Udendörp

Wapen/Flagg	Koort
Basisdaten
Bundsland: Neddersassen Landkreis: Cuxhoben Gemeen: Cuxhoben
Inwahners:
Postleettall:	27478
Vörwahl:	04722
Geograafsche Laag:	53° 50′ N, 8° 49′ O

Udendörp (hoochdüütsch Udendorf) is en Oort in de Gemeen Cuxhoben in’n Landkreis Cuxhoben, Neddersassen. Binnen de Gemeen höört de Oort to de polietsche Oortschop Olenbrook.

Geografie

De Oort liggt in Land Hadeln in de Masch von de Ünnerelv. Dat Water ut dat Rebeed flütt över Gravens na’n Olenbroker Kanaal hen af.

De Naveröörd sünd Wehldörp un de Hoff Blink in’n Oosten, Schodenbüttel, Aßel un Bingen in’n Süüdoosten, dat Oosterenn von Olenbrook in’n Süden un dat Oosterenn von Groden un Olenbrook in’n Westen.

Historie

Verwaltungsgeschicht

De Oort hett vör 1852 to dat Kaspelsgericht Westerenn-Oterndörp in dat Land Hadeln tohöört un denn von 1852 bet 1885 to dat Amt Oterndörp. Na 1885 weer dat in’n Kreis Hadeln. 1932 is dat Deel von’n Kreis Land Hadeln worrn un 1977 von’n Landkreis Cuxhoben.

De Oort weer ganz fröher Deel von de Gemeen Westerenn Oterndörp. 1929 is de Oort denn aver in de Gemeen Olenbrook wesselt, de an’n 1. Juli 1972 mit de Gemeenreform in Neddersassen Deel von de Gemeen Cuxhoben worrn is. Sietdem billt Olenbrook binnen de Gemeen en Oortschop, to de ok Udendörp mit tohöört.

Inwahnertall

Johr	Inwahners
1848-00-001848	71 Lüüd, 14 Hüüs*
1871-12-011. Dezember 1871	85 Lüüd, 7 Hüüs
1885-12-011. Dezember 1885	38 Lüüd, 7 Hüüs
1905-12-011. Dezember 1905	29 Lüüd, 6 Hüüs

* tohoop mit Wehldörp un Blink

Religion

Udendörp is evangeelsch-luthersch präägt un höört to dat Kaspel von de Severus-Kark in Oterndörp.

För de Kathoolschen is de Twölv-Apostels-Kark in Olenwoold tostännig, de siet 2008 to de Karkengemeen St. Marien in Cuxhoben tohöört.

Weertschop un Infrastruktur

För Udendörp is de freewillige Füürwehr Olenbrook mit tostännig.

Verkehr

Dör Udendörp löppt de Kreisstraat 4, de in’n Westen na Olenbrook geiht un in’n Oosten na Oterndörp. Över beide Öörd kann een na de Bundsstraat 73 kamen, de von Olenbrook in’n Noordwesten na Cuxhoben löppt un von Oterndörp in’n Süüdoosten över Neehuus, Kumbarg un Hemmoor na Stood.

De nächste Autobahn is de Autobahn 27 (Afsnidd Cuxhoben–Bremerhoben). De Opfohrt 1 Cuxhoben liggt so söven Kilometer in’n Noordwesten von Udendörp an de B 73.

De nächste Bahnhoff is so bi söven Kilometer wied weg in’n Süüdoosten de Bahnhoff Oterndörp an de Nedderelvbahn von Cuxhoben na Hamborg.

Scholen

De Kinner ut Udendörp gaht na de Grundschool Olenbrook.