Mairie Mesborg
De Mairie Mesborg weer in de Franzosentied (1810 bet 1813) een von de veer Mairien, in de de Kanton Buxthu indeelt weer. De Seet weer in Mesborg. Se harr 1905 Inwahners.[1]
Historie ännern
De Ümgegend von Mesborg hett vör de Franzosentied to dat Amt Mesborg in dat Förstendom Lümborg höört, wat in dat Kurförstendom Hannover leeg. Dat Kurförstendom Hannover weer in de Tied von de Koalitschoonskriege siet 1801 von Franzosen un Prüßen besett. To’n 1. März 1810 is dat Rebeed denn Deel von dat Königriek Westfalen worrn, wat en Satellitenstaat von Frankriek weer.
Binnen Westfalen weer de Mairie Mesborg een von de 15 Mairien in’n Kanton Mesborg von’n Distrikt Horborg, Departement von de Nedderelv.[2] Man al to’n 1. Januar 1811 harr dat wedder en Enn. Dat Königriek Westfalen müss dat Departement direkt an dat Franzöösche Kaiserriek afgeven. De Mairie Mesborg weer nu een von de veer Mairien in’n Kanton Buxthu, Distrikt Lümborg, Departement von de Elvmünnen. De Mairie weer nu düüdlich grötter, dor sünd Öörd in tohoopfaat worrn, de vörher in Westfalen to de söss Mairien Mesborg, Ilsdörp, Ketzendörp, Öbergünn, Eindörp un Eversen (all söss in’n Kanton Mesborg) höört harrn. De Mairien Eindörp un Eversen sünd nich kumplett an de Mairie Mesborg fullen: de Lümbörger Schanz ut de Mairie Eindörp keem an de Mairie Buxthu un de Oort Ömbüddel ut de Mairie Eversen keem an de Mairie Hullnst.
1813/1814 hebbt de Russen de Franzosen slahn un dat Rebeed befreet. Dat Kurförstendom Hannover is denn wedder herstellt worrn un de ole Stand von vör 1810 wedder dor. Mit’n Wiener Kungress is 1815 ut dat Kurförstendom dat Königriek Hannover worrn.
Öörd ännern
Dor hebbt düsse Öörd tohöört:
- Kaiserriek Frankriek:[1]
- Mesborg (384 Inwahners) mit dree Poppeermöhlen, Doans (91), Ilsdörp (268), Swiersdörp (124), Eversen (18), Podendörp (84), Grauen (68), Appel (58), Appelbeek (18), Öbergünn (105), Moor (25), Wulmsdörp (176), Doasdörp (101), Ketzendörp (90), Imbeek (103), Arsdörp (91), Eindörp (38), Pippens (24), Heimbrook (39)
Vondaag sünd düsse Öörd Deel von de Stadt Buxthu, de Gemeen Vosshusen un de Samtgemeen Hullnst.
Footnoten ännern
- ↑ a b Albrecht Friedrich Ludolph Lasius: Der französische Kayser-Staat unter der Regierung des Kaysers Napoleon des Großen, im Jahre 1812, Band 1. Kißling 1813, Sied 57
- ↑ a b Bulletin des lois du Royaume de Westphalie. Königliche Bookdruckeree, Kassel 1810, Sied 45