Kanton Hu’e

De Kanton Hu’e weer as Kanton en Verwaltungsrebeed in dat Königriek Westfalen, dat blots von 1810 bet 1811 bestahn hett (Franzosentied). De Seet weer Hu’e.

Historie

De Ümgegend von Hu’e hett vör de Franzosentied to de Gerichten Leessem-Schönebeck un Hu’e un dat Amt Oosterholt in dat Hartogdom Bremen höört, wat in dat Kurförstendom Hannover leeg. Dat Kurförstendom Hannover weer in de Tied von de Koalitschoonskriege siet 1801 von Franzosen un Prüßen besett. To’n 1. März 1810 is dat Rebeed denn Deel von dat Königriek Westfalen worrn, wat en Satellitenstaat von Frankriek weer.

Binnen Westfalen weer de Kanton Hu’e een von de 13 Kantons in’n Distrikt Bremervöör von dat Departement von de Elv- un Wersermünnen. Man al to’n 1. Januar 1811 harr dat wedder en Enn. Dat Königriek Westfalen müss dat Departement direkt an dat Franzöösche Kaiserriek afgeven. De Kanton Hu’e is opdeelt worrn op de Mairien Swonewebel un Leessem in’n Kanton Vesack un de Mairie Hu’e in’n Kanton Oosterholt, all in’n Distrikt Bremerleh, Departement von de Wersermünnen.

In’n Harvst 1813 hebbt de Russen de Franzosen slahn un dat Rebeed befreet. Dat Kurförstendom Hannover is denn 1813/1814 wedder herstellt worrn un de ole Stand von vör 1810 wedder dor.

Mairien

De Kanton weer indeelt in acht Mairien:

• Mairie Hu’e: Hu’e
• Mairie Leessem: Leessem
• Mairie Borgdamm: Borgdamm, Vorborgdamm, Massel
• Mairie Werschenreeg: Werschenreeg, Loog, Arv, Övelgünn, Oosterhagen, Ihlpohl, Wudehorn
• Mairie Stendörp: Stendörp, Leessemstotel
• Mairie St. Magnus: St. Magnus
• Mairie Platjenwarf: Platjenwarf, Wollah, Stubben, Holthorst
• Mairie Eggst: Eggst, Brundörp, Heilshorn
• Mairie Scharmbeekstotel: Scharmbeekstotel, Ruschkamp

Footnoten

Kantons in’n Distrikt Bremervöör (Königriek Westfalen, 1810–1811)

Beers | Beverst | Blomendal | Bremerleh | Bremervöör | Dorum | Hagen | Hanst | Hu’e | Leendaal | Oosterholt | Otterbarg | Stotel