Oberon (Maand)

Oberon (ok Uranus IV) is de butenste vun de groten Uranusmaanden un de tweetgröttste Maand vun den Planeten överhööft. Oberon weer an’n 11. Januar 1787 vun den düütsch-britschen Astronom Wilhelm Herschel opdeckt. As de anneren dree fröh opdeckten Uranusmaanden (Titania, Ariel, Umbriel) weer he vun sien Söhn John Herschel na Figuren vun William Shakespeare oder Alexander Pope nöömt. In dissen Fall weer de Maand na den Ülfenkönig Oberon nöömt ut Shakespeares A Midsummer Night’s Dream (dt.: Ein Sommernachtstraum).

Ümloopbahn

De Bahn vun Oberon hett en Exzentrizität vun ungefähr 0,0016 un is dormit nich veel anners as en Kreis. Gegen den Äquater vun’n Uranus is de Bahn üm ruchweg 0,7° kippt. Vun den Planeten hett de Maand en middleren Afstand vun 583.519 km. Üm eenmol üm em rümtolopen bruukt Oberon üm un bi 13 Daag un 11 Stünnen.

Opbo un physikaalsch Egenschoppen

Oberon hett en Dörmeter vun 1523 km un is dormit blots en lütt beten lütter as Titania. Bito sünd de beiden Maanden teemlich liek in de phasikaalschen Egenschoppen. Mit en middlere Dicht vun 1,63 g/cm³ is Oberon dorbi en beten lichter. De Albedo is 0,24 – 24% vun dat infallende Sünnlicht warrt wedder afstrahlt vun de Bavenflach. Ut disse Saken weer afleidt, dat Oberon to 50% ut Wateries], to 30% ut Silikatstenen un to 20% ut Kohlenstoff- un Stickstoffverbinnen besteiht.

De Temperatur an de Bavenflach liggt bi ungefähr -188°C. De Sworversnellen an de Bavenflach is mit 0,346 m/s² berekent worrn. Dat is ruchweg 4% vun de Sworversnellen op de Eer. De Maan roteert in 13 Daag un 11 Stünnen eenmol üm sien egen Ass un hett dormit also en bunnen Rotatschoon as de meisten Maanden.

Op Biller vun de Ruumsond Voyager 2 wiest sik de Bavenflach vun Oberon as veriest un överseiht mit Kraters, de woll al teemlich oolt wesen mutt un wenig geologsche Aktivität opwiest. Veele Kraters wiest binnen in an’n Bodden en Aflagern vun en düstere Substanz. Opstunns is nich bekannt, wat dat wesen mag.

Maanden vun den Planeten Uranus

Kiek ok na bi: List vun de Uranusmaanden