San Jose Palmar
| Wapen/Flagg | Koort | |
|---|---|---|
 |
| |
| Basisdaten | ||
| Inwahners: | 1.355 (2010) | |
| Geograafsche Laag: | Koordinaten:18° 4′ N, 88° 34′ W18° 4′ N, 88° 34′ W | |
|
| ||
San Jose Palmar oder ok San Jose Nuevo is en Gemeen in’n Distrikt Orange Walk von dat Land Belize.
San Jose Palmar un de Stadt Orange Walk sünd vondaag al dicht anenanner ranwussen un San Jose Palmar billt en Vöroort to Orange Walk.
Geografie
ännernDe Oort liggt op dat Westöver von’n New River.
De Naveröörd sünd Orange Walk un Trial Farm in’n Noorden, San Estevan in’n Noordoosten, Honey Camp in’n Oosten, Carmelita in’n Süüdoosten, Tower Hill in’n Süden, Chan Pine Ridge un San Lazaro in’n Süüdwesten un Yo Creek un San Lorenzo in’n Noordwesten.
Historie
ännernIn dat 19. Johrhunnert hebbt Mayas, de vör’n Kastenkrieg ut Mexiko flücht sünd, dat Dörp San Jose Yalbac in de Yalbac Hills grünnt.[1] De eerste Nawies, dat düsse Oort bestünn, stammt von 1862.[1] De Oorwoold von de Yalbac Hills weer unbewahnt un is to de Tied ok von de Mahagoni-Holtfällers, de annerwegens in Brietsch-Honduras aktiv weren, noch kuum bruukt worrn.[1] Dorüm hebbt de Mayas dor Dörper grünnt un Bueree na dat Milpa-Verfohren bedreven.[1] Dat Land weer aver kort vörher dör dat Honduras Land Titles Act von 1858/1861 an de British Honduras Company (na 1878 Belize Estate and Produce Company, BEPCO) fullen, de dor Mahagoni fällen wull.[1]
To de Milpa-Bueree höört de Brandlandbo, bi de de Busch afbrennt warrt, üm Ruum för Ackers to maken. De BEPCO as Landegendömer hett den Brandlandbo aflehnt un verbaden, üm de Mahagoni-Bööm to schulen, kunn dat Verbaad aver nich dörsetten, so lang San Jose Yalbac wied af von de Holtfäller-Lagers weren.[1] To Anfang de Johren 1930 hett de BEPCO aver en neet Holtfäller-Lager bi San Jose Yalbac anleggt un dat Verbaad ok dörsett.[1] Dat weer för de Maya en sworen Slag, denn de Milpa-Bueree smitt na en poor Johr ahn Brandlandbo kuum noch wat af.[1]
In dat Johr 1935 hett sik düsse Kunflikt jümmer mehr ophitt.[1] 1936 hett BEPCO dorüm beslaten, dat dat Ünnernehmen Land in’n Süden von de Stadt Orange Walk as Trust an de Kolonie Brietsch-Honduras afgifft, so dat de Inwahners von San Jose Yalbac en Utkamen finnen schöölt.[1] Wat as Stiftung för de Dörpbewahners utgeven worrn is, dee bedüden, dat de Minschen ut San Jose Yalbac verdreven worrn sünd.[1] In’n April 1936 hett BEPCO de Bewahners op Waggons verlaadt, na Hill Bank brocht un denn per Boot na Orange Walk bröcht.[1] Dat ole Dörp mit Kark un School is von BEPCO dalbrennt worrn.[1] De Dörpbewahners weren in Orange Walk in en Kasernengebüüd ünnerbrocht un hebbt in’n Sommer 1936 dat ne’e Dörp San Jose Palmar opboot.[1]
Von de 200 Lüüd in 30 Familien, de ümsiedelt worrn sünd, sünd in dat eerste Johr dör en Stickhoosten-Epidemie un slechte Versorgung verbunnen mit Hakenworm-Infekschonen 45 Lüüd doodbleven.[1]
Inwahnertall
ännern| Johr | Inwahners |
|---|---|
| 2000[2] | 863 Lüüd, 183 Huushollen |
| 2010[3] | 1.355 Lüüd, 305 Huushollen |
Weertschop un Infrastruktur
ännernIn’n Süden von’n Oort liggt dat Zuckerwark von de Belize Sugar Industries.
Verkehr
ännernSan Jose Palmar liggt an’n Philip Goldson Highway, de in’n Noordoosten na Corozal un an de Grenz to Mexiko föhrt un in’n Süüdoosten över Carmelita na Belize-Stadt. Fröher güng de Highway dör dat Zentrum von Orange Walk un Trial Farm, aver vondaag knickt de Straat an’n Süüdrand von San Jose Palmar na Oosten af, geiht över’n New River un föhrt in en Bagen üm Orange Walk un Trial Farm rüm.
De nächste Flegerplatz is de Orange Walk Airport bi Chan Pine Ridge.
Scholen
ännernDe San Jose Palmar R.C. School is en Grundschool, de von de röömsch-kathoolsche Kark bedreven warrt.
Footnoten
ännern- ↑ a b c d e f g h i j k l m n o Christine Kray, Minette Church, Jason Yeager: Designs on/of the Land. Competing Visions, Displacement, and Landscape Memory in British Colonial Honduras. In: Legacies of Space and Intangible Heritage: Archaeology, Ethnohistory, and the Politics of Cultural Continuity in the Americas. (Rutgevers: Fernando Armstrong-Fumero, Julio Hoil Gutierrez), University Press of Colorado, 2017, Sied 53ff.
- ↑ Zensus 2000 (PDF) von dat Central Statistical Office of Belize
- ↑ Zensus 2010 (PDF) von dat Statistical Institute of Belize
August Pine Ridge | Blue Creek | Carmelita | Chan Pine Ridge | Cuatro Leguas | Douglas | Guinea Grass | Indian Church | Indian Creek | Orange Walk | San Antonio | San Carlos | San Estevan | San Felipe | San Jose | San Jose Palmar | San Juan | San Lazaro | San Lorenzo | San Luis | San Pablo | San Roman | Santa Cruz | Santa Martha | Shipyard | Tower Hill | Tres Leguas | Trial Farm | Trinidad | Yo Creek