Plutoid
En Plutoid is in de Astronomie en transneptunschen Dwargplanet. De Begreep dröff nich mit de Plutinos dör’nanner bröcht warrn, ok wenn enkelte Himmelskörper to beide Gruppen tohöörn doot.
Definitschoon
ännernDe Internatschonale Astronoomsche Union (IAU) hett an’n 11. Juni 2008[1] beslaten, dat de Plutoiden en Ünnerklass vun de Dwargplaneten wesen schüllt. Dorna is en Plutoid en Objekt, dat en Ümloopbahn üm de Sünn hett un noog Masse opwiest, üm dör sien egene Swoorkraft en hydrostaatsche Gliekgewichtsform (ruchweg kugelförmig) antonehmen. Butendem drööft se jemehr Ümloopbahn nich vun annere Objekten freerüümt hebben, as dat bi de Planeten is un dat dröff sik bi jem ok nich üm en Maand hanneln.
In’n Ünnerscheed to annere Dwargplaneten mööt Plutoiden en grote Halfass opwiesen, de grötter is as de vun’n Neptun. Na disse Egenschoppen is de Dwargplanet (1) Ceres vun de Pöutoiden utslaten, vunwegen dat he in’n Asteroidengördel twüschen Mars un Jupiter liggt un dormit en lüttere Halfass hett as Neptun.
To de Tiet, as de Begreep defineert worrn is, geev dat blots twee Objekten, de to de Plutoiden reken warrn künnen. Dat weer to’n een (134340) Pluto sülvst, vun den de Naam afleidt is, un to’n annern de wat gröttere (136199) Eris. Intwüschen sünd noch annere Plutoiden identifizeert worrn, un daat is antonehmen, dat noch en Reeg vun Objekten dorto kummt.
Toorden
ännernVun de International Astronomical Union’s Committee on Small Body Nomenclature (CSBN) un de IAU Working Group for Planetary System Nomenclature (WGPSN) sünd dorto Richtlienen opstellt worrn. In tokamen Tieten schüllt all Himmelskörpers as Plutoiden gellen, de en grote Halfass grötter as de vun Neptun hebbt un en afsluute Helligkeit heller as +1 mag opwiest. Dat en Objekt as Dwargplanet richtig inordent is oder to’n Asteroiden torüchordent warrt, schall dör wietere Beobachten verkloort warrn.