Kanton Beers

De Kanton Beers weer as Kanton en Verwaltungsrebeed in dat Königriek Westfalen, dat blots von 1810 bet 1811 bestahn hett (Franzosentied). De Seet weer Beers.

Historie

De Ümgegend von Beers hett vör de Franzosentied to dat Amt Beers in dat Hartogdom Bremen höört, wat in dat Kurförstendom Hannover leeg. Dat Kurförstendom Hannover weer in de Tied von de Koalitschoonskriege siet 1801 von Franzosen un Prüßen besett. To’n 1. März 1810 is dat Rebeed denn Deel von dat Königriek Westfalen worrn, wat en Satellitenstaat von Frankriek weer.

Binnen Westfalen weer de Kanton Beers een von de 13 Kantons in’n Distrikt Bremervöör von dat Departement von de Elv- un Wersermünnen. Man al to’n 1. Januar 1811 harr dat wedder en Enn. Dat Königriek Westfalen müss dat Departement direkt an dat Franzöösche Kaiserriek afgeven. De Kanton Beers is opdeelt worrn op de Mairie Loomst in’n Kanton Bremervöör, Distrikt Stood, Departement von de Elvmünnen, un de Mairien Beers un Ringst in’n Kanton Beverst un de Mairie Niewohl in’n Kanton Dorum, Distrikt Bremerleh, Departement von de Wersermünnen.

In’n Harvst 1813 hebbt de Russen de Franzosen slahn un dat Rebeed befreet. Dat Kurförstendom Hannover is denn 1813/1814 wedder herstellt worrn un de ole Stand von vör 1810 wedder dor.

Mairien

De Kanton weer indeelt in acht Mairien:

• Mairie Beers: Beers, Holterborg
• Mairie Lintig: Lintig, Kanaalhütt, Ankloh, Falkenborg, Möhdiek, Meckelst, Grotenhain, Lüttenhain
• Mairie Köhlen: Köhlen, Hütt in’t Windbrakenholt, Olenkamp, Olenstöhlen
• Mairie Ringst: Ringst, Haxhoorn, Hainmöhlen, Wisswohl, Alfst
• Mairie Elm: Elm, Maschkamp, Neemöhlen, Kührst
• Mairie Niewohl: Niewohl, Krümpel, Wanhöden, Ludenhütt, Neemöhlen
• Mairie Flögeln: Flögeln, Fickmöhlen, Drangst
• Mairie Sievern: Sievern

Footnoten

Kantons in’n Distrikt Bremervöör (Königriek Westfalen, 1810–1811)

Beers | Beverst | Blomendal | Bremerleh | Bremervöör | Dorum | Hagen | Hanst | Hu’e | Leendaal | Oosterholt | Otterbarg | Stotel