Mairie Rodenborg

De Mairie Rodenborg weer in de Franzosentied (1810 bet 1813) een von de dree Mairien, in de de Kanton Rodenborg indeelt weer. De Seet weer in Rodenborg. Se harr 3150 Inwahners.

Historie

De Ümgegend von Rodenborg hett vör de Franzosentied to dat Amt Rodenborg in dat Hartogdom Bremen höört, wat in dat Kurförstendom Hannover leeg. Dat Kurförstendom Hannover weer in de Tied von de Koalitschoonskriege siet 1801 von Franzosen un Prüßen besett. To’n 1. März 1810 is dat Rebeed denn Deel von dat Königriek Westfalen worrn, wat en Satellitenstaat von Frankriek weer.

Binnen Westfalen weer de Mairie Rodenborg een von de söven Mairien in’n Kanton Rodenborg von’n Distrikt Veern, Departement von de Elv- un Wersermünnen. Man al to’n 1. Januar 1811 harr dat wedder en Enn. Dat Königriek Westfalen müss dat Departement direkt an dat Franzöösche Kaiserriek afgeven. De Mairie Rodenborg weer nu een von de dree Mairien in’n Kanton Rodenborg, Distrikt Bremen, Departement von de Wersermünnen. De Mairie weer nu düüdlich grötter, dor sünd Öörd in tohoopfaat worrn, de vörher in Westfalen to söven Mairien höört harrn: de Mairien Rodenborg, Scheeßl un Ünnerst ut’n Kanton Rodenborg, de Mairie Brookel ut’n Kanton Töst, de Mairie Mulmshoorn ut’n Kanton Zeven un de Mairien Hassendörp un Höperhöben ut’n Kanton Otterbarg. Von de Mairie Scheeßl is de gröttere Deel an de Mairie Rodenborg gahn. Scheeßl sülvs aver is Deel von de Mairie Lauenbrüch worrn. Von de Mairie Höperhöben is de gröttere Deel an de Mairie Rodenborg gahn. Blots de Oort Fährhoff is in de Mairie Horß wesselt. Von de Mairie Ünnerst keem blots de Oort Grafel, de Rest is in de Mairie Karkwals wesselt. Ut de Mairie Mulmshoorn sünd blots de beiden Öörd Luhn un Jeersdörp an de Mairie Rodenborg kamen. De Rest güng an de Mairie Jeem.

1813/1814 hebbt de Russen de Franzosen slahn un dat Rebeed befreet. Dat Kurförstendom Hannover is denn wedder herstellt worrn un de ole Stand von vör 1810 wedder dor. Mit’n Wiener Kungress is 1815 ut dat Kurförstendom dat Königriek Hannover worrn.

Öörd

Dor hebbt düsse Öörd tohöört:

• Königriek Westfalen:

  Rodenborg mit Amthoff un Forsthoff, Heemsbünnen, Hassel, Worth, Hast

• Kaiserriek Frankriek:

  Rodenborg (996 Inwahners), Hast (63), Hassel (43), Heemsbünnen (83), Worth (28), Grafel (15), Brookel (226), Bootel (356), Trochel (34), Luhn (32), Waaschen (175), Höperhöben (94), Olenbossel (8), Sleßel (70), Platenhoff (24), Boitzen (120), Jeerhoff (39), Badlsdörp (146), Wohlsdörp (141), Wensbrook (74), Hassendörp (195), Bellen (30), Amthoff (26), Forsthoff (7), Bösenkamp (8), Jeersdörp (107), Stell (10)

Vondaag sünd düsse Öörd Deel von de Stadt Rodenborg, de Gemeen Scheeßl un de Samtgemenen Bootel un Söttmer.