Mairie Töst
De Mairie Töst weer in de Franzosentied (1810 bet 1813) een von de dree Mairien, in de de Kanton Töst indeelt weer. De Seet weer in Töst. Se harr 2395 Inwahners.[1]
Historie
ännernDe Ümgegend von Töst hett vör de Franzosentied to de Vaagdien Töst un Hittfeld von dat Amt Horborg un de Vaagdie Hullnst von dat Amt Mesborg in dat Förstendom Lümborg höört, wat in dat Kurförstendom Hannover leeg. Dat Kurförstendom Hannover weer in de Tied von de Koalitschoonskriege siet 1801 von Franzosen un Prüßen besett. To’n 1. März 1810 is dat Rebeed denn Deel von dat Königriek Westfalen worrn, wat en Satellitenstaat von Frankriek weer.
Binnen Westfalen weer de Mairie Töst een von de twölv Mairien in’n Kanton Töst von’n Distrikt Horborg, Departement von de Nedderelv.[2] Man al to’n 1. Januar 1811 harr dat wedder en Enn. Dat Königriek Westfalen müss dat Departement direkt an dat Franzöösche Kaiserriek afgeven. De Mairie Töst weer nu een von de dree Mairien in’n Kanton Töst, Distrikt Horborg, Departement von de Nedderelv. De Mairie weer nu düüdlich grötter, dor sünd Öörd in tohoopfaat worrn, de vörher in Westfalen to acht Mairien höört harrn: de Mairien Töst, Wörm, Otter, Kakenstörp un Itzenbüttel ut’n Kanton Töst un de Mairien Hollinn, Avens un Duhrn ut’n Kanton Mesborg. Von de Mairie Wörm sünd de Öörd Wörm un Handörp nich an de Mairie Töst kamen, blots de Rest. Wörm un Handörp sünd in de Mairie Jesborg wesselt. Ok de Mairie Itzenbüttel is nich kumplett an Töst gahn. Ok dor is de Rest an de Mairie Jesborg fullen.
1813/1814 hebbt de Russen de Franzosen slahn un dat Rebeed befreet. Dat Kurförstendom Hannover is denn wedder herstellt worrn un de ole Stand von vör 1810 wedder dor. Mit’n Wiener Kungress is 1815 ut dat Kurförstendom dat Königriek Hannover worrn.
Öörd
ännernDor hebbt düsse Öörd tohöört:
- Kaiserriek Frankriek:[1]
- Töst (357 Inwahners), Will (109), Hökel (35), Lütt Todtshoorn (20), Groot Todtshoorn, Haßel (78), Kamp (104), Otter, Knick (241), Riepshoff (16), Wist, Quellen (172), Schillingsbossel (24), Hinkenbossel (23), Kakenstörp (70), Sprötz (96), Trill (87), Langeloh, Lohbargen (49), Hollinn, Kallmoor (41), Makensbrook (64), Evsdörp (154), Veloh (16), Avens (155), Boitschen (87), Duhrn (129), Wüstenhöben (35), Glüsen, Neddernhoff (202), Bendsdörp (14), Bookholt (17)
Vondaag sünd düsse Öörd Deel von de Samtgemenen Töst un Hullnst un de Gemeen Bookholt.
Footnoten
ännern- ↑ a b Albrecht Friedrich Ludolph Lasius: Der französische Kayser-Staat unter der Regierung des Kaysers Napoleon des Großen, im Jahre 1812, Band 1. Kißling 1813, Sied 60
- ↑ a b Bulletin des lois du Royaume de Westphalie. Königliche Bookdruckeree, Kassel 1810, Sied 43