Amt Achem

Dat Amt Achem weer en Verwaltungsrebeed in dat Königriek Hannover un de prüüßsche Provinz Hannover binnen de Landdrostie Stood mit Seet in Achem. Dor hett groff dat Rebeed von de hüdigen Gemenen Achem un Eiten un en Reeg von Oortsdelen von Bremen, de nu Deel von Hemeln sünd, tohöört.

Dat Leid över dat Amt harr bet 1867 en Amtmann. In de Prüßentied na 1867 hett de eerste Beamte Amtshauptmann heten.

Geografie

Dat Amt is in’n Noorden an dat Amt Otterbarg grenzt, in’n Oosten an dat Amt Rodenborg, in’n Süüdoosten dat Amt Veern, in’n Süden dat hannöversche Amt Thänhusen un dat bruunswieksche Amt Thänhusen, in’n Süüdwesten dat Amt Syke un in’n Noordwesten dat Bremer Stadtrebeed (Stand 1848).

Historie

Dat Amt Achem is bi de Verwaltungs- un Justizreform an’n 1. Oktober 1852 in dat Königriek Hannover ut dat Gogericht Achem billt worrn. Blots de Buurschoppen Cluvenhagen, Dauben un Ädelsen von dat Gogericht schullen toeerst an dat Amt Veern gahn, wat aver mit Verordnung von’n 28. September 1852 denn doch noch wedder trüggnahmen worrn is.^[1]. Tosätzlich hett dat Amt de Buurschoppen Stellsfellen un Wümmingen ut dat Amt Rodenborg un de Gemeen Allerdörp ut dat Amt Veern tokregen.

As Gericht för dat Amt is to’n 1. Oktober 1852 dat Amtsgericht Achem inricht worrn.

1859 bi de nächste Verwaltungsreform is dat Amt Otterbarg oplööst worrn un en Deel von dat Amt mit de Gemeen Hu’e un dat Kaspel Otterst is denn an dat Amt Achem kamen. De lüttjen Eilannen Korvinsel un Wietsand in de Werser bi Drey sünd dör en Verordnung von’n 22. Juni 1859 an dat Amt Syke gahn.^[2] Dör en Verordnung von’n 22. Mai 1861 is de Hoff Hollinghusen to’n 1. Juli 1861 von dat Amt Achem in dat Amt Zeven wesselt.^[3]

Nadem dat Königriek Hannover 1866 an Prüßen kamen is, sünd 1867 Stüürkreise in de ne’e Provinz Hannover inricht worrn. Dat Amt hett denn to’n Stüürkreis Veern tohöört.

Bi de Verwaltungsreform in Prüßen to’n 1. April 1885 is ut dat Amt Achem de Kreis Achem worrn.