Öölm

Öölm (hoochdüütsch: Elm) is en Dörp bi de Oost, dat to de Stadt Bremervöör tohöört. Lüttjere Öörd rundüm Öölm, de ok mit to den Oort Öölm tellt warrt, sünd Öölmerheid, Grööndörp, Schierel un Öölmer Hogenmoor.

Wapen/Flagg

Koort

Basisdaten

Bundsland: Neddersassen

24,87 km²

1.470 (2015-01-3131. Januar 2015)

Inwahnerdicht:

59,1 Inwahners pro km²

Postleettall:

27432

Vörwahl:

04761

Geograafsche Laag:

Koordinaten:53° 31′ N, 9° 12′ O53° 31′ N, 9° 12′ O

Geografie

Öölm liggt dicht bi de Oost. In’n Süden münnt de Oost-Swing-Kanaal in de Oost.

De Naveröörd sünd Forst in’n Noorden, Öölmerheid, Grööndörp, Willah, Olendörp un Hogenoh in’n Noordoosten, Vörhoorn, Schierel, Willahermoor un Mulsen in’n Oosten, Hogenmoor un Tinst in’n Süüdoosten, Hemelingbossel, Sprakel un Heesdörp in’n Süden, Öölmerdamm un Bremervöör in’n Süüdwesten un Hönau-Lindörp, Neer-Ochenhusen un Beeß in’n Noordwesten.

Historie

Öölm kummt in de Tied 1111 bet 116 toeerst in ene Oorkunn vun’n Bremer Arzbischop Liemar vör.^[1] De Naam weer do Elma, wat sik ut Elm för Rüüster un a för Beek tohoopsett.

Vör 1885 weer dat Dörp Deel von de Böörd Olendörp binnen dat Amt Himmelpoorten. 1885 is de Oort denn anners as de Rest von’t Amt Himmelpoorten nich Deel von’n Kreis Stood worrn un bi’n Kreis Bremervöör bikamen. 1977 is de Kreis Bremervöör denn Deel von’n Landkreis Rodenborg worrn.

Wapen

Dat Wapen wiest dree gröne Bläder vun’n Rüüster över en blau Beek op gollen Grund. Dat schall Symbol wesen för’n Naam vun dat Dörp.

Religion

De Lüüd in Öölm sünd traditschonell evangeelsch-luthersch. Öölm hett vun öllers her to dat Kaspel Olendörp tohöört. Öölm weer aver temlich wied weg vun Olendörp (öölm Kilometer) un so hett de Karkengemeen Olendörp 1959/1960, nadem se in Öölm en ne’e School boot harrn, dat ole Schoolhuus köfft un dor en Kapell vun maakt. Siet 1. Januar 1992 is Öölm en egenstännige Karkengemeen, de na Paul Gerhardt nöömt is. To de Gemeen von de Paul-Gerhardt-Kark höört ok Öölmerheid, Grööndörp, Schierel un Öölmer Hogenmoor mit to.

För de Kathoolschen is de St.-Michaelskark in Bremervöör tostännig, de siet 1. September 2010 to de Karkengemeen Hillig Geist in Stood tohöört.

Inwahnertall

Johr	Inwahners
1824-00-001824^[2]	44 Füürsteden
1848-00-001848^[3]	698 Lüüd, 99 Hüüs
1871-12-011. Dezember 1871^[4]	792 Lüüd, 131 Hüüs
1910-12-011. Dezember 1910^[5]	872
1925-00-001925^[6]	903
1933-00-001933^[6]	903
1939-00-001939^[6]	877
2009-12-3131. Dezember 2009^[7]	1.479
2015-01-3131. Januar 2015^[8]	1.470

Politik

Öölm hett binnen de Gemeen Bremervöör en egen Oortsraad mit söven Maten. Oortsbörgermeester is Erich Gajdzik.

Kultur

Scholen

De ole School is 1872 boot worrn. 1959/1960 hebbt se wedder en ne’e School boot un vun de ole hebbt se en Kapell vun maakt. Mit de Grundschool Öölm hett Öölm en egen Grundschool, för de annern Schoolformen mööt se na Bremervöör.

Verenen

Möhlenvereen

Möhl in Öölm in’n Düüstern

De Möhlenvereen hett sik 1981 grünnt, de ole Windmöhl vun Öölm to bewohren. De Galerie-Hollänner Henriette is 1773 in Hamborg boot worrn. 1871 müss de Windmöhl in Hamborg wieken, is utenanner boot worrn un in Öölm wedder nee opboot worrn. Later dreih se sik nich mehr un lööp nu mit en Gas- un toletzt mit en Dieselmotor. 1951 weer dat denn ganz ut mit de Mölleree. Aver 1981 hett sik de Besitter vun de Möhl mit anner Lüüd tohoopdaan un den Möhlenvereen grünnt, dat de Möhl wedder lopen kann.

Schützenvereen

De Schützenvereen Öölm is 1925 grünnt worrn.

Freewillige Füürwehr

De Freewillige Füürwehr vun Öölm is 1907 grünnt worrn.

MTV Öölm

De MTV Öölm is 1911 grünnt worrn un hett hüüt mehr as 600 Mitgleder. De anbadenen Sportoorden sünd Football, Kegeln, Lichtathletik, Tennis, Dischtennis, Turnen un Volleyball.

Weertschop un Infrastruktur

De Volksbank Oosterholt-Scharmbeek hett in Öölm in de Öölmer Landstraat 59 en Filiaal.

Verkehr

Öölm liggt an de Bundsstraat 74, de na Stood un na Bremervöör geiht. Na Noorden geiht vun de B 74 de Landsstraat 114 af, de över Beeß na Esdörp un Olendörp geiht.