Chester Alan Arthur

Chester Alan Arthur (* 5. Oktober 1829 in Fairfield, Franklin County, Vermont; † 18. November 1886 in New York City) weer van’ 4. März bit 20. September 1881 Viezpräsident un ansluutend bit to’n 4. März 1885 der 21. Präsident vun de USA.

Ünnerschrift vun C.A. Arthur

Arthur weer oorsprünglich Mester, denn Afkaat, later hett he in New York de Tollbehörde leit. He hett Reformen vun den apenlichen Deenst inleit, um de Korruptschoon intodämmen un fung mit de Moderniseeren vun de Flotte an. Insgesamt gull Arthur aber ehrder as swaak Politiker. He wurrd binnerhalv vun de Republikaansch Partei de konservativ Grupp vun de Stalwarts torekent.

Leven

Fröh Johren un Utbillen

Arthur in jüngeren Johren as Afkaat (1859)

Bit hüüd andüernd gifft dat Vermooden, nah de de tatsächliche Gebortsoort vun Arthur buterhalv vun de amerikaansch Grenzen leeg. Denn harr he nah de amerikaansch Verfaaten weder dat Amt vun den Viezpräsidenten noch dat Präsidentenamt övernehmen drüfft. Ok sien Gebortsjohr is nich klor: Eenig Borns seggen 1829, annern dorgegen 1830. As seker gellt, dat Arthur as fievt Kind vun den Baptistenprediger William Arthur un de sien Fru Malvina Stone boren wurr. He weer de eerste Söhn vun de Familie. Sien Vader hett faken de Arbeitsstäe wesselt. De Familie truck bit Arthur sien 14. Levensjohr söss Mal üm. Trotz disse widrige Ümstännen kreeg Arthur en för dormalige Verhältnisse goot Schoolutbillen.

1844 truck de Familie nah Schenectady in’ Staat New York. Arthur hett sück hier up sien Collegebesöök vörbereit. Een Johr later nehm he sien Studium an dat Union College up, wat he nah dree Johren spoodriek afsluuten dee, wat hüm fortan berechtigen dee, as Meester to arbeiten. Dissen Beroopsweg hett he denn ok inslahn, hett sück aber neben sien Meestertätigkeit ok mit rechtswetenschaplich Studien befaat. Af 1853 is he denn in en Kanzlei wesselt. 1854 wurr he in de Anwaltschap upnommen un weer Afkaat in New York. Arthur kunn sück gau en gooden Roop erarbeiten. Apenlich bekannt wurr he as Verteidiger vun Slaven, de ut den Süüden flücht weern. De weern nah sien Meenen in New York as free antosehn. So keem he in Kuntakt mit de Abolitschonismus-Bewegen as ok in Verbinnen mit de Republikaansch Partei.

Berop un Familie

Arthur sien Fru Ellen Herndon in 1859.

Af 1857 wurr Arthur vun de Second Brigade vun de New York State Militia as Afkaat beschäftigt. 1859 hett he Ellen Lewis Herndon, Dochter vun en Marinehelden ut Virginia heiraadt. Mit hör harr he dree Kinner. Ellen Arthur is 1880 an en Lungenentzündung storven un kunn de latere Präsidentschap vun hör Mann nich mehr beleven. 1860 is Chester Arthur in dat politisch Geschäft insteegen. He hett de Wedderwahl vun Edward D. Morgan, den Gouverneur vun New York ünnerstütt. Mit Anfang vun den Sezessionskrieg hett sück Arthur bi de Truppen vun de Union meld. Ok hier kunn he sück gau en gooden Roop halen un weer för de Utbillen vun 120.000 Mann tostännig. Mit sien organisatorisch Talent hett he sien Upgaven in blots wenig Maand utfüllt.

Nah den Bürgerkrieg kehr Arthur in sien Kanzlei torüch, de he gemeensam mit Henry C. Gardiner führen de. De Kanzlei leep recht goot un kunn sück utwieden. Arthur wunn Togang to de „betere“ Krinken vun New York. 1868 hett he den Wahlkamp vun Ulysses S. Grant um dat Amt vun den Präsidenten ünnerstütt. He wurr buterdem Vörsitter vun dat Executive Committee vun dat New York State Committee vun de Republikaner. Dorüm wurr hüm 1871 de Stäe vun de Böversten Tollinnehmer vun den New Yorker Haben anboden – en Posten mit hooch Ansehn un gooden Verdeenst. Arthur harr dissen Posten bit 1878.

Präsidentschap

Chester A. Arthur, as he ünner Eed för de Präsidentschap nommen wurrn is

Dat offizielle Portrait vun Chester Alan Arthur in dat Witt Huus

1880 stunnen weer Nomineerenskonvente för de Wahl vun den Präsidenten an. Mit James Abram Garfield hett sück dorbi bi de Republikaner en Kandidat dörsett, de för de Wiederführen vun Verwaltensreformen stunn. Üm binnerparteilich Spannungen to minneseeren wurr mit Arthur de Posten vun den Viezpräsidenten besett.

Nahdem Garfield an’ 19. September 1881 an de Folgen vun dat tweeeenhalv Maand vörher up hüm veröövt Attentat storven weer, wurr Arthur as Präsident vun de Vereenigte Staaten in sien Privatwahnen ünner Eed nommen. Twee Daag later wurr de Zeremonie an dat Kapitol in Washington, D.C. wedderhaalt. Wegen sien pleegt Uptreeden harr Arthur gau de Binaams First Gentleman of the Land, „Gentleman President“ oder Prince Arthur. Politisch stell Arthur dat Kabinett bit up den Kriegsminister Robert Todd Lincoln, en Söhn vun Abraham Lincoln, um. He hett Reformen vun den apenlichen Deenst inleit, um de Korruptschoon intodämmen, as ok de Moderniseeren vun de Marineflotte.

Arthur hett an en Nierenswaakheit leeden, wat aber geheimhollen wurr. Trotz disse Krankheit hett he sück ok noch vör de Präsidentschapswahl 1884 bewurben, wobi he aber kien aktiven Wahlkamp führen dee. Up den Nomineerensparteidag vun de Republikaner van’ 3. bit 6. Juni 1884 in Chicago kreeg Arthur aber blots de tweetmeeste Stimmen nah sien ehmalgen Butenminister James Gillespie Blaine, de in’ veerten Wahlgang to’n Präsidentschapskandidaten nomineert wurr, bi de Wahl an’ 4. November 1884 aber gegen den Demokraten Stephen Grover Cleveland ünnerlegen weer. Cleveland hatt Arthur denn an’ 4. März 1885 in dat Amt vun den Präsidenten aflööst. Arthur is in’ November an sien Nierenleeden storven, ahn noch eenmal politisch aktiv wurrn to ween.

Trivia

In den Film Stirb langsam: Jetzt erst recht wurrd Chester A. Arthur nömmt, wiel de nah hüm nömmt Grundschool in wichtige Rull in den Film speelt. Ok sien Tätigkeit in de Stadtverwalten vun New York kummt to Spraak.

In den Film Appaloosa wurrd Chester A. Arthur nömmt, wiel he den överführten Farmer un Verbrecher Bragg begnadigen deiht.

In den Film Revolverhelden von Wyoming (Cattle King, 1962) wurr de Figur vun den Präsidenten Chester A. Arthur (Larry Gates) in' geschichtlichen Kontext vun den Striet tüschen Koh- un Schaaptüchter wiest.

In en Episode vun de Simpsons, in de Bart in en Theaterstück den Mörder vun Abraham Lincoln speelt, rööpt he: „Du bist der nächste, Chester A. Arthur!“ (in' historschen Kontext is dat aber nich richtig, wiel up Lincoln Andrew Johnson as Präsident folgen dee.)

Todem wurrd he ok in de Sitcom How I Met Your Mother nömmt, as sück de Figur Ted den Bort afraseert un dorbi tüschendör för en körten Tiet en Backenbort hett, woruphen sien Mitbewahner Marshall up Chester A. Arthur anspeelt.

In dat PC-Western-Strategiespeel Helldorado is de Rettung vun Chester A. Arthur vör en mexikaanschen Revolutschonär/Terroristen mit Naam El Cortador dat ultimative Teel vun dat Speel.

Literatur

Thomas C. Reeves: Gentleman Boss. The Life of Chester Alan Arthur. Knopf, New York NY 1975, ISBN 0-394-46095-2 (Nachdruck. American Political Biography Press, Newtown CT 1998; utführlich Biografie).
Justus D. Doenecke: The Presidencies of James A. Garfield and Chester A. Arthur. Regents Press of Kansas, Lawrence KS 1981, ISBN 0-7006-0208-9 (to de Präsidentschap vun Chester Arthur).
Gregory J. Dehler: Chester Alan Arthur. The life of a gilded age politician and president. Nova Science Publishers, Hauppauge 2011. ISBN 978-1-608-76913-1.
Peter Schäfer: Die Präsidenten der USA in Lebensbildern. Von George Washington bis George W. Bush. Komet, Köln 2005, ISBN 3-89836-450-X, S. 182–187.
Raimund Lammersdorf: Chester A. Arthur 1881–1885. Der Sumpf von Patronage und Korruption. In: Jürgen Heideking, Christof Mauch (Hrsg.): Die amerikanischen Präsidenten. 42 historische Porträts von George Washington bis George W. Bush. 3., dörsehn un aktualiseert Uplaag. Beck, München 2002, ISBN 3-406-48872-2, S. 222–228 (geiht ok up dat Gilded Age as Epoche in; kört, aber lesenswert).

Weblenken

Chester Alan Arthur. Mehr Biller, Videos oder Audiodateien to’t Thema gifft dat bi Wikimedia Commons.

Biographie up www.whitehouse.gov (engelsch)

Präsidenten vun de USA