Bossel (Burweg)

Wapen/Flagg	Koort
Basisdaten
Bundsland: Neddersassen Landkreis: Stood Samtgemeen: Olendörp-Himmelpoorten Gemeen: Burweg
Flach:	2,9 km²
Inwahners:	166 (2011-00-002011)
Inwahnerdicht:	57,2 Inwahners pro km²
Postleettall:	21709
Vörwahl:	04144
Geograafsche Laag:	53° 37′ N, 9° 15′ O

Bossel is en Dörp in de Gemeen Burweg in Landkreis Stood, Neddersassen.

Geografie

Dat Water ut Bossel flütt över den Möhlenbrookgraven in’t Bloemdoler Slüsenfleet un rin’e Oost.

Bossel liggt twischen Blomendol in’n Westen un Himmelpoorten in’n Oosten. In’n Süden liggt Olendörp un in’n Noorden Burweg.

Historie

In de Johren 1930 is in Bossel en oolt Gruvenhuus ut dat 9./10. Johrhunnert funnen worrn. Dor hebbt se denn ok en ole Brosch utkuhlt, de wohrschienlich Marie wiest.

Vör 1885 weer dat Dörp Deel von de Böörd Olendörp binnen dat Amt Himmelpoorten. 1885 is de Oort denn Deel von’n Kreis Stood worrn un 1932 von’n Landkreis Stood.

Bossel, wat op hoochdüütsch ok Bossel heet, hett vördem Borstel heten, wat vun buristalda kummt (-bossel). Dat bedüüdt Buurnsteed. De Oort müss 1932 den Naam ännern, as de Kreis Stood mit den Kreis Jörk tohoopleggt worrn is un so dat Dörp Bossel (hoochdüütsch Borstel) in Oolland to’n Kreis keem. Twee Gemenen mit densülven Naam in een Kreis güng nich.

Bossel weer en temlich lütte Gemeen un hett sik dorüm 1965 mit Olendörp un de twee annern lütten Gemenen Beeß un Brobargen to de Samtgemeen Olendörp tohoopslaten. Düsse Samtgemeen harr man söven Johr Bestand. Denn hett dat de Gemeenreform in Neddersassen geven. Bossel is dorbi an’n 1. Juli 1972 Deel von de Gemeen Burweg worrn. Gliektiedig is en ne’e, düüdlich gröttere Samtgemeen Olendörp grünnt worrn, to de de Gemeen Burweg un dormit ok Bossel höört hett. Disse Samtgemeen harr Bestand bet to’n 1. Januar 2014, as de Samtgemeen Olendörp mit de Samtgemeen Himmelpoorten to de Samtgemeen Olendörp-Himmelpoorten tohoopgahn is.

Inwahnertall

Bossel bestünn üm 1500 ut blot twee Buurnsteden un ene Kaat un is eerst so ganz bilütten bet to’n 18. Johrhunnert grötter worrn.

Johr	Inwahners
1766-00-001766	78
1824-00-001824	20 Füürsteden
1848-00-001848	107 Lüüd, 21 Hüüs
1871-12-011. Dezember 1871	113 Lüüd, 23 Hüüs
1900-00-001900	114
1910-12-011. Dezember 1910	125
1933-00-001933	117
1939-00-001939	126
2005-00-002005	194
2011-00-002011	166

Religion

Bossel is evangeelsch-luthersch präägt un höört to dat Kaspel von de Martinskark in Olendörp.

För de Kathoolschen is de St.-Michaelskark in Bremervöör tostännig, de siet 1. September 2010 to de Karkengemeen Hillig Geist in Stood tohöört.

Kultur

In Bossel warrt siet öllers al Faslom fiert.

Scholen

De Kinners gaht na dat Schoolzentrum Olendörp na Grund-, Haupt- un Realschool. Op Gymnasium gaht se na de Vincent-Lübeck-School in Stood. De egene Volksschool in’t Dörp hett 1964 dichtmaakt.

Dat Schoolhuus, dat bet 1964 bruukt worrn is, is 1893 boot worrn.

Schoolmeesters:

• 1890-Oostern 1896: Hermann Tiedemann
• 13. April 1896-31. März 1933: Karl Schulz
• 1. April 1933-1938: Werner Frommke
• 1. April 1938-Mai 1945: Georg Köpke
• 15. September 1945-19. November 1951: Gustav von der Werth
• 1. März 1952-31. März 1964: Kurt Reim

Weertschop un Infrastruktur

Verkehr

Vun Bossel gaht Straten na Blomendol, Burweg, Olendörp un Himmelpoorten. Bi Himmelpoorten hett de Oort Ansluss an de Bundsstraat 73.

De nächste Bahnhoff is in Himmelpoorten an de Nedderelvbahn von Cuxhoben na Hamborg, wat so bi 4,5 Kilometer weg is.

Infrastruktur

Dat Afwater warrt nich zentral afföhrt, dat gifft Kleenklääranlagen för jeden Huusholt.

Footnoten

Öörd in de Gemeen Burweg

Burweg (mit Hogenlucht un Host) | Blomendol | Bossel