Walkmöhl (bi Heesdörp)
De Walkmöhl (hoochdüütsch Walkmühle) weer en Möhl an’n Pulvermöhlenbeek bi Heesdörp. Dat Rebeed liggt vondaag in de Gemeen Bremervöör in’n Landkreis Rodenborg, Neddersassen.
Historie
ännernOp halven Weg twüschen Heesdörp un hüdigen Oost-Swing-Kanaal is üm 1550 rüm von de Bremer Arzbischöp en Watermöhl boot worrn, de as Pulvermöhl bruukt worrn is.[1] De Möhl leeg en Stück wieder in’n Süden as dat hüdige Gelänn, in de Neegd von’n Bahnhoff Heesdörp un dat Bundswehrdepot.[1] Von disse Möhl hett ok de Pulvermöhlenbeek sien hüdigen Naam kregen. Disse Möhl is 1570 in de Luft flagen.[1] Dat hett denn bet na’n Dörtigjohrigen Krieg duurt bet de Möhl von Franss Abbenseth an’n hüdigen Standoort wedder opboot worrn is.[1] In dat 18. Johrhunnert is ut de Pulvermöhl en Walkmöhl worrn, de as Arvtinsenmöhl gellen dee.[1]
Üm 1780 weer Franz Abbenseth de Möller.[1] He weer verheiraadt mit Juliane Sophie Plate, de na sien Dood Johann Hinrich Pratje freet hett. Juliane Sophie Plate hett later de Möhl an den vörherigen Pächter Gerd Stelling verköfft.[1] De Familie Stelling hett de Möhl denn bet 1851 hatt.[1] 1851 hett denn Georg Landrock de Möhl köfft.[1]
Landrock hett 1856 de Genehmigung kregen, en Göttmöhl intoboon un 1890 hebbt se de Möhl kumplett to en Koornmöhl ümboot, de denn noch bet 1906 lopen is. Dat Möhlengebüüd is in de Tied twüschen 1939 un 1948 kumplett brockfällig worrn un 1952 tohoopfullen.[1] Vondaag staht blots noch de Grundmüürn von de ole Möhl.[2][1]
Üm 1900 rüm is aver en Danssaal un en Park bi de Möhl anleggt worrn.[1] 1904 is dör Brandstiftung en groten Deel von de Gebüüd afbrennt.[1] 1905 hett Heinrich Landrock dat Wahnhuus wedder opboon laten.[1] 1906 hett denn aver Wilhelm Wahlen den Hoff mit Möhl köfft.[1]
De Familie Wahlen hett sik in de eerste Hälft von dat 20. Johrhunnert jümmer mehr op de Gastronomie verleggt un ok Frömmenzimmers inricht.[1] Ut De Möhl is dat Kurhotel zur Walkmühle worrn.[1] 1936 hett Hans-Wilhelm Wahlen den Bedriev övernahmen.[1] 1964 hebbt se de Bueree opgeven un de Gebüüd afdragen.[1] Ok de Danssaal is as Schüttensaal na Heesdörp verköfft worrn.[1] 1965 hebbt se dat Lokal ümboot.[1] De Naam hett sik in dat Johr von Kurhotel zur Walkmühle op Die Walkmühle ännert.[1] Von 1964 bet in de Johren 1970 harr dat Lokal siene besten Tieden.[1] Dor hebbt teihn Lüüd fast arbeidt un in de Saison noch mehr.[1] Dat Lokal harr binnen 490 Plätz un buten ok noch 700.[1] In de Johren 1980 güng dat denn aver bilütten bargdal.[1] De Besitters wullen dat Lokal to en Hotelanlaag ümboon, aver dor is dat nich mehr to kamen.[1] Dat Kurhotel hett an’n 31. März 1988 dichtmaakt un is an’n 29. un 30. April 1998 afreten worrn.[1]
Verwaltungsgeschicht
ännernIn de Franzosentied von 1810 bet 1814 hett de Oort to de Mairie Bevern in’n Kanton Zeven höört. Dat Rebeed hett in disse Tied 1810 to dat Königriek Westfalen un von 1811 bet 1814 to dat Franzöösche Kaiserriek ünner Napoleon höört.
De Oort hett vör 1885 to de Vaagdie Bremervöör in dat Amt Bremervöör tohöört. Na 1885 weer dat in’n Kreis Bremervöör. 1932 is dat Deel von’n ne’en, grötteren Kreis Bremervöör worrn un 1977 von’n Landkreis Rodenborg.
De Oort is an’n 1. März 1974 as Deel von de Gemeen Heesdörp mit de Gemeenreform in Neddersassen an de Gemeen Bremervöör kamen.
Inwahnertall
ännern| Johr | Inwahners |
|---|---|
| 1824[3] | 1 Füürsteed |
| 1848[4] | 11 Lüüd, 1 Huus |
| 1. Dezember 1871[5] | 12 Lüüd, 1 Huus |
Religion
ännernDe Walkmöhl weers evangeelsch-luthersch präägt un hett to dat Kaspel Heesdörp höört.
För de Kathoolschen is de St.-Michaelskark in Bremervöör tostännig, de siet 1. September 2010 to de Karkengemeen Hillig Geist in Stood tohöört.
Footnoten
ännern- ↑ a b c d e f g h i j k l m n o p q r s t u v w x y z aa ab Jürgen Rode: Das Kurhotel zur Walkmühle bei Bremervörde. in: Jahrbuch des Bremervörder Kultur- und Heimatkreis 2000
- ↑ http://www.hesenet.de/Seite2.html
- ↑ C. H. Jansen: Statistisches Handbuch des Königreichs Hannover. 1824, Sied 632: http://books.google.de/books?id=tG0AAAAAcAAJ&pg=PA632
- ↑ Friedrich W. Harseim, C. Schlüter: Statistisches Handbuch für das Königreich Hannover. 1848, Sied 132: http://books.google.de/books?id=eOI-AAAAcAAJ&pg=PA132
- ↑ Die Gemeinden und Gutsbezirke des Preussischen Staates und ihre Bevölkerung. Berlin 1873, Sied 144: https://books.google.de/books?id=qTZDAQAAMAAJ&pg=RA2-PA144
Koordinaten:53° 29′ N, 9° 12′ O