Hinzel
De Hinzel is en Holt in’n Noorden von’n Landkreis Rodenborg.
Geografie ännern
An de Süüdwestkant von’n Hinzel flütt de Geest langs un na Süden to is dat nächste Holt dat Sünnerholt in’n Süden von Hipst.
De Öörd ümto sünd Eversdörp in’n Noordoosten, Glinn in’n Oosten, Örel in’n Süüdoosten, Barchel in’n Süden, Hipst un Freelsdörpermöhlen in’n Westen, Op de Hööv in’n Noordwesten un Nee Eversdörp un Westerbeek in’n Noorden.
Historie ännern
De Hinzel mit sien Forsthuus weer fröher as Forstbezirk egenstännig (8,34 km² groot) un hett to keen Gemeen tohöört. Vör 1885 hett dat to dat Amt Bremervöör tohöört un denn to’n Kreis Bremervöör. 1977 is dat denn an’n Landkreis Rodenborg kamen. De Hinzel is Deel ween von de fröhere Gemeen Op de Hööv. 1974 is disse Gemeen denn Deel worrn von dee Gemeen Hipst.
De lüttje Oort Fasshöven, de in ole Oorkunnen toeerst as Vershovede opdükert, is in’n Dörtigjohrigen Krieg verlaten worrn. Dat Rebeed is denn Deel von’n Forstbezirk Hinzel worrn.
1933 is bi’n Hinzel von de Marien en Sperrtüügamt anleggt worrn, dat 1936 denn kumplett trech weer. Na 1945 sünd de Anlagen denn aver nich wedder bruukt worrn. De Anlagen sünd deelwies sprengt worrn, deelwies sünd dor annere Saken in ünnerbröcht worrn. Dat Krankenhuus Bremervöör hett dor von 1947 bet 1954 en Butensteed bedreven, de DEULA harr dor von 1954 bet 1964 en Landmaschinenschool un en School is inricht worrn. In disse Tied hebbt in de Gebüüd von dat Sperrtüügamt ok veel Verdrevene ut de düütschen Oostrebeden leevt.
Inwahnertall ännern
| Johr | Inwahners |
|---|---|
| 1824[1] | 1 Füürsteed |
| 1848[2] | 11 Lüüd, 1 Huus |
| 1. Dezember 1910[3] | 24 |
Religion ännern
De Lüüd, de in’n Hinzel leevt hebbt, sünd jüst as de Öörd in de Ümgegend, na de Reformatschoon jümmer evangeelsch-luthersch ween. De Oort hett fröher jümmer to dat Kaspel Örel tohöört. Fröher sünd de Lüüd ut’n Hinzel ok op’n Karkhoff von de Kark Örel begraven worrn. 1929 is denn aver bi’n Heinschenwall en egen Karkhoff för de Hüüs Heinschenwall un Hinzel anleggt worrn. Un 1958 hett de Bethlehem-Kark in Hipst apenmaakt un de Hinzel hett denn to dat Kaspel von disse ne’e Kark tohöört.
Weertschop un Infrastruktur ännern
Verkehr ännern
Dör den Süden von’n Hinzel löppt de Kreisstraat 116, de in’n Süüdoosten na Örel an de Bundsstraat 71/74 ran löppt un in’n Noordwesten över de Hööv un Stühbusch bi Köhlen an de Landsstraat 128 ran. De nächste Autobahn is opstunns de A 27 bi Bremerhoben, wat so bi 30 Kilometer weg is. In Tokumst schall de A 20 aver ganz dicht an de Süüdkant von’n Hinzel langslopen. De nächste Opfohrt schall denn von de Bundsstraat 495 op de A 20 ween.
De nächsten Bahnhööv sünd de Bahnhoff Op de Hööv un de Bahnhoff Örel an de Bahnlien Bremervöör-Bremerhoben.
Scholen ännern
Von 1951 bet 1969 harr de Hinzel mit de Waldschule op dat Gelänn von dat ole Sperrtüügamt en egen School. Vondaag gaht de Kinner na de Grundschool Hipst.
Literatur ännern
- Heinrich Krankenberg: Hipstedt: Geschichte eines Dorfes zwischen Geest und Moor. 2008, ISBN 978-3837026429
- Friedrich Streufert un Hans-Otto Hasselbring: Heinschenwalde-Hinzel – Das vergessene Dorf. 2014
Footnoten ännern
- ↑ C. H. Jansen: Statistisches Handbuch des Königreichs Hannover. 1824, Sied 278: http://books.google.de/books?id=tG0AAAAAcAAJ&pg=PA278
- ↑ Friedrich W. Harseim, C. Schlüter: Statistisches Handbuch für das Königreich Hannover. 1848, Sied 132: http://books.google.de/books?id=eOI-AAAAcAAJ&pg=PA132
- ↑ http://www.gemeindeverzeichnis.de/gem1900/gem1900.htm?hannover/bremervoerde.htm
Koordinaten:53° 30′ N, 9° 0′ O