Beentwisch

Wapen/Flagg	Koort
Basisdaten
Bundsland: Neddersassen Landkreis: Cuxhoben Samtgemeen: Land Hadeln Gemeen: Öberndörp
Inwahners:
Postleettall:	21787
Vörwahl:	04772
Geograafsche Laag:	53° 45′ N, 9° 9′ O

Beentwisch (hoochdüütsch Bentwisch) is en Dörp in de Gemeen Öberndörp (Samtgemeen Land Hadeln). Dat liggt in’n Landkreis Cuxhoben in Neddersassen.

Luftbild von Öberndörp
De Hüüs op dat Över von de Oost, dat hier in’n Achtergrund liggt, sünd Deel von Beentwisch

Geografie

Beentwisch liggt in de Masch an dat rechte Över langs de Oost.

De Naveröörd sünd Wetterdiek un Balje-Süderdiek in’n Noorden, Öderquart mit Kaidiek un Tollweg in’n Noordoosten un Oosten, Moordiek, Hasenfleet un Bremerreeg in’n Oosten, Schüttdamm un Isensee in’n Süüdoosten, Nedderstreek in’n Süden, Ohrensflucht, Braak un Altona in’n Süüdwesten, Öberndörp in’n Westen un Laak in’n Noordwesten.

Historie

1867 sünd in Beentwisch en Reeg Münten ut de Römertied funnen worrn. Dat weren vör allen Denars ut de Tied von Vespasian un Commodus.

De Naam von’n Oort kummt von en oold plattdüütsch Woord Bent oder Beent för Besen. Also en Wisch, op de Besen wasst.

Vondaag warrt mit Beentwisch blots noch de Oort an dat rechte Över von de Oost güntsied Öberndörp betekent. Fröher weer Beentwisch aver de Naam för en grötter Rebeed. In dat 19. Johrhunnert hett dat en Buurschop Beentwisch geven, de in dat Kedener Kaspel Öderquart leeg un to de de Öörd Brook, Gehrener Sietwenn, Groot Wetterdiek, Hogenlucht mit de Göder Hogenlucht I un II, Hollerdiek, Kaidiek, See un Seeborg höört hebbt.

Verwaltungsgeschicht

In de Franzosentied hett de Oort toeerst 1810 bet 1811 binnen dat Königriek Westfalen to de Mairie Öberndörp rechts de Oost in’n Kanton Öberndörp höört un denn von 1811 bet 1814 to dat Franzöösche Kaiserriek ünner Napoleon un dor to de Mairie Öberndörp in’n Kanton Neehuus.

Beentwisch leeg vör 1885 in dat Amt Neehuus. 1885 is dat Deel von’n Kreis Neehuus worrn. 1932 is dat an’n Landkreis Land Hadeln kamen un denn 1977 Deel von’n Landkreis Cuxhoben worrn.

Beentwisch höört von öllers al bi de Gemeen Öberndörp mit bi.

Inwahnertall

Johr	Inwahners
1791-00-001791	71 Füürsteden
1824-00-001824	68 Füürsteden
1848-00-001848	445 Lüüd, 67 Hüüs
1871-12-011. Dezember 1871	529 Lüüd, 85 Hüüs
1885-12-011. Dezember 1885	465 Lüüd, 80 Hüüs
1905-12-011. Dezember 1905	387 Lüüd, 76 Hüüs

Religion

Beentwisch is evangeelsch-luthersch präägt un höört to dat Kaspel Öberndörp.

För de Kathoolschen is de St.-Ansgar-Kark in Warstood tostännig, de siet 2010 Deel von de Karkengemeen Hillig Geist in Stood is.

Kultur

Verenen

De Schüttenvereen Beentwisch is 1907 grünnt worrn.

Weertschop un Infrastruktur

Dat Grundzentrum för Beentwisch is Öberndörp.

In Beentwisch steiht en Sprüttenhuus von de Füürwehr. Dat is een von de twee Standöörd von de Freewillige Füürwehr Öberndörp.

Verkehr

Beentwisch liggt an de Diekstraat langs de Oost, de in’n Noorden von Portshemm kummt un bi de Brügg över de Oost (Kreisstraat 24) an de Landsstraat 113 ranlöppt, de denn na Süden bet na Nedderstreek hen de Dörpstraat von Beentwisch billt. In’n Oosten löppt de L 113 na Hasenfleet un denn wieder na Öderquart.

De nächste Autobahn is de Autobahn 27 (Afsnidd Cuxhoben–Bremerhoben). De Opfohrt 1 Cuxhoben liggt so 37 Kilometer in’n Noordwesten von Beentwisch an de B 73. De Opfohrt 2 Stood-Süüd op de Autobahn 26 (Afsnidd Stood–Hamborg) liggt 38 Kilometer in’n Süüdoosten un ok an de B 73.

De nächste Bahnhoff is de Bahnhoff Wingst bi Watermöhl an de Nedderelvbahn von Cuxhoben na Hamborg.

Lüüd

De Politiker Georg Beckmann is 1868 in Beentwisch boren.