Miriam Neureuther

Miriam Neureuther (* 21. Juni 1990 in Garmisch-Partenkirchen as Miriam Gössner) is en ehmalge düütsch Biathletin un Skilanglöperin. Hör Loopbahn in' Wintersport fung aber nich up Langloopskiern an sonnern in' alpinen Skisport. Nahdem hör aber in dat Öller vun 14 Johren dör en Slalomstang mehrere Teenen utslahn wurrn weern, seech dat so ut, as wenn dat wiedere Aktivitäten in' Skisport verhinnern dee. Wiel se länger Tiet nich up de Piste kunn, fung se mit dat Langloopen an. Nah eenig Tests is se denn endgültig in dat Lager vun de Biathleten wesselt. Miriam Neureuther is bi de Bundstollverwalten as Erste Zollhauptwachtmeisterin beschäftigt.

Miriam Gössner (2009)

Sportlich Loopbahn

Biathlon

Anfänge (2008 bit 2012)

Bi de Biathlon-Juniorenweltmeesterschapen 2008 in Ruhpolding wunn se mit de Staffel hör eerste Goldmedaille. In dat Johr dorup bi de Biathlon-Juniorenweltmeesterschapen 2009 in Canmore, Alberta, Kanada wunn se trotz acht Scheetfehlern Gold in de Verfolgung un Sülver in' Sprint achter Nicole Wötzel un reck in' Eenzel den veerten Platz.

To'n Uptakt vun den Biathlon-Weltcup 2009/10 in Östersund geev Neureuther bi den Eenzelwettkamp hör Weltcup-Debüt mit Platz 73, den Sprint sloot se up Rang 58 af. Wiel se kien Chance seech, sück in' Biathlon för de Olympisch Winterspelen 2010 to qualifizeeren, hett se sück up dat Langlooptraining konzentreert un nehm an de Tour de Ski 2009/10 un de Olympisch Spelen in Vancouver as Langlöperin deel.

Af de Saison 2010/11 hörr Neureuther to de Weltcup-Mannschap, to'n Uptakt in Östersund wurr se 39. in' Eenzel un wunn dormit eerstmals ok Punkte in' Biathlon-Weltcup. In' Sprint twee Daag later glänz Gössner mit de best Looptiet un bleev todem ahn Fehlschööt. Liekers wurr se noch vun Kaisa Mäkäräinen slahn, wiel se bi dat Liggendscheeten en Patroon vör den Schööt ut dat Magazin repeteeren dee un dorum nahladen muss. De unverwacht tweet Platz in hör veert Rennen weer hör eerst Top-Ten- un Podiumsplatzeeren in' Weltcup. Twee Daag later kunn se disse Platzeeren in de Verfolgung wedderhalen. Dornah nehm se an 13 Rennen deel, bi de se woll 11 mal in de Punkteränge leep, aber an disse good Leistungen meest wegen schlechter Scheetleisitungen nich anknütten kunn. De Loopleistung vun Neureuther weer meest in de Tipp vun de Löper to finnen. Eerst in Fort Kent gelung hör  – weer as Tweetplatzeerte bi den düütsch Dreefacksieg achter Andrea Henkel un vör Magdalena Neuner – weer en Spitzenergevnis. Bi de Biathlon-Weltmeesterschapen 2011 in Chanty-Mansijsk wurr Gössner in de Staffel tosommen mit Andrea Henkel, Tina Bachmann un Magdalena Neuner Weltmeesterin.

In de Weltcup-Gesamtwertung leeg se an dat Enn' vun de Saison up Platz 13.

In de Saison 2011/12 weer de Loopform vun Neureuther weer up en ganz hooch Niveau, de swaak Scheetleistungen hemm aber good Platzeeren verhinnert. Gegen Midden vun de Saison wurr dör Ännern an dat Gewehr (Verlängern vun de Gewehrloop un dormit de Visierlien) versöcht, för betere Ergevnisse an den Scheetstand to sörgen. Gössner hett up eegen Kösten ok den Mentaltrainer anhüert, mit den Magdalena Neuner spoodriek tosommenarbeit harrr. De Maatnahmen harrn Spood, de nu beter Scheetleisitungen hemm aber nich för Podiumsplatzeeren reckt. Immerhen wurrn hör Scheetleistungen beter (vun 56 % in dat Vörjohr up 68 %). An dat Enn vun de Saison wurr ankünnigt, dat mit en nee Gewehr un anner Maatnahmen wieder an dat Scheeten vun de jung Athletin arbeit würr. Neureuther keem up den 27. Gesamtrang in' Weltcup un mit den sössten Platz bi den Sprint in Kontiolahti schaff se hör eenzig Top-10-Platzeeren in de Saison.

De beid Staffelinsätze verleepen aber düütlich beter. Neureuther hett bi dat Liggendscheeten jewiels blots twee Nahladerpatronen bruukt, wiels se in dat Stahndscheeten beid Malen blots eenmal nahladen muss. In Antholz reck de Staffel nah twee Straafrunnen vun hör Teamkolleginnen un 12 Nahldern blots Platz 6, bi de Biathlon-Weltmeesterschapen 2012 in Ruhpolding wunn se – as in dat Vörjohr mit Henkel, Bachmann un Neuner – de Goldmedaille.

Dörbröök un swoor Besehren (2012 bit 2014)

As Vörbereiten för de Saison 2012/13 hett Neureuther an hör Loopstil arbeit un lett umfangriek Verännern an hör Gewehr dörführen. Se hett dorto hör Nehren ümstellt, wiel en Laktoseunverträglichkeit un en Weetenunverträglichkeit faststellt wurrn weer. Buterdem wurr in dat Fröhkohr 2012 en Kieferoperatschoon maakt, bi de en Knakenupbau in' Kiefer dörführt wurr. Neureuther harr in dat Öller vun 14 Johren en Unfall bi'n Slalom harrt, bi de se mehrere Teenen verloren harr, de dör en Teenenersatz ersett wurrn mussen, de in den Kiefer mit Titanschruuven fast maakt wurr. Dordör keem dat aber to en eitrige Entzünnen in den Kiefer, wat dorto führen dee, dat de sück wat uplööst harr. To hör Gewichtsverlust vun etwa teihn Kilogramm geev dat völ kritische Stimmen, aber to Anfang vun de Saison 2012/13 wies sück Gössner weer in stark Loopform. Se sörg neben de ebenfalls flink Löperinnen Kaisa Mäkäräinen un Darja Domratschawa regelmaatig för de best Loopleistungen in't Feld. Aber as in dat Vörjohr ok hemm tonächst Scheetfehler Podiumsplatzeeren verhinner. In' Sprint vun Pokljuka an' 14. Dezember 2012 seker se sück aber dank hör Loopbesttiet mit blots twee Sekunnen Rückstand den tweeten Platz achter de fehlerfree Tschechin Gabriela Soukalová. An' Folgedag gelung hör denn bi de Verfolgung de eerste Eenzelweltcupsieg, ofschons se in' Gegensatz to de weer fehlerfree Tweetplatzeerte Gabriela Soukalová fiev Straafrunnen loopen muss. An' letzten Wettkampdag in Pokljuka reck se den tweeten Platz in' Massenstart achter Tora Berger. In' Januar 2013 wurr se in Oberhof (Döringen) gemeensam mit Nadine Horchler, Tina Bachmann un Franziska Hildebrand mit de Staffel Dart. Twee Daag later wunn se den Sprint vör Tora Berger un Andrea Henkel. An dat folgen Weekenenn' in Ruhpolding leep se in' Sprint de best Tiet vun den Dag, wat bi blots een Scheetfehler hör darten Weltcupsieg bedüüden dee. An dat Enn' vun de Saison keem se in den Gesamtweltcup up den 9. Platz. In den Sprint-Weltcup keem se up Platz 3 un in den Massenstart-Weltcup Rang 8.

Vör de Saison 2013/14 hett sück Neureuther Midden Mai dicht Vinstra (Norwegen) bi en Radunfall swoor besehrt. Se hett sück veer Lendenwirbel anbraaken un hett ok en Besehren an de Bandschiev harrt. Dördör muss se nich blots den Start in de Olympiavörbereiten um dree Maand verschuuven, sonnern ok de düütsch Meesterschapen in' Biathlon afseggen Um hör weniger good Scheetleistungen in de vergangen Johren to verbetern, hett Neureuther in de Vörbereitung todem mit den ehmalgen Scheettrainer vun Ole Einar Bjørndalen, Joar Himle, tosommen arbeit.

An' 4. Januar 2014 geev se up en Pressekonferenz wiels den Biathlon-Weltcup in Oberhof bekannt, dat se wegen düersam Pien to den Entsluss kommen weer, eerst mal to versöken, gesund to wurrn. Se kunn dorum nich an de Olympisch Winterspelen deelnehmen. In de restlich Saison 2013/14 is se denn ok nich mehr in' Weltcup antreeden.

Swoor Rückkehr in den Weltcup (Saison 2014/15)

Gössner kehr to'n Saison-Uptakt 2014/15 in Östersund weer in den Weltcup torüch. In't Loopen harr se nah hör Unfall en Träe nah vörn maakt, weer aber liekers noch en good Stück vun hör fröhere Leistungen bzw. vun de Weltspitze weg. In Verbinnen mit hör wiederhen swaak Scheetleistungen keem in hör beid eerst Wettkämpe nich in de Punkteränge un keem dör Platz 93. Platz bi den Sprint in Hochfilzen un Platz 70 bi den Sprint in Pokljuka ok düütlich noog nich in den Verfolgungswettkamp. Wegen disse Leistungen wurr se in den tweetklassigen IBU-Cup versett. Gössner sull dor, ahn grooten Druck dör Apenlichkeit un Medien, positive Erlevnisse sammeln un insbesünnere an' Scheetstand en mentalen Dörbröök schaffen. Nah dree Siegen bi den Wettkämpen in Duszniki-Zdrój un in Ridnaun kehr se in dat Weltcupteam torüch. Bi de folgen dree Weltcupstatschonen kreeg se Gelegenheit, de bannig good Ergevnisse ut den IBU-Cup ok in' Weltcup to wiesen un sück to glieker Tiet för de Weltmeesterschap in dat finnisch Kontiolahti to qualifizeeren. Mit en 24. Platz in' Sprint vun Antholz as best Ergevnis, hett se disse beid Teelen aber düütlich verfehlt. Se wurr doruphen nih för de Weltmeesterschapen nomineert un is weer in' IBU-Cup antreeden. In dat kanaadsch Canmore kunn se nich an de good Ergevnisse vun de letzt Rennen anknütten, kreeg aber dör hör Gesamtplatzeeren en persönlich Startrecht för den letzten Weltcup in dat russisch Chanty-Mansijsk. Mit en 39. Platz in' Verfolgungswettkamp reck se in en Rennen knapp de Punkteränge. För den Massenstart kunn se sück aber nich qualifizeeren.

De Bundstrainer vun de Fruen, Gerald Hönig, seech bi hör en wiederhen anstiegen Loopbahn, kritiseer aber in en Interview mit dat Oberbayerisch Volksblatt Gössner hör persönlichen Insatz in' Scheettraining mit de Wöör: „In der Schießausbildung wünsche ich mir manchmal ein bisschen mehr Konsequenz, ein bisschen mehr Eigenständigkeit, sich mit der Waffe, der Materie Schießen auseinanderzusetzen.“

Kört dorup wurr bekannt, dat Miriam Gössner weer bi Joar Himle in Norwegen Scheeten traineert, in dissen Sömmer gemeensam mit Kaisa Mäkäräinen.

Saison 2015/16

In de Biathlon-Saison 2015/16 is se mit dree Platzeeren in de Punkteränge in Östersund rinkommen. In' Sprint vun Hochfilzen kunn se sück eerstmals siet de Saison 2012/13 mit en darten Platz weer en Podestplatz sekern. In Ruhpolding wurr se to'n eersten Mal nah hör swooren Radunfall weer för en Staffelrennen upstellt. All in' liggen Anslag muss Neureuther tweemal in de Straafrunn un övergeev up Platz 11 mit meest twee Minüüt Rückstand up Maren Hammerschmidt. De weer mit Loopbesttiet un good Leistung an' Scheetstand aber in de Laag, de Rückstand up ünner 30 Sekunnen to drücken un de Staffel up Rang 2 liggend torüch up Podiumskurs to bringen. Slusslöperin Laura Dahlmeier kunn de Staffel up Platz 2 hollen, nahdem se sück in' Teelsprint blots Olena Pidhruschna slahn geven muss. In den Verloop vun de Saison reck se — neben den darten Platz in' Sprint vun Hochfilzen — mit en 10. Platz in' Sprint vun Antholz un en 8. Platz in' Massenstart in Canmore in insgesamt blots dree Rennen en Top-10-Ergevnis. In fiev Rennen keem se nich mal in de Punkteränge.

In Antholz hett se gemeensam mit Karolin Horchler, Vanessa Hinz un Franziska Hildebrand de Staffel bestreeden, de aber nah jewiels een Straafrunn dör Hinz un Gössner blots up Rang 10 in't Teel keem. In dat US-amerikaansch Presque Isle wurr se to'n darten Mal in disse Saison för en Staffel upstellen. Se övernehm dat Rennen vun Franziska Preuß un Luise Kummer up Rang twee, muss aber nah den Stahndanslag as tovör in Hochfilzen mal weer in de Straafrunn un kunn so de Slusslöperin Karolin Horchler blots as Fievte in dat Rennen schicken. De hett denn blots eenmal dorneben schaaten un broch de düütsch Mannschap an't Enn' up Platz 3. Dör dat good Ergevnis in' Sprint vun Hochfilzen wurr Neureuther ok för de Biathlon-Weltmeesterschapen 2016 in Oslo nomineert, keem dor aber nich to'n Insatz. An dat Enn' vun de Saison reck se Platz 23 in den Gesamtweltcup.

Saison 2016/17

In de Vörbereiten up de Saison 2016/17 hett sück Gössner en neen Schaft för hör Gewehr bauen laaten, aber nich vun Sandro Brislinger, de dat sonst för de düütsch Biathleten maaken deiht. „Ich wollte für mich mal was Neues, für meinen Kopf, quasi einen kleinen Neustart“ hett Gössner to disse Entscheeden seggt. Bi den eersten Weltcup vun de Saison in Östersund hett sück dat aber noch nich betallt maakt. Bi deelwies swoor Bedingungen an' Scheetstand reck se blots en Drapensquote vun 54%. Hör Looptieden weer ok nich so, dat se wiet nah vörn keem, so weer en 37. Platz in' Sprint dat eenzig Ergevnis binnerhalv vun de Punkteränge. In Pokljuka leep dat in all Berieken beter. Ahn Wind an' Scheetstand harr se dor blots een Fehler. In de Looptiet weer se up Rang 10, wat ok hör Endplatzeeren in dat Rennen weer. In de Verfolgung wurr se mit 5 Straafrunnen an' Enn' 25. Ok in' Januar 2017 reck se bi hör Starts nich de Qualifikatschoonsnormen för de Biathlon-Weltmeesterschapen un wurr denn ok nich mehr för den Weltcup in Antholz upstellt. Stattdessen nehm se an Wettkämpen vun den tweetklassigen IBU-Cup an de Biathlon-Europameesterschapen 2017 deel, wo se in de Eenzelrennen aber ok nich ünner de best 20 kommen dee.

Langloop

As lernt Biathletin wurr Neureuther wegen hör stark Leistungen in de Loipe vun Langloop-Bundstrainer Jochen Behle kört vör de Nordische Skiweltmeesterschap 2009 unverwacht för den Langloopsprint nahnomineert. In de Qualifikatschoon för dat Sprintrennen leep se up en völ verspreeken 17. Rang, is denn aber in dat Veertelfinale utscheeden un keem up Letzt up Rang 20. Nah disse Leistung un de krankheitsbedingten Afreis vun Stefanie Böhler wurr Neureuther ok för den Staffelwettbewarf nomineert. Mit de flinkste Tiet vun all Löperinnen up hör Runn minneseer se den Rückstand vun dat düütsch Team um 55 Sekunnen un droog dormit en grooten Andeel to den Gewinn vun de Sülvermedaille bi.

In' Ansluss an de Weltmeesterschap wurr Neureuther ok in den Langloop-Weltcup in Lahti insett, wiel se wegen en Besehren an hör Duum kien Biathlon-Wettkämpe bestrieden kunn. In' Sprint belegg se Platz 15, in dat 10 km-Rennen keem se up Platz 27. Dormit wunn Gössner bi beid Starts jewiels Weltcup-Punkte.

Wiel se wegen hör Ergevnisse in de Biathlon-Saison 2009/10 för sück kien Mögelkeit seech, sück in disse Disziplin för de Olympisch Winterspelen 2010 to qualifizeeren, hett se sück up dat Langlooptraining konzentreert un nehm an de Tour de Ski 2009/10 deel. Dör den fievten Platz in den Prolog reck se de Qualifikatschoon för de Olympisch Spelen in Vancouver as Langlöperin. An' 25. Februar 2010 wunn Neureuther tosommen mit Katrin Zeller, Evi Sachenbacher-Stehle un Claudia Nystad in den olympischen Langloop-Staffelwettbewarf de Sülvermedaille.

In' Ansluss an de Biathlon-Weltmeesterschapen 2013 in Nové Město na Moravě is Neureuther bi de Nordische Skiweltmeesterschap 2013 in Val di Fiemme sowohl bi dat 4×5-km-Staffelrennen as ok in' 10-km-Freestil antreeden. Bi dat 10-km-Freestil-Rennen verpass Gössner de Bronzemedaille um blots en half Sekunn un reck Platz 4. Dormit reck Neureuther de best Platzeeren vun all düütsch Starter in' Langloop in sämtlich Rennen bi de Skiweltmeesterschap. De Staffel hett se as Slusslöperin up den 7. Platz afslooten.

Mountainbike

An' 11. Juni 2016 is se in Bodenmais eerstmals bi Düütsch Meesterschapen in' Mountainbike in' Sprint antreeden, wurr in dat lütt Finale Tweete un dormit insgesamt Sösste.

Utteknungen (Utwahl)

• 2009: Bayerisch Sportpries in de Kategorie Herutragende Nahwusssportlerin
• 2010: Sülvern Lorbeerblatt

Privates

Miriam Neureuther wahnt in Garmisch-Partenkirchen, wo se to Welt kommen un upwussen is. Hör Vader is Bargführer un Skilehrer; hör Moder, en gebörtige Norwegerin, arbeit in' Gastgewarf. Hör jüngere Süster Christina weer bit 2012 in' alpinen Wintersport aktiv un stunn in den Kader vun den Bayerischen Skiverband. De Herkunft vun hör Moder is de Grund dorför, dat Miriam Gössner Norweegsch snacken kann. Se besöcht regelmatig Molde in Norwegen, de Heimatstadt vun hör Moder, un bruukt de Blockhütt vun hör Grootöllern in Vinstra nördlich vun Lillehammer, um sück in Ruhe un Afgescheedenheit to verhalen un nee Kraft to tanken. Gemeensam mit hör Vater weer se 2012 up den Mont Blanc.

Se weer van 2008 bit 2011 mit den Biathleten Simon Schempp tosommen. Siet Sömmer 2013 sünd se un Skifohrer Felix Neureuther en Paar.

Weblenken

Miriam Neureuther. Mehr Biller, Videos oder Audiodateien to’t Thema gifft dat bi Wikimedia Commons.

• Miriam Gössner up de Sieden vun de IBU
• Vörlaag:FISDB
• Vörlaag:DSV
• Vörlaag:SportsReference
• Miriam Gössner bei der Bundeszollverwaltung
• Porträt von Miriam Gössner im Münchner Merkur
• Porträt vun Miriam Gössner in Die Welt