Wapen/Flagg Koort

Wapen vun Öberndörp

Öberndörp
Laag vun Öberndörp in Düütschland
Basisdaten
Bundsland: Neddersassen
Landkreis: Cuxhoben
Samtgemeen: Land Hadeln
Gemeen: Öberndörp
Inwahners:
Hööchd: 1 m över NN
Postleettall: 21787
Vörwahl: 04772
Geograafsche Laag:
Koordinaten:53° 45′ N, 9° 9′ O
53° 45′ N, 9° 9′ O

Karte

Öberndörp (hoochdüütsch Oberndorf) is en Dörp in de Gemeen Öberndörp, Samtgemeen Land Hadeln, in’n Landkreis Cuxhoben, Neddersassen.

Luftbild von Öberndörp (2012)
Anlegger an de Oost

Geografie ännern

Öberndörp liggt in’n Noordoosten von’n Landkreis Cuxhoben an de Grenz na’n Landkreis Stood un Keden.

Dat Dörp liggt in de Masch von de Oost.

De Naveröörd sünd Laak un Bentwisch in’n Noorden, Tollboom, Moordiek un Hasenfleet in’n Noordoosten, Isensee un Schüttdamm in’n Süüdoosten, Nedderstreek, Altona un Braak in’n Süden, Ohrensflucht un Dobrook in’n Süüdwesten, Oostercaadwisch, Watermöhl un Höden in’n Westen un Voigtding un Kumbarg in’n Noordwesten.

Historie ännern

In de Oorkunnen kummt Öberndörp toeerst 1316 as Overdorpe vör.

Vör 1885 weer Öberndörp in dat Amt Neehuus. Dit Amt is denn 1885 Deel von’n Kreis Neehuus worrn un 1932 von’n Landkreis Land Hadeln. 1977 keem de Oort denn an’n Landkreis Cuxhoben.

An’n 1. Januar 1970 is Öberndörp Deel von de Samtgemeen An’n Dobrook worrn. To’n 1. November 2016 hett sik de Samtgemeen An’n Dobrook mit de Samtgemeen Land Hadeln tohoopslaten un de ne’e un gröttere Samtgemeen Land Hadeln billt.

In’n Düütsch-Franzööschen Krieg 1870/1871 sünd dree Soldaten ut Öberndörp fullen oder vermisst un in’n Eersten Weltkrieg 94[1].

Bi de Stormflood 1962 is ok bi Öberndörp de Diek braken.

Inwahnertall ännern

Johr Inwahners
1824-00-001824[2] 114 Füürsteden
1848-00-001848[3] 1.018 Lüüd, 145 Hüüs

Religion ännern

Öberndörp is evangeelsch-luthersch präägt un billt mit de Georgs-Kark en egen Kaspel. De Kark kummt 1379 toeerst in de Oorkunnen vör. Dat hüdige Karkenschipp is von 1653, blots de Toorn is öller. De Örgel hett Johann Hinrich Röver 1879 boot (1987 von Martin Haspelmath wedder op Schick bröcht). Vör de Röver-Örgel hett de Kark en Örgel von Hans Christoph Fritzsche hatt, de he 1653 boot harr, de Gregorius Struve denn 1732 utbetert hett un de 1776 bet 1778 von Georg Wilhelm Wilhelmi ümboot worrn is.

För de Kathoolschen is de St.-Ansgar-Kark in Warstood tostännig, de siet 2010 Deel von de Karkengemeen Hillig Geist in Stood is.

Wapen ännern

Dat Wapen von de Gemeen wiest baven op grönen Grund en sülvern Wellenlien un ünnen vörn rood un achtern sülvern von Tinnensnidd deelt dat Wapen von de Familie von Brobargen. De Wellenlien steiht för de Oost.

Kultur ännern

En Denkmaal för de Fullenen ut Öberndörp ut den Düütsch-Franzööschen Krieg un ut de twee Weltkrieg’ staht bi de Kark.

In Öberndörp warrt jümmer an dat eerste Wekenenn in’n Advent Wiehnachtsmarkt fiert. Den eersten Wiehnachtsmarkt in Öberndörp hett dat 1977 geven.[4]

Museums ännern

In Öberndörp besteiht dat Museum „Spurensuche“, dat över de Geschicht von Öberndörp un ümto informeert. Dat Museum hett in’n September 2018 apenmaakt un warrt von’n Heimaatvereen Öberndörp bedreven. Dat hett vörher al de „Heimaatstuuv“ geven, de 2015 dichtmaakt hett, üm de Sammlung nee to gestalten.

Verenen ännern

Öberndörp hett en Schützenvereen, de 1958 grünnt worrn is.

Weertschop un Infrastruktur ännern

Öberndörp liggt mit de Klappbrügg över de Oost an de Düütsche Fährstraat.

Öberndörp hett en egene freewillige Füürwehr. De Füürwehr hett twee Standöörd: een direkt in Öberndörp op dat linke Över von de Oost un de annere in Bentwisch op dat rechte Över.

Verkehr ännern

 
Klappbrügg över de Oost

Öberndörp liggt an de Kreisstraat 25, de in’n Süden von de Bundsstraat 73 in Hemmoor över Hemm un Braak an’n Diek von de Oost langs na Öberndörp un denn in’n Noorden wieder över Laak na Geversdörp an de Landsstraat 111 ran löppt. De K 24 kummt ut’n Oosten von de Bundsstraat 73 bi Watermöhl un löppt na Öberndörp över de Klappbrügg över de Oost (1977 boot, vörher harr dat en Fähr geven) na Bentwisch an de L 113. De L 113 geiht dor denn in’n Süüdoosten över Nedderstreek un Achthöben an de Bundsstraat 495 ran un in’n Noordoosten över Tollboom na Öderquart.

De nächste Bahnhoff is de Bahnhoff Wingst in Watermöhl an de Nedderelvbahn, wat so bi dree Kilometer af is von Öberndörp.

Scholen ännern

Öberndörp hett mit de Grundschool Öberndörp en egen Grundschool un ok en Kinnergoorn. Na Haupt- un Realschool gaht de Schölers na de School an’n Dobrook in Kumbarg un op Gymnasium na dat Gymnasium Warstood.

Lüüd ännern

De Botaniker Friedrich Oltmanns is 1860 in Öberndörp boren un de Politiker Oskar Schulze 1890. De Politikerin Birgit Meyn-Horeis is dor 1962 boren. De Maler Theodor Herrmann hett na 1904 en Tied in Öberndörp wahnt.

Footnoten ännern

  1. http://www.denkmalprojekt.org/dkm_deutschland/oberndorf_1870-71_wk1u2_ns.htm
  2. C. H. Jansen: Statistisches Handbuch des Königreichs Hannover. 1824, Sied 452: http://books.google.de/books?id=tG0AAAAAcAAJ&pg=PA452
  3. Friedrich W. Harseim, C. Schlüter: Statistisches Handbuch für das Königreich Hannover. 1848, Sied 137: http://books.google.de/books?id=eOI-AAAAcAAJ&pg=PA137
  4. http://www.niederelbe.de/ostemarsch/linksunten-1109.htm

Weblenken ännern

  Öberndörp. Mehr Biller, Videos oder Audiodateien to’t Thema gifft dat bi Wikimedia Commons.