Oosterkroog

Wapen/Flagg	Koort
Basisdaten
Bundsland: Neddersassen Landkreis: Veern Gemeen: Veern
Inwahners:
Postleettall:	27283
Vörwahl:	04231
Geograafsche Laag:	52° 56′ N, 9° 16′ O

Oosterkroog (hoochdüütsch Osterkrug) is en lütten Oort in de Gemeen Veern in’n Landkreis Veern, Neddersassen. Binnen de Gemeen Veern höört dat to de polietsche Oortschop Scharnhors.

Geografie

De Oort liggt op de Achem-Veerner Geest. Dat Water ut dat Rebeed flütt över’n Lindhooper Graven na’n Gohbeek hen af.

De Naveröörd sünd Doomöhlen un Scharnhors in’n Noorden, Schnuckenstall, Hoost un Lindhoop in’n Noordoosten, Wetenmöhlen in’n Süüdoosten, Eitze in’n Süden, Bössel un Veern in’n Süüdwesten un Halsmöhlen, Neemöhlen un Ulemöhlen in’n Noordwesten.

Historie

De Oort Oosterkroog geiht trügg op dat Gasthuus an de Schossee von Veern över Kerklinneln na Visselhöövd, dat 1821 von Jürgen Hinrich Bokelmann boot worrn is. Later sünd dor an de Schossee ok noch mehr Hüüs boot worrn. Oosterkroog weer bet 1972 op 15 Hüüs anwussen un is ok woll Nee-Scharnhors nöömt worrn.

Verwaltungsgeschicht

De Oort hett vör 1885 to de Huusvaagdie Veern in dat Amt Veern tohöört. Na 1885 weer dat in’n Kreis Veern, de 1932 mit’n Kreis Achem to’n ne’en un grötteren Kreis Veern tohoopgahn is.

De Oort hett fröher bi de Gemeen Scharnhors mit bihöört, de an’n 1. Juli 1972 mit de Gemeenreform in Neddersassen Deel von de Gemeen Veern worrn is.

Inwahnertall

Johr	Inwahners
1871-12-011. Dezember 1871	8 Lüüd, 1 Huus
1885-12-011. Dezember 1885	4 Lüüd, 1 Huus
1905-12-011. Dezember 1905	6 Lüüd, 1 Huus

Religion

Oosterkroog is evangeelsch-luthersch präägt un höört to dat Kaspel von’n Doom to Veern.

För de Kathoolschen is de St.-Josef-Kark in Veern tostännig.

Weertschop un Infrastruktur

In Oosterkroog liggt de Magic Park Veern.

Verkehr

An Oosterkroog langs löppt de Landsstraat 171, de in’n Süüdwesten na Veern an de L 160 un denn an de Bundsstraat 215 ran geiht un in’n Noordwesten över Kerklinneln un Jeddingen na Visselhöövd.

De nächste Autobahn is de Autobahn 27 (Afsnidd Bremen–Wasra). De Opfohrt 26 Veern-Oost liggt direkt in Oosterkroog an de L 171.

De nächste Bahnhoff is knapp dree Kilometer wied weg in’n Süüdwesten de Bahnhoff Veern an de Bahnlien Wunsdörp–Bremen. Disse Bahnhoff is ok inbunnen in dat Nett von de Regio-S-Bahn Bremen/Neddersassen.

Scholen

De Kinner ut Oosterkroog sünd fröher in Bössel na de Volksschool gahn. Vondaag gaht se op de Grundschool an’n Lönsweg in Veern.