl Schlechter un Michail Tschigorin), ebenso in Wien 1907 (achter Jacques Mieses). He wunn dat Turnier in Wien 1908 (gemeensam mit Géza Maróczy un Carl Schlechter) un in dat glieker Johr in Prag (mit Carl Schlechter vör Akiba Rubinstein un Milan Vidmar). 1909 belegg he in Sankt Petersburg tosommen mit Rudolf Spielmann den darten Platz (achter Emanuel Lasker un Akiba Rubinstein). 1910 keem he in Göteborg up den tweeten Platz. Ebenfalls Tweet weer he bi dat Meesterturnier van den Düütschen Schachbund 1910 in Hamborg, dat van Carl Schlechter wunnen wurr Aaron Nimzowitsch, Rudolf Spielmann, Frank James Marshall, Richard Teichmann un Alexander Aljechin keemen up de nächsten Plätze).[2] 1912 wunn he in Breslau 1912 gemeensam mit Akiba Rubinstein (vör Teichmann, Schlechter, Siegbert Tarrasch, Marshall usw.).[3]

1913 is he in de USA reist un speel dor en Reeg van Turnieren mit. Bi dat Manhattan-Turnier van New York City keem he up den darten Platz achter José Raúl Capablanca und Frank James Marshall. An glieker Stäe verlor he ok noch en Wettkamp gegen Marshall mit 1,5:5,5 (+1 =1 −5).

1914 nehm he noch an dat Turnier van Mannheim deel, dat nah den Utbröök van den Eersten Weltkrieg afbraaken wurr. Duras, Staatsbeamter van Berop, gung nah Prag torüch un hett nah Kriegsenn‘ dat Turnierspeel upgeeven. He weer dreemal tschechisch Meester (1905, 1909 un 1911).

He hett sück dornah starker mit dat Komponeeren van Studien befaat un wurr Redakteurvan en tschechisch Schachzeitung. Duras gull as bedüüdend Komponist. He hett ruch weg 50 Studien un Probleme herutbrocht.

Nah hüm is de Duras-Variante in de Spaansch Partie nömmt: 1. e2–e4 e7–e5 2. Sg1–f3 Sb8–c6 3. Lf1–b5 a7–a6 4. Lb5–a4 d7–d6 5. c2–c4.

Duras weer allgemeen bekannt för sein Toiigkeit in de Verteedigen van schlecht Stellungen. In sien Partie gegen Heinrich Wolf bi dat Turnier in Karlsbad 1907 geev he sück eerst nah 168 Tüüg un mehr as 22 Stünn Speeltiet slahn, wat dormals en Rekord weer.

Mit sien best historsch Elo-Tall van 2743 weer he in’n August 1909 de veertbeste Speler van de Welt.

WeblinksÄnnern

Enkeld NahwiesenÄnnern

  1. Willy Iclicki: FIDE Golden book 1924-2002. Euroadria, Slovenia, 2002, S. 74
  2. Das Internationale Turnier Hamburg 1910 (17. DSB-Kongress) up TeleSchach (Krüüztabell un all Partien)
  3. Das Internationale Turnier Breslau 1912 (18. DSB-Kongress) up TeleSchach (Krüüztabell un all Partien)