Ophelia (Maand)

Ophelia (ok: Uranus VII oder S/1986 U 8) betekent in de Astronomie en vun de lütten Maanden vun den Planeten Uranus. Ophelia is en vun de inneren Maanden, över den aver ok noch nich ganz veel künnig is. De Uranus-Maanden hebbt all Naams vun Figuren ut dat Wark von William Shakespeare oder Alexander Pope; Ophelia is en vun de Figuren ut Shakespeares Tragödie Hamlet, Prince of Denmark (dt.: „Hamlet, Prinz von Dänemark“).

Opdecken

De Maand is an’n 20. Januar 1986 vun den Astronomen Richard John Terrile op Biller vun de Ruumsond Voyager 2 opdeckt worrn. He hett toeerst de vörlöpig Beteken S/1986 U 8 kregen.

Ümlopbahn

Ophelia bruukt ungefähr 9 Stünnen för een Ümloop üm Uranus. Dorbi hett he en middler’n Afstand vun 53.764 km. De Maandbahn hett en ganz lütte Exzentrizität von 0,0101 un is dormit meist kreisrund. De Bahn is üm un bi 0,09° gegen den Äquater vun’n Uranus kippt. De Maand bewegt sik jüst so buten den ε-Ring vun den Planeten un övt mit sien Gravitatschoon Influss op de Pratikels in den Ring ut. Ophelia warrt dorüm as en Scheperhundmaand vun den ε-Ring ankeken.

Opbo

De Dörmeter vun den Maand liggt in’n Dörsnitt bi ungefähr 42 km. Mit 1,3 g/cm³ liggt de Dicht düütlich ünner de vun de Eer. De Wetenschopplers gaht dorvun ut, dat de Maand to’n gröttsten Deel ut Wateries besteiht. De Bavenflach vun Ophelia is teemlich düster mit en Albedo vun 0,07. Dat heet, dat 7 % vun dat Licht, dat op den Maand ankummt, wedder afstrahlt warrt – so as bi de meisten Maanden. An de Bavenflach warkt en Sworversnellen vun 0,0078 m/s². Dat is bannig wenig.

Maanden vun den Planeten Uranus

Kiek ok na bi: List vun de Uranusmaanden