Boitzen
Dit Woort hett noch annere Bedüden: kiek dorför ünner Bötzen.
| Wapen/Flagg | Koort | |
|---|---|---|
 |
| |
| Basisdaten | ||
| Inwahners: | ||
| Postleettall: | 27367 | |
| Vörwahl: | 04268 | |
| Geograafsche Laag: | Koordinaten:53° 8′ N, 9° 19′ O53° 8′ N, 9° 19′ O | |
|
| ||
Boitzen (hoochdüütsch Bötersen) is en Dörp in de Gemeen Boitzen (Samtgemeen Söttmer) in’n Landkreis Rodenborg, Neddersassen.
Geografie
ännernDat Water in’n Süden von dat Dörp flütt över Gravens na de Wümm hen af. In’n Noorden flütt dat över’n Weidbeek na de Wiest hen af.
De Naveröörd sünd Borchel in’n Noordoosten, Luhn un Rodenborg in’n Süüdoosten, Waaschen in’n Süden, Hassendörp un Jeerhoff in’n Süüdwesten un Höperhöben, Sleßel, Platenhoff un Mulmshoorn in’n Noordwesten.
Historie
ännernDe öllsten Funnen bi Boitzen seggt, dat dat Rebeet al siet dat Neolithikum (Jungsteentiet) ruchweg af 4.100 v. Chr. bewahnt weer. Bi Boarbeiten is 1966 en olle Füersteed freeleggt worrn. Gröttere archäoloogsche Utgraven hebbt en Urnengraffsteed ut de jüngeren Bronzetiet un ölleren vörröömschen Iesentiet an’n Dag bröcht un blangento en Füersteed, de as Ritualsteed för Gräffnissen deent hebben künn. Dör dissen Fund is Boitzen överregional bekannt worrn.
De Oort duukt dat eerste mol 1358 in en Oorkunnen op. Dat weer en Koopverdrag, in den en Harm Schulte dat Goot Boitzen an Arp von Weyhe verköff. De Naamsstamm kummt vun dat oolthoochdüütsche „Buten“ oder „Putirik“, wat Slauch bedüüt. Üm 1770 rüm hett sik de Naam in Boitersen wannelt, wobi de Ennen -sen dorop hendüüt, dat de Oort, as dat den vundaag gifft twüschen 500 un 1000 grünnt worrn is.
Verwaltungsgeschicht
ännernIn de Franzosentied von 1810 bet 1814 hett de Oort to de Mairie Rodenborg in’n Kanton Rodenborg höört. Dat Rebeed hett in disse Tied 1810 to dat Königriek Westfalen un von 1811 bet 1814 to dat Franzöösche Kaiserriek ünner Napoleon höört.
De Oort hett vör 1885 to de Amtsvaagdie Söttmer in dat Amt Rodenborg tohöört. Na 1885 weer dat in’n Kreis Rodenborg, de 1977 mit’n Landkreis Bremervöör to’n ne’en un grötteren Landkreis Rodenborg tohoopgahn is.
De Oort hett fröher en Buurschop un later en Gemeen billt. Düsse Gemeen is an’n 1. März 1974 mit de Gemeenreform in Neddersassen mit Höperhöben tohoopgahn un hett de ne’e un gröttere Gemeen Boitzen billt.
Inwahnertall
ännern| Johr | Inwahners |
|---|---|
| 1791[1] | 18 Füürsteden |
| 1812[2] | 120 |
| 1824[3] | 32 Füürsteden |
| 1848[4] | 208 Lüüd, 37 Hüüs |
| 1. Dezember 1871[5] | 235 Lüüd, 43 Hüüs |
| 1. Dezember 1885[6] | 237 Lüüd, 46 Hüüs |
| 1. Dezember 1905[7] | 295 Lüüd, 41 Hüüs |
| 1. Dezember 1910[8] | 273 |
| 1925[9] | 339 |
| 1933[9] | 355 |
| 1939[9] | 403 |
Religion
ännernBoitzen is evangeelsch-luthersch präägt un höört to dat Kaspel von de Johannes-de-Döper-Kark in Horß. Düsse Kark is 1963 boot un 1989 as Karkengemeen egenstännig worrn. Vörher hett Boitzen to dat Kaspel von de Georg-Kark in Söttmer höört.
För de Kathoolschen is de Corpus-Christi-Kark in Rodenborg tostännig.
De Karkhoff in Boitzen liggt an’n Rodenbörger Weg.
Kultur
ännernVerenen
ännernFör dat kulturelle Leven in de Freetiet gifft dat en Reeg vun Mööglichkeiten. De Dörper Boitzen un Höperhöben hebbt tohopen den Schüttenvereen Boitzen-Höperhöben vun 1927 e.V.. För den Sport gifft dat butendem den TSV Boitzen-Höperhöben, de an’n 7. Mai 1965 grünnt worrn is.
Över’t Johr kann een ok eenige regelmatige festliche Veranstalten besöken. Dat geiht an’n eersten Sünnavend in’n Januar mit dat „Eiersöken“ los, wat dat siet 2005 ok för Froonslüüd gifft, denn aver an’n Sünndag. An’n Avend gifft dat den traditschonellen „Fastnachtsball“. Anfang April finnt in Boitzen jümmer en Slagballspeel statt.
Jümmer dat drüdde Wekenenn in’n Mai is in Boitzen dat Schüttenfest, dat mit’n groden Ümtog dör dat Dörp afhollen warrt. Dat „Backavenfest“ is an’n eersten Juli-Sünndag. Dor warrt in’n 200 Johr ollen Lehmaven Botterkoken un Broot backt. De Heimatvereen Boitzter Spinnstuv laadt dorto ok to Dansvörföhren in.
Weertschop un Infrastruktur
ännernBoitzen hett en egene freewillige Füürwehr, de an’n 13. April 1902 grünnt worrn is.
In’n Oosten von’n Oort liggt op Rodenbörger Rebeed de Lent-Kasern.
Verkehr
ännernBoitzen is teemlich goot an de grötteren Verkehrsweeg anslaten. Dör de Gemeen sülvst löppt de K 202, de de beiden Oortdelen Boitzen un Höperhöben mitenanner verbinnt. Jeerhoff kann dorgegen blots över lütte Nevenstrecken anföhrt warrn. En kort Stück na Süden to münnt de Kreisstraat in de B 75, de in’n Noordoosten över Rodenborg un Scheeßl na Töst un Bookholt löppt un in’n Westen na Söttmer un Otterbarg to. In’n Noordwesten löppt de K 202 na Taaken in de Gemeen Reeßen.
Achter Söttmer besteiht över de B 75 mit de Opfohrt 50 Stuckenbossel ok Ansluss an de A 1. Kort vör Rodenborg twiegt de B 71 af, de wieter na Zeven föhrt un dorbi mit de Anslusssteed 49 Bokel ok wedder’n Verbinnen na de A 1 dorstellt.
De nächsten Bahnhööv sünd so bi acht Kilometer wied weg an de Bahnlien Hamborg–Bremen. Dat sünd de Bahnhoff Söttmer in’n Süüdwesten un de Bahnhoff Rodenborg in’n Süüdoosten. Von 1906 bet 1968 hett dat ok op de Bahnlien Bremervöör–Wasra Personenverkehr geven. Boitzen harr en egen lütten Bahnhoff an düsse Bahnlien.
Scholen
ännernIn Boitzen gifft dat de Grundschool Boitzen un för de noch lütteren Kinner ok en Kinnergoorn. För allgemeen Intresseerte steiht de Samtgemeenbökeree in Boitzen praat.
Footnoten
ännern- ↑ Christoph Barthold Scharf: Statistisch-Topographische Samlungen zur genaueren Kentnis aller das Churfürstenthum Braunschweig-Lüneburg ausmachenden Provinzen. Meier, Bremen 1791, Sied 29
- ↑ Albrecht Friedrich Ludolph Lasius: Der französische Kayser-Staat unter der Regierung des Kaysers Napoleon des Großen, im Jahre 1812, Band 1. Kißling, Ossenbrügge 1813, Sied 98
- ↑ Curt Heinrich Conrad Friedrich Jansen: Statistisches Handbuch des Königreichs Hannover. Hannover 1824, Sied 70
- ↑ Friedrich Wilhelm Harseim, Carl Schlüter: Statistisches Handbuch für das Königreich Hannover. Schlütersche Hoffbookdruckeree, Hannover 1848, Sied 154
- ↑ Die Gemeinden und Gutsbezirke des Preussischen Staates und ihre Bevölkerung. Berlin 1873, Sied 166
- ↑ Gemeindelexikon für das Königreich Preußen. Auf Grund der Materialien der Volkszählung vom 1. Dezember 1885. Verlag des Königlichen statistischen Bureaus, Berlin 1888, Sied 179
- ↑ Gemeindelexikon für das Königreich Preußen. Auf Grund der Materialien der Volkszählung vom 1. Dezember 1905. Verlag des Königlichen statistischen Landesamtes, Berlin 1908, Sied 150
- ↑ Inwahnertallen op gemeindeverzeichnis.de
- ↑ a b c Inwahnertallen op verwaltungsgeschichte.de
Weblenken
ännern- Över de Archäologie in Boitzen (hoochdüütsch)