Oganesson

Oganesson is dat opstunns swoorste bekannte cheemsche Element. In dat Periodensystem steiht Oganesson ünner dat Radon. Dat Element warrt mit dat Atomteken Og afkört, de Atomtall is 118.

Opdecken

Bedrogen Opdecken 1999

In dat Johr 1999 weer in de Fachtietschrift Physical Review Letters en Bericht publizeert woorn över dat Opdecken vun de Elementen Livermorium un Ununoctium an’t Lawrence Berkeley National Laboratory. De Bericht weer aver dat Johr dorop wedder torüchtogen, wiel de Resultaten, de dorin beschreven weern, nich dör annere Wetenschopplers namaakt warrn kunnen. In’n Juni 2002 geev denn de Baas vun de Berkeley Labs bekannt, dat de anfanglich Bericht mit gröttster Wohrschienlichkeit op Bedrug un verkeehrte Daten torüch geiht, wiel en Mitarbeider, Victor Ninov ünner Verdacht weer, de Verfallsreegen manipuleert to heben. Ninov verkloor dorophen aver, dat de Maatinstrumenten nich richtig arbeid harrn un he nix dorvör kunn.

Opdecken 2006

In’n Oktober 2006 weer denn noch mol wedder dat Opdecken vun dat 118. Element bekanntgeven. Tosamen weern dree Atomen nawiest worrn, de al 2002 un 2005 in Dubna in en Joint-Venture-Inrichten vun dat russ’sche Vereenigte Institut för Karnforschen un dat Lawrence Livermore National Laboratory künstlich maakt worrn sünd.

De Wetenschopplers harrn bi’t Bescheeten vun Californium mit Calcium-Ionen twee ünnerscheedliche, superswore Atomkarns herstellt. Kort dorna weern eenige Atomen för en poor Ogenblicken versmölt un weern denn as Element 118 künnig worrn.

Naam

Dat Element harr toeerst den vörlöpigen Naam Ununoctium (Atomteken: Uuo), wat sik vun de latienschen Tallen unus („een“) un octo („acht“) afleiden deit. De Opdecken vun dat Element is an’n 30. Dezember 2015 vun de IUPAC offiziell acht worrn.^[1] An’n 8. Juni 2016 weer publiek maakt, dat de Naam Oganesson (Og) na den Mitopdecker Juri Zolakowitsch Oganesjan, de bi dat russ’sche Institut dat Seggen hett, vörslahn weer. An’n 30. November 2016 is de ne’e Naam offiziell verkünnt worrn.^[2]

De Ennen -on is dorbi afleidt vun de fröheren Naams vun bekannte Eddelgasen. To de Grupp höört ok dat Element Oganesson.

Egenschoppen

Ununoctium is en radioaktiv Element mit en Halfweertstiet vun 0,89 ms. Dör Alphaverfall warrt dorut denn Livermorium, dat aver in wenig Sekunnen ok wedder verfallt. Oganesson tellt to de Transactinoiden un warrt cheemsch to de Serie vun de Eddelgasen rekent. Of dat Element bi Ruumtemperatur wohrhaftig as Gas vörliggt, is aver noch nich bekannt.

Vun wegen denn relativistischen Effekt kann dat wesen, dat sik Ununoctium gor nich as en Eddelgas verhollt. Disse Egenschoppen is egentlich mehr bi dat Copernicium (112) vermoodt orrn. Doröver warrt in theoretsch Diskusschonen veel vertellt. Cheemsch Experimenten to de Egenschoppen gifft dat bit nu noch nicht, as dat Elenmenten man blots över sien tyypsch Verfallsreeg nawiest warrn künn.

Tatsächlich künn Og düütlich vun de Egenschoppen vun de Eddelgasen afwieken. Man vermoodt, dat sik dat villicht in Water nich atomar lööst, man as Oxid.