21P/Giacobini-Zinner

21P/Giacobini-Zinner is en kortperioodschen Komeet. De Komeet weer an’n 11. September 1985 vun de Ruumsond ICE (International Cometary Explorer) ünnersöcht un dormit de eerste Komeet, de je vun en Ruumsond utforscht worrn is.

21P/Giacobini-Zinner
Egenschoppen vun’n Orbit
(Simulatschoon)
Orbitklass kortperioodsch
Grote Halfass 3,527 AE
Perihel — Aphel 1,038 — 6,015 AE
Bahnexzentrizität 0,705
Bahnnegen gegen de Ekliptik 31,811 °
Ümlooptiet 6,621 a
middlere Bahnsnelligkeit 34,61 km/s
Physikaalsch Egenschoppen
Dörmeter ~2 km
Periheldörgang 11. Februar 2012
Historie
opdeckt vun Michel Giacobini
an’n 20. Dezember 1900
in Nizza, Frankriek

Opdecken ännern

De Komeet weern an’n, 20. Dezember 1900 von Michel Giacobini an de Nizza-Steernwacht in Frankriek opdeckt. Ofschoonst ut de Bahnbestimmen to sehn weer, dat sik dat üm en kortperioodschen Komeet dreihn müss, künn he bi sien vörutseggten Torüchkamen in’t Johr 1907 nich wedder beobacht warrn. Dorna weer wedder 1914 mit den Komeet rekent, man as Ernst Zinner an’n 23. Oktober 1913 en ne’en Komeet funnen harr, hett sik bald rutstell, dat dat de Komeet weer, den Giacobini 1900 al sehn harr. Siet de Tiet hett de Komeet den dubbelten Naam vun beide Opdeckers.

Ümloopbahn ännern

Giacobini-Zinner lööpt op en stark elliptische Ümloopbahn. In sien Perihel is de Komeet blots ’n beten buten de Eerdbahn. Dat Aphel is dorgegen noch ’n beten wieter as de Jupiterbahn. Disse Egenschoppen wiest em as Liddmaat vun de Jupiter-Familie ut.

Wat sünners weer de Periheldörgang in’t Johr 1946, as de Komeet bit op 0,26 Astronoomsche Eenheiten an de Eer rankamen is. De Komeet hett dorbi en schienbore Helligkeit vun bit to de 7. Gröttenklass hatt.

De Komeet Giacobini-Zinner is de Born för den Meteorstroom vun de Draconiden (ok Giacobiniden), de jeed Johr in eersten Hälft vun’n Oktober to sehn is.

Ruumsond ICE ännern

Ruchweg een half Johr, vördem in’t Fröhjohr 1986 en Reeg vun verschedene Ruumsonden den Halleyschen Komeet ünnersöcht hett, is de Ruumsond ICE (International Cometary Explorer) an’n 11. September 1985 in en Afstand vun 7.800 km vun’n Komeetenkarn dör den Steert vun Giacobini-Zinner dörflagen. De Ruumsond weer eerst ünner den Naam ISEE 3 to’n Utforschen vun’n Sünnwind kort vör’t Opdrapen op dat Magnetfeld vun de Eer kontrueert. Se künn den de Tosamenwirken vun’n Sünnwind un dat Eerdmagnetfeld mit den Steert vun den Komeet ünnersöken. En Kamera weer aver nich an Boord, so dat keen Biller maakt warrn künnen. Bi de Ünnersöken is rutkamen, dat dat Rebeet, op dat de Komeet Influss hett, grötter is, as man dacht harr, un dat dat Magnetfeld vun’n Sünnwind sien Utrichten wesselt hett, as de Sond de Mitt vun’n Steert dörflagen hett. En kloren Boogschock bi’t Op’nannerdrapen vun Sünnwind un Komeet künn de Sond aver nich wohrnehmen[1]

Kiek ok ännern

Borns ännern

  1. Nigel Calder: Jenseits von Halley. Springer, Berlin, Heidelbarg 1994, ISBN 3-540-57585-5, S. 84.

Weblenken ännern