Samtgemeen Bootel

De Samtgemeen Bootel is en Samtgemeen in’n Landkreis Rodenborg (Wümm), in de sik negen Gemenen för de Afwickeln vun de Verwaltenssaken tohopen slaten hebbt. Se hett 8157 Inwahners (Stand 31. Dezember 2016).

Wapen/Flagg

Koort

Basisdaten

Sitt:

148,68 km²

8157 (31. Dezember 2016)

Geograafsche Laag:

53° 4′ N, 9° 30′ O

Gemeenslötel:

03 3 57 401

Tall Gemenen:

6

SG-Börgermeester:

Dirk Eberle
(ahn Partei)

Websteed:

www.bothel.de

Geologie

En Översicht över de Geologie un Entstahn vun dat Rebeet vun’n helen Landkreis is in den Artikel Landkreis Rodenborg (Wümm) beschreven un kann dor naleest waarn.

Geografie

De Samtgemeen Bootel liggt in’n süüdlichen Deel vun’n Landkreis twüschen de Eenheitsgemenen Rodenborg (Wümm), Scheeßl un Visselhöövd un röögt ok en beten vun de Samtgemeen Söttmer an. In’n Oosten hett de Samtgemeen Kontakt to de Gemenen Snevern un Neenkerken in’n Landkreis Heidkreis un in’n Westen to de Gemeen Kerklinneln, de to den Landkreis Veern höört.

De Samtgemeen Bootel liggt in dat Wümmsietland, nich wiet weg vun de Lüünborger Heid in en Geest-, Woold- un Heidrebeet, dat teemlich naturbelaten is un twüschen de lütten Strööm Rodau un Wiedau to liggen kummt, de in de Wümm münnt.

Samtgemenenopdelen

De Samtgemeen is ut söss enkelte Gemenen tohopensett. Dat sünd na Bookstabeeren:

Historie

Dat Rebeet vun de hüütige Samtgemeen weer bit 1906 düchtig arm. Veele Inwahners müssen utwärts arbeiten as t. B. in de Nedderlannen. In’t Johr 1906 is de Iesenbahnlien vun Bremerhoben na Hannober – de Streck vun Bremervöör na Wasra – boot worrn, de twüschen Brookel un Boothel langföhrt hett, 1958 aver stillleggt worrn is. De Afsnitt twüschen Brookel un Wittörp is 1974 afmonteert worrn. Dor löppt vundaag en Fohrradweg. De Afbo vun den Rest bit na Rodenborg is ok al in Sicht. 1924 keem noch de Iesenbahn vun Rodenborg (Wümm) na Veern över Westerwals dorto.

De Samtgemeen is 1971 grünnt worrn, as de beiden Karkspelen Brookel un Karkwals tohopen leggt worrn sünd. De Verwalten sitt nu in Bootel, wat de gröttste Oort op dat Rebeet is und ok teemlich in de Mitt liggt.

Inwahnertall

Johr	Inwahners^[1]
1972-12-3131. Dezember 1972	6.373
1977-12-3131. Dezember 1977	6.643
1982-12-3131. Dezember 1982	7.257
1987-12-3131. Dezember 1987	6.757
1992-12-3131. Dezember 1992	7.064
1997-12-3131. Dezember 1997	7.756
2002-12-3131. Dezember 2002	8.699
2007-12-3131. Dezember 2007	8.682
2012-12-3131. Dezember 2012	8.177
2017-12-3131. Dezember 2017	8.158

Politik

Samtgemeenraat

De Booteler Samtgemeenraat besteiht vundaag neven den parteilosen Samtgemeenbörgermeester ut tweeuntwintig wählte Raatsliddmaten, de sik op 4 verscheedene Parteien un Wählergruppen verdeelt. De letzte Kommunalwahl weer an’n 11. September 2011:

Partei	2016	2011	2006
CDU	11	12	12
SPD	6	6	7
WSB	2	1	2
Bündnis 90/De Grönen	2	3	1
BLSGB	1	–	–

Samtgemeenbörgermeesters

1971-1974: Fritz Holtermann
1974-August 1988: Kurt Vajen (CDU)
1988-1996: Fritz-Alexander Hornhardt (CDU)
1996-2001: Christian Sonnenwald (SPD)
2001-31. Oktober 2014: Rüdiger Woltmann (ahn Partei)
1. November 2014–: Dirk Eberle (ahn Partei)

Wapen

De Wapenschild is schraagrechts dör en sülvern Bülgenbalken deelt. Dat bövere rode Feld wiest en sülvern Ekenboom mit söss Wörtelennen un söss Blööd. In dat ünnere gröne Feld is en na rechts springend Peerd to sehn.

De Ekenboom steiht mit sien söss Blööd för de söss Lidmatengemenen, de tosamen de Samtgemeen utmaakt. Dat Peerd is en Teken för de grote bedüden vun de Landweertschap un de Peerdtucht op dat Rebeet vun de Samtgemeen. De Bülgenbalken steiht för de Beken, de dör de Ümgeven loopt.

Kultur

Fein antokieken sünd t. B. de Hollännerwindmöhl in’n Oortsdeel Brookel. Dor un ok in Karkwals staht ok olle Dörpskarken. Twüschen Heemsbünnen, Karkwals un Bootel leegt de Bullenseen, de ok över de Grenzen vun de Samtgemeen rut bekannt sünd un en goot besocht Teel sünd, wenn een sik an’n Wekenend ’n beten verhalen müch.

Weertschap

In de Samtgemeen gifft dat veel Holt, un so hebbt sik ok verscheeden holtverarbeitende Industrietwieg ansiedelt. Butendem gifft dat en groten Bedriev för den Bo vun Fohrtüchkarosserien un Gewarf för’t Verarbeiten vun Levensmiddel. In Brookel warrt Speeltüch ut Holt herstellt (Sievers). Un bito is dat Rebeet Teel för Korturlaubers un Watersportlers, de veel op de Bullenseen oder op de lütteren Beken nu Strööm to’n Paddeln ünnerwegs sünd. Geern maakt warrt vun de Urlaubers ok Utfohrten to’n Rieden oder to’n Jagen.

Verkehr

Liekers dat Rebeet sik vun West na Oost teihn deit, löpt de Verkehr vör allen in Noord-Süüd-Richten dör de Samtgemeen. Hier lopt de Bundsstraten B 440 un B 71 as ok verscheeden Kreisstraten. De apentliche Verkehr is nich goot utprägt un besteiht ut Linienbusverbinnen man blots to Schooltieten. De neegsten Bahnhööf sünd in Rodenborg (Wümm) un in Visselhöövd. Fröher verlööp de Streck Wasra–Bremervöör dör dat Rebeet, de gifft dat nu aver nich mehr. Ganz in’n Westen harr Westerwals noch en Bahnhof an de Werser-Aller-Bahn. Dör de Feldmarken vun Bootel un Brookel schall na en Plaan de Y-Trass (Hannober–Hamborg/Bremen) lopen.

De neegsten Flaaghavens leegt ungefäähr 70 km wiet weg in Rodenborg-Luhn (Flegerplatz Rodenborg) un in Bremen (Flegerhaven Bremen).

Footnoten

↑ Daten von dat Landsamt för Statistik Neddersassen

Samtgemenen in’n Landkreis Rodenborg

[InwahnertallRefAll-1] Daten von dat Landsamt för Statistik Neddersassen

[1]