Mairie Hu’e (Kanton Oosterholt)

De Mairie Hu’e weer in de Franzosentied (1810 bet 1813) een von de veer Mairien, in de de Kanton Oosterholt indeelt weer. De Seet weer in Hu’e. Se harr 2199 Inwahners.^[1]

Historie

De Ümgegend von Hu’e hett vör de Franzosentied to dat Gericht Hu’e un de Vaagdie Scharmbeek von dat Amt Oosterholt in dat Hartogdom Bremen höört, wat in dat Kurförstendom Hannover leeg. Dat Kurförstendom Hannover weer in de Tied von de Koalitschoonskriege siet 1801 von Franzosen un Prüßen besett. To’n 1. März 1810 is dat Rebeed denn Deel von dat Königriek Westfalen worrn, wat en Satellitenstaat von Frankriek weer.

Binnen Westfalen weer de Mairie Hu’e een von de negen Mairien in’n Kanton Hu’e von’n Distrikt Bremervöör, Departement von de Elv- un Wersermünnen.^[2] Man al to’n 1. Januar 1811 harr dat wedder en Enn. Dat Königriek Westfalen müss dat Departement direkt an dat Franzöösche Kaiserriek afgeven. De Mairie Hu’e weer nu een von de veer Mairien in’n Kanton Oosterholt, Distrikt Bremerleh, Departement von de Wersermünnen. De Mairie weer nu düüdlich grötter, dor sünd Öörd in tohoopfaat worrn, de vörher in Westfalen to de veer Mairien Hu’e, Scharmbeekstotel, Werschenreeg un Stendörp (all veer in’n Kanton Hu’e) höört harrn. Von de Mairie Werschenreeg is de gröttere Deel in de Mairie Hu’e wesselt. Blots de Oort Ihlpohl keem an de Mairie Leessem. Von de Mairie Stendörp is blots Leessemstotel an de Mairie Hu’e gahn. Stendörp sülvs güng an de Mairie Leessem.

1813/1814 hebbt de Russen de Franzosen slahn un dat Rebeed befreet. Dat Kurförstendom Hannover is denn wedder herstellt worrn un de ole Stand von vör 1810 wedder dor. Mit’n Wiener Kungress is 1815 ut dat Kurförstendom dat Königriek Hannover worrn.

Öörd

Dor hebbt düsse Öörd tohöört:

Königriek Westfalen:^[2]
Hu’e

Kaiserriek Frankriek:^[1]
Hu’e, Huderbeck, Veerhusen (1399 Inwahners), Scharmbeekstotel (338), Ruschkamp (18), Loog (67), Arv (91), Övelgünn (47), Werschenreeg (84), Leessemstotel (117), Wudehorn (9), Oosterhagen (29)

Vondaag sünd düsse Öörd Deel von de Gemeen Hu’e.

Footnoten

↑ ^a ^b Albrecht Friedrich Ludolph Lasius: Der französische Kayser-Staat unter der Regierung des Kaysers Napoleon des Großen, im Jahre 1812, Band 1. Kißling 1813, Sied 105
↑ ^a ^b Bulletin des lois du Royaume de Westphalie. Königliche Bookdruckeree, Kassel 1810, Sied 13

[Lasius-1] Albrecht Friedrich Ludolph Lasius: Der französische Kayser-Staat unter der Regierung des Kaysers Napoleon des Großen, im Jahre 1812, Band 1. Kißling 1813, Sied 105

[BulletinDesLois-2] Bulletin des lois du Royaume de Westphalie. Königliche Bookdruckeree, Kassel 1810, Sied 13

[1]

[2]