Departement von de Elvmünnen

Dat Departement von de Elvmünnen (franzöösch Bouches-de-l’Elbe [buʃ.ˈd‿lɛlb]) weer en Departement von dat franzöösche Kaiserriek (een von de dree Hanseaatschen Departements), dat in de Franzosentied von’n 1. Januar 1811 bet 1814 bestahn hett. Präfekt von dat Departement weer von Januar 1811 bet 1814 Patrice de Coninck.

Koort von de Hanseaatschen Departements (De Elvmünnen baven in rood-vigelett)

Laag

Dat Departement dee in’n Noordwesten an de Noordsee grenzen. In’n Noorden leeg dat Königriek Däänmark un in’n Oosten dat Hertogdom Mekelborg-Swerin. In’n Süüdoosten weer dat Königriek Westfalen un in’n Süüdwesten dat Departement von de Wersermünnen.

Historie

Nadem dat Kurförstendom Hannover sik gegenöver Frankriek slahn geven harr, is dat Deel von dat Königriek Westfalen worrn. De Noorden von dat Kurförstendom hett denn dat Departement von de Elv- un Wersermünnen billt, dat von’n 1. März 1810 bet to’n 31. Dezember 1810 bestahn hett. To’n 1. Januar 1811 müss dat Königriek Westfalen dat Departement aver al wedder afgeven un dat is denn tohoop mit de Fre’e Rieksstadt Hamborg un Lübeek en direkten Deel von dat Kaiserriek Frankriek worrn. Dat Rebeed von dat Departement von de Elv- un Wersermünnen is twischen de Departements von de Elvmünnen un von de Wersermünnen opdeelt worrn. Ok dat Hertogdom Loonborg un dat Förstendom Lümborg sünd dor mit bikamen.

De Grenz na dat Departement von de Wersermünnen weer de ole Grenz von dat Amt Ritzbüttel na Wusten, denn de Grenz von Wusten na Hadeln bet Beers un von dor bi Bremervöör an de Oost. Denn an de Oost langs bet na de Au un von dor na en Arm von de Wümm hen un op Hillen to.

Nadem de Allieerten Napoléon I. 1814 ünnerkregen harrn, is dat Kurförstendom Hannover in Form von dat Königriek Hannover wedderkamen, dat Rebeed noorden von de Elv is däänsch worrn un Hamborg un Lübeek sünd wedder egenstännig worrn.

De Höövdstadt von dat Departement weer Hamborg. Dat harr 373.285 Inwahners. In de List von de franzööschen Departements harr dat de Nummer 128, de ok bi de Poststempels bruukt worrn is.

Distrikt	Inwahners	Kantons
Hamborg	137.540	Hamborg (6 Kantons, mit de Elvwarders un welk enkelte Dörper langs de Alster un in Stormarn, 192,5 km² mit 10.000 Inwahners, dat Amt Ritzbüttel mit Neewark 82,5 km² mit 4.000 Inwahners, dat Amt Bardörp), Bardörp, Hamm, Willemsborg
Lübeek	74.322	Loonborg, Lübeek (2 Stadtkantons), Lübeck Landkanton; Traavmünn, Moisling, Niendörp un Slutup, Mölln, Neehuus, Ratzborg, Swartenbeek un Steenhorst
Lümborg	65.981	Bewick, Buxthu, Garlstörp, Horborg, Hittfeld, Lümborg, Töst un Winsen
Stood	95.442	Bremervöör, Freeborg, Himmelpoorten, Hornborg, Jörk, Neehuus, Oterndörp, Ritzbüttel, Stood un Zeven

Literatur

• Albrecht Friedrich Ludolph Lasius: Der Französische Kayser-Staat unter der Regierung des Kaysers Napoleon des Grossen im Jahre 1812: ein geographisch-historisches-Handbuch. J.G. Kissling, Ossenbrügge 1813