Francisco (Maand)

Francisco is en lütten Maand vun den Planeten Uranus. Sien vörlöpig Beteken weer S/2001 U 3.

Opdecken un Naam

De Maand Francisco is in’n September 2003 vun de Astronomen Matthew J. Holman, John J. Kavelaars, Dan Milisavljevic un Brett J. Gladman op fotografsche Biller opdeckt worrn, de al an’n 13. August 2001 maakt weern.

De Uranus-Maanden hebbt all Naams kregen, de vun Figuren ut Warken vun Wiliiam Shakespeare oder Alexander Pope afleidt sünd. In dissen Fall is de Naam Francisco wählt worrn, en Lord ut Shakespeares Stück The Tempest. De vörlöpig Beteken S/2001 U 3 is na dat System vun de Internatschonale Astronoomsche Union (IAU) tostannen kamen.

Ümloopbahn

Francisco lööpt in 266 Daag un 13 Stünnen eenmol üm den Uranus rüm un hett dorbi en middlern Afstand vun 4.267.000 km. De Bahn hett en Exzentrizität vun 0,1459 un wiekt dormit al düüdlich vun en Kringform af. Gegen den Äquater vun’n Uranus is de Bahn üm 45,220° kippt.

Opbo un Egenschoppen

De Maand hett en Dörmeter vun ruch weg 12 km. Sien middlere Dicht liggt bi 1,5 g/cm³. Dat ist düüdlich weniger as de Dicht vun de Eer, wat dorop henwiest, dat Francisco tomehrst ut Wateries besteiht. De Sworversnellen bedriggt an de Bavenflach ungefäähr 0,0025 m/s². Dat is man jüst 0,03% vun den Weert op de Eer. De dörsnittlich Temperatur an de Bavenflach liggt bi -184°C. De Albedo vun den Maand is mit 0,07 ok bannig lütt – blots 7% vun da infallende Sünnlicht warrt wedder afstrahlt, wat Francisco to en teemlich düsteren Himmelskörper maken deit.

Maanden vun den Planeten Uranus

Kiek ok na bi: List vun de Uranusmaanden