Hauptmenü öffnen

GeografieÄnnern

De Oort liggt direkt an dat Noordöver von de Werser. In’n Noordoosten grenzt de Oort an dat Rebeed von de Stadt Bremen.

De Naveröörd sünd Mahndörp in’n Noorden, Uphusen in’n Noordoosten, Biern un Achem in’n Oosten, Hostäe un Dibbelsen in’n Süüdoosten, Bolleresch, Bollerholt un Rier in’n Süden, Ausen un Suudweyh in’n Süüdwesten, Boller Grummenstreek un Drey in’n Westen un Hemeln un Arbargen in’n Noordwesten.

Vondaag is dat Rebeed von Bollen op dat rechte Över von de Werser 406,4 Hektar groot. Fröher hebbt aver ok de Rebeden Bollerholt (78,4 ha) un de Boller Weid (40,8 ha) mit to Bollen höört. Disse beiden Rebeden höört nu to de Gemeen Rier.

HistorieÄnnern

Bollen kummt 1110 oder 1111 toeerst in de Oorkunnen vör.

De Werser hett in dat 16. Johrhunnert ehren Loop ännert, so dat üm un bi 120 Hektar von de Bollener Wischen op dat annere Över legen. Dorüm is in Bollen en Fähr inricht worrn, de 1593 toeerst in de Oorkunnen vörkummt. De öffentliche Fährverkehr is 1962 instellt worrn. De Bollener Buurn hebbt de Fähr noch en poor Johr wieder bruukt, aver 1972 is de Fähr verschrott worrn.

Bet 1977 harr de Oort keen Stratennaams. De Hüüs weren dör den ganzen Oort dörnummereert un de höögste Tall weer 1977 de Nr. 51. An’n 1. Januar 1977 hebbt de Straten Naams kregen: Bollener Landstraat, Bollener Dörpstraat, Bollener Diek un Bornweg

VerwaltungsgeschichtÄnnern

In de Franzosentied von 1810 bet 1814 hett de Oort to de Mairie Arbargen in’n Kanton Achem höört. Dat Rebeed hett in disse Tied 1810 to dat Königriek Westfalen un von 1811 bet 1814 to dat Franzöösche Kaiserriek ünner Napoleon höört.

De Oort hett vör 1852 to dat Gogericht Achem tohöört un denn von 1852 bet 1885 to dat Amt Achem. Na 1885 weer dat in’n Kreis Achem. 1932 is dat Deel von’n Kreis Veern worrn.

De Oort is an’n 1. Juli 1972 mit de Gemeenreform in Neddersassen Deel von de Gemeen Achem worrn.

InwahnertallÄnnern

Johr Inwahners
1791-00-001791[1] 29 Füürsteden
1812-00-001812[2] 210
1824-00-001824[3] 29 Füürsteden
1848-00-001848[4] 254 Lüüd. 32 Hüüs
1871-12-011. Dezember 1871[5] 229 Lüüd. 36 Hüüs
1910-12-011. Dezember 1910[6] 201
1925-00-001925[7] 237
1933-00-001933[7] 192
1939-00-001939[7] 196

ReligionÄnnern

Bollen is evangeelsch-luthersch präägt un höört to dat Kaspel von de Nikolai-Kark in Mahndörp. De Kark is 1965 boot worrn. Vörher hett de Oort bet 1890 to dat Kaspel von de Johannis-Kark in Arbargen un von 1890 bet 1965 to dat Kaspel von de Kark in Hemeln höört.

För de Kathoolschen is de St.-Matthias-Kark in Achem tostännig.

Gemeenvörsteihers/Börgermeesters/OortsvörsteihersÄnnern

Gemeenvörsteihers:

  • 1877–1907: Hinrich Meyer
  • 1907–1919: Hinrich Ellmers
  • 1919–1922: Dettmer Meier
  • 1922–1933: Hermann Vagt

Börgermeesters:

  • 1933–1971: Hermann Reiners
  • 1971–1972: Erich Warnken

Oortsvörsteihers:

  • 1972–1976: Friedrich Helmers (CDU)
  • 1976–1986: Henry Tietjen (CDU)
  • 1986–1996: Heiko Distler (SPD)
  • 1996–2001: Lars Gagelmann (CDU)
  • 2001–: Heiko Distler (SPD)

Weertschop un InfrastrukturÄnnern

Von üm un bi 1861 bet üm 1930 hett dat in Bollen twee Tegeleen geven. 1892 is op’n Bolleresch en Zement-Dackplatten-Fabrik boot worrn. En Reeg Gebüüd in’n Oort sünd mit Dackplatten ut disse Fabrik deckt worrn. An’t Enn von de Johren 1920 hebbt se de Produkschoon aver instellt.

VerkehrÄnnern

Von Bollen löppt de Kreisstraat 1 na Noorden an de Mahndörper Heerstraat/Landsstraat 158, de in’n Noordwesten na Bremen rin geiht un in’n Süüdoosten na Uphusen, Biern un Achem. Na Süden to is de Verkehr dör de Werser afsperrt.

De nächste Autobahn is de Autobahn 1 (Afsnidd BremenHamborg). De Opfohrt 54 Uphusen/Mahndörp liggt knapp veer Kilometer in’n Noorden von Bollen an de L 158. Över dat Bremer Krüüz twee Kilometer in’n Noordoosten von de Opfohrt is de Oort ok an de Autobahn 27 anbunnen.

De nächste Bahnhoff is so bi veer Kilometer wied weg in’n Noorden de Bahnhoff Mahndörp an de Bahnlien Wunsdörp–Bremen, de ok an de Regio-S-Bahn Bremen/Neddersassen anslaten is.

ScholenÄnnern

De eerste Schoolünnerricht in Bollen is för 1700 nawiest. To de Tied weer de Ünnerricht noch in en Gasthuus. Dat eerste Schoolhuus is eerst 1731 boot worrn. De lüttje Volksschool mit een Klass hett an’n 30. November 1966 dichtmaakt. Sietdem gaht de Kinner op de Grundschool Uphusen un later na Achem op School.

TourismusÄnnern

Bollen hett twee Campingplätz. En drüdden Campingplatz gifft dat noch in Boller Holt op dat annere Över von de Werser.

LiteraturÄnnern

  • Reinhard Dietrich: Die Ersterwähnung des Dorfes Bollen vor 900 Jahren und die Adelsgeschlechter der „von Bolland“ in Urkundenbüchern. In: Heimatkalender für den Landkreis Verden 2011, S. 106-107
  • Horst Korte: Geschichte der Stadt Achim und ihrer Ortsteile. Teil 1. Von der Vorzeit bis zum Ende des Dreißigjährigen Krieges. Bremen 1995, S. 40
  • Heinz Früchtenicht: Ortsfamilienbuch Bollen. 2011

FootnotenÄnnern