Mairie Swonewebel
De Mairie Swonewebel weer in de Franzosentied (1810 bet 1813) een von de veer Mairien, in de de Kanton Vesack indeelt weer. De Seet weer in Swonewebel. Se harr 1700 Inwahners.[1]
Historie ännern
De Ümgegend von Swonewebel hett vör de Franzosentied to de Gerichten Swonewebel, Leessem-Schönebeck un Hu’e, dat Amt Blomendal un den Bezirk Oosterstood von dat Amt Hagen in dat Hartogdom Bremen höört, wat in dat Kurförstendom Hannover leeg. Dat Kurförstendom Hannover weer in de Tied von de Koalitschoonskriege siet 1801 von Franzosen un Prüßen besett. To’n 1. März 1810 is dat Rebeed denn Deel von dat Königriek Westfalen worrn, wat en Satellitenstaat von Frankriek weer.
Binnen Westfalen weer de Mairie Swonewebel een von de teihn Mairien in’n Kanton Blomendal von’n Distrikt Bremervöör, Departement von de Elv- un Wersermünnen.[2] Man al to’n 1. Januar 1811 harr dat wedder en Enn. Dat Königriek Westfalen müss dat Departement direkt an dat Franzöösche Kaiserriek afgeven. De Mairie Swonewebel weer nu een von de veer Mairien in’n Kanton Vesack, Distrikt Bremerleh, Departement von de Wersermünnen. De Mairie weer nu düüdlich grötter, dor sünd Öörd in tohoopfaat worrn, de vörher in Westfalen to veer Mairien höört harrn: de Mairien Swonewebel, Blomendal un Beckdorp ut’n Kanton Blomendal un de Mairie Eggst ut’n Kanton Hu’e. Von de Mairie Blomendal is blots de Oort Bockhorn an de Mairie Swonewebel wesselt. De Rest is bi de Mairie Blomendal bleven. Von de Mairie Beckdorp sünd de Öörd Swankenforth, Löhnhorst, Wölpsche un Hünertshagen an de Mairie Swonewebel gahn, de Rest keem an de Mairie Blomendal.
1813/1814 hebbt de Russen de Franzosen slahn un dat Rebeed befreet. Dat Kurförstendom Hannover is denn wedder herstellt worrn un de ole Stand von vör 1810 wedder dor. Mit’n Wiener Kungress is 1815 ut dat Kurförstendom dat Königriek Hannover worrn.
Öörd ännern
Dor hebbt düsse Öörd tohöört:
- Kaiserriek Frankriek:[1]
- Swonewebel (706 Inwahners), Schukamp (20), Hamfähr (17), Lehmhorst (14), Hinnebeek (250), Bockhorn (56), Eggst (161), Löhnhorst mit Habichthorst, Brand un Korbeck (85), Wölpsche (19), Hünertshagen (52), Swankenforth (11), Brundörp (87), Heilshoorn, Lilkendey (202), Gösp (20)
Vondaag sünd düsse Öörd Deel von de Gemenen Swonewebel un Hu’e un de Städer Oosterholt-Scharmbeek un Bremen.
Footnoten ännern
- ↑ a b Albrecht Friedrich Ludolph Lasius: Der französische Kayser-Staat unter der Regierung des Kaysers Napoleon des Großen, im Jahre 1812, Band 1. Kißling 1813, Sied 106
- ↑ a b Bulletin des lois du Royaume de Westphalie. Königliche Bookdruckeree, Kassel 1810, Sied 14