Wiepelnbusch
Wiepelnbusch (hoochdüütsch Wiepelnbusch) is en ehmalig Eddelgood in de Gemeen Langwedel in’n Landkreis Veern, Neddersassen. Binnen de Gemeen höört de Oort to Hagen-Grinnen un to de polietsche Oortschop Ädelsen.
Geografie
ännernDat Good liggt in de Masch twüschen de Werser un de Ole Aller. Vondaag föhrt de Slüsenkanaal Langwedel dicht bi Wiepelnbusch langs.
De Öörd ümto sünd Ädelsen un Koppeln in’n Noorden, de Cluvenhagener Oortsdelen Wurth un Läss’l in’n Noordoosten, Launborg un Cluvenhagen in’n Oosten, Fössen in’n Süüdoosten, Olenhude in’n Süden, Hagen un Grinnen in’n Süüdwesten un Bauen in’n Noordwesten.
Historie
ännernWiepelnbusch weer von 1645 bet 1650 in Besitt von Hermann Thomas von Stuivenberg, de dat 1650 för 900 Rieksdaler an Erasmus von Rönn verköfft hett. Erasmus sien Söhn Johann von Rönn is 1695 storven. Toeerst harr Johann siene Fro Lucke, borene von Sandbeck, dat Good in Besitt. Nadem se 1703 ok doodbleven is, hett ehr Süstersöhn Garlef Jürgen von Skölln dat Good arvt.
Later hett dat Good de Familien von Plate un von der Decken tohöört.
Verwaltungsgeschicht
ännernIn de Franzosentied hett de Oort toeerst 1810 bet 1811 binnen dat Königriek Westfalen to de Mairie Hagen-Grinnen in’n Kanton Achem höört un denn von 1811 bet 1814 to dat Franzöösche Kaiserriek ünner Napoleon un dor to de Mairie Bauen in’n Kanton Achem.
Dat Good hett vör 1852 to de Oostvaagdie von dat Gogericht Achem tohöört, dat 1852 denn to dat Amt Achem worrn is. Na 1885 weer dat in’n Kreis Achem. 1932 is de Kreis Achem mit’n Kreis Veern tohoopgahn un hett den ne’en un grötteren Kreis Veern billt.
Dat Good höört von öllers to de Buurschop un later de Gemeen Hagen-Grinnen mit bi. De Gemeen Hagen-Grinnen is an’n 1. Juli 1968 Deel von de Gemeen Ädelsen worrn, de an’n 1. Juli 1972 mit de Gemeenreform in Neddersassen Deel von de Gemeen Langwedel worrn is. Sietdem höört Wiepelnbusch binnen de Gemeen to de Oortschop Ädelsen, de en egen Oortsraad un Oortsbörgermeester hett.
Inwahnertall
ännern| Johr | Inwahners |
|---|---|
| 1791[1] | 2 Füürsteden |
| 1812[2] | 15 |
| 1824[3] | 2 Füürsteden |
| 1848[4] | 15 Lüüd, 2 Hüüs |
| 1. Dezember 1871[5] | 16 Lüüd, 1 Huus |
| 1. Dezember 1885[6] | 11 Lüüd, 1 Huus |
| 1. Dezember 1905[7] | 10 Lüüd, 1 Huus |
Religion
ännernWiepelnbusch is evangeelsch-luthersch präägt un höört to dat Kaspel von de Kark to’n goden Heer in Ädelsen. Düsse Kark is 1965 trech worrn. Vörher hett dat Good to dat Kaspel von de Sigismund-Kark in Dauben tohöört.
Footnoten
ännern- ↑ Christoph Barthold Scharf: Statistisch-Topographische Samlungen zur genaueren Kentnis aller das Churfürstenthum Braunschweig-Lüneburg ausmachenden Provinzen. Meier, Bremen 1791, Sied 250
- ↑ Albrecht Friedrich Ludolph Lasius: Der französische Kayser-Staat unter der Regierung des Kaysers Napoleon des Großen, im Jahre 1812, Band 1. Kißling, Ossenbrügge 1813, Sied 95
- ↑ Curt Heinrich Conrad Friedrich Jansen: Statistisches Handbuch des Königreichs Hannover. Hannover 1824, Sied 664
- ↑ Friedrich Wilhelm Harseim, Carl Schlüter: Statistisches Handbuch für das Königreich Hannover. Schlütersche Hoffbookdruckeree, Hannover 1848, Sied 143
- ↑ Die Gemeinden und Gutsbezirke des Preussischen Staates und ihre Bevölkerung. Berlin 1873, Sied 166
- ↑ Gemeindelexikon für das Königreich Preußen. Auf Grund der Materialien der Volkszählung vom 1. Dezember 1885. Verlag des Königlichen statistischen Bureaus, Berlin 1888, Sied 177
- ↑ Gemeindelexikon für das Königreich Preußen. Auf Grund der Materialien der Volkszählung vom 1. Dezember 1905. Verlag des Königlichen statistischen Landesamtes, Berlin 1908, Sied 3
Koordinaten:52° 59′ N, 9° 7′ O