Schottwarden

Wapen/Flagg	Koort
Basisdaten
Bundsland: Neddersassen Landkreis: Cuxhoben Gemeen: Wuster Noordseeküst
Inwahners:
Postleettall:	27638
Vörwahl:	04705
Geograafsche Laag:	53° 38′ N, 8° 30′ O

Schottwarden (hoochdüütsch Schottwarden) is en lütten Oort in de Gemeen Wuster Noordseeküst in’n Landkreis Cuxhoben, Neddersassen. De Oort höört polietsch von öllers bi Wreem mit bi.

Geografie

De Oort liggt in de Masch von Land Wusten direkt achter’n Diek von de Butenwerser/Noordsee.

De Naveröörd sünd Hungerhörn un Hofe in’n Noorden, Eckeleh, Ilkenborg, Hülsen un Sievern in’n Noordoosten, Debst in’n Oosten, Langen un Dingen mit Barward in’n Süüdoosten un Imßen in’n Süden.

Historie

An’n 27. September 1889 hett dat in’n Oort en Brand geven, bi den de Lübssche Hoff un de Harrsche Hoff afbrennt sünd. De Harrsche Hoff weer en olen Haubarg.

Schottwarden liggt in’n Westen von Land Wusten un de See hett dor – anners as annerwegens, wo de See Sand un Slick aflagert hett – an de Küst freten.

As na de Stormflood von 1962 de Dieken an de Noordsee all höger boot worrn sünd, is 1967 ok de Diek in Land Wusten nee maakt worrn. Von wegen dat de Hüüs von Schottwarden so dicht an’n olen Diek legen hebbt un dor nich noog Platz för den högeren un brederen ne’en Diek weer, müssen dree von de Hüüs afreten warrn.

Verwaltungsgeschicht

In de Franzosentied von 1810 bet 1814 hett de Oort to de Mairie Wreem in’n Kanton Dourm höört. Dat Rebeed hett in disse Tied 1810 to dat Königriek Westfalen un von 1811 bet 1814 to dat Franzöösche Kaiserriek ünner Napoleon höört.

De Oort weer vör 1852 in dat Süder-Veerdel von dat Kaspel Wreem un hett to dat Vaagdiegericht Land Wusten tohöört. Von 1852 bet 1885 leeg de Oort in’t Amt Dorum un denn in’n Kreis Leh. 1932 is dat Deel von’n Kreis Wersermünn worrn un 1977 denn von’n Landkreis Cuxhoben.

Mit de Gemeenreform in Neddersassen an’n 1. März 1974 is de Gemeen Wreem Deel von de Samtgemeen Land Wusten worrn. To’n 1. Januar 2015 is de Gemeen oplööst un ut de ganze Samtgemeen Land Wusten is tohoop mit de Gemeen Noordholt de ne’e Gemeen Wuster Noordseeküst worrn.

Inwahnertall

Johr	Inwahners
1791-00-001791	19 Füürsteden
1812-00-001812	57
1824-00-001824	17 Füürsteden
1871-12-011. Dezember 1871	72 Lüüd, 12 Hüüs

Religion

Schottwarden is evangeelsch-luthersch präägt un höört to dat Kaspel von de Willehadi-Kark in Wreem.

För de Kathoolschen is de Hillig-Hart-Jesu-Kark in Bremerhoben-Leh tostännig.

Weertschop un Infrastruktur

In’n Süüdoosten von’n Oort twüschen Schottwarden un Dingen liggt en Windpark mit teihn Windrääd. De Park is 1991 anleggt worrn un hett 3,75 Megawatt (fiev Anlagen von’n Typ AN Bonus 450/35 un fiev Enercon E-33). Bedreven warrt he von de swb AG (Stadtwarken Bremen).

Verkehr

Över lüttjere Straten is Schottwarden verbunnen mit de Landsstraat 129, de in’n Noordoosten na Wreem, Mulsen, Dourm un Millm geiht un in’n Süüdoosten över Dingen un Weddewarden na Speckenbüttel. Von Wreem ut na Oosten löppt de Kreisstraat 66, de in Sievern de L 135 krüüzt un bi Debst an de L 118 un de L 120 ran geiht.

De nächste Autobahn is de Autobahn 27 (Afsnidd Bremerhoben–Cuxhoben). De Opfohrt 6 Bremerhoben-Överseehavens liggt so 13 Kilometer in’n Süüdoosten von Schottwarden an de Cherbourger Straat.

De nächste Bahnhoff is so bi veer Kilometer wied weg in’n Noordoosten de Bahnhoff Wreem an de Bahnlien Bremerhoben–Cuxhoben.