Krooghörn
De Krooghörn (hoochdüütsch Krughörne) weer en Deel von dat Dörp Blomendol, dat vondaag to de Gemeen Burweg (Samtgemeen Olendörp-Himmelpoorten) in’n Landkreis Stood, Neddersassen, tohöört.
Geografie ännern
De Oort leeg in de Masch op dat rechte Över von de Oost.
De Öörd ümto weren Heckthusen in’n Noorden, Host in’n Noordoosten, Burweg un Bossel in’n Süüdoosten, Blomendol in’n Süden, Kronenborg in’n Süüdwesten, Klint in’n Westen un Koppel in’n Noordwesten.
Historie ännern
De Oost maakt twüschen Heckthusen un Kronenborg en Bagen. In düssen Bagen is al in dat Middelöller op en Wort en Kroog anleggt worrn, de ok mit en lüttje Fähr över de Oost verbunnen weer (Fähren an de Oost). De Kroog weer för Lüüd dor, de mit de Fähr över de Oost na Heckthusen översetten wullen, aver ok för Schippers op de Oost. In de Neegd hett dat en Tegelee geven.
In schreven Ünnerlagen kummt de Naam Krughörne 1715 toeerst vör, in en Verdrag twüschen Jürgen Hagenah un sien Söhn Jürgen Friedrich Hagenah, de in dat Staatsarchiv Stood liggt (ARL 11 Nr. 22).[1] Op Koorten dükert de Oort toeerst 1768 mit de Kurhannöversche Landsopnahm op.[2] Archäoloogsche Funnen reckt aver trügg bet in dat 15. Johrhunnert.[2]
De Kroog is an’t Enn von dat 19. Johrhunnert opgeven worrn. De genaue Tied is nich bekannt, aver 1874 hett de Kroog noch bestahn.[3] 1856 is de Schossee twüschen Stood un Cuxhoben (vondaag de Bundsstraat 73) trech worrn, de twüschen Burweg un Heckthusen mit en Fähr över de Oost güng. 1881 is tosätzlich de Nedderelvbahn von Horborg bet Cuxhoben trech worrn, de mit de Iesenbahnbrügg Heckthusen över de Oost güng. De Verkehr lööp nu över düsse Weeg un de Kroog weer to aflegen.
In de Johren 2010 is de Diek an de Oost twüschen Kronenborg un Burweg höger maakt worrn. Dorbi is de Bagen von de Oost, in den de Kroog leeg, utdiekt worrn. In dat utdiekte Rebeed is en Pütt anleggt worrn.
In’n August 2015 un in’n Oktober 2017 hett de Kreisarchäologie Stood tohoop mit Forschers von dat Institut för Ur- un Fröhgeschicht an de Universität Kiel de Steed ünnersöcht, an de fröher de Kroog stünn. Dorbi sünd en Reeg Funnen maakt worrn.
Inwahnertall ännern
| Johr | Inwahners |
|---|---|
| 1791[4] | 1 Füürsteed |
| 1824[5] | 1 Füürsteed |
| 1. Dezember 1885[6] | 42 Lüüd, 8 Hüüs |
Religion ännern
De Krooghörn weer evangeelsch-luthersch präägt un hett to dat Kaspel von de Petrus-Kark in Host höört.
Literatur ännern
- Donat Wehner: Schenke im Schlick. Die Ausgrabungen an der Krughörne bei Blumenthal im Landkreis Stade. In: Archäologie in Niedersachsen, Heft 20, 2017, Sied 81
Footnoten ännern
- ↑ Donat Wehner, Janna Kordowski: Das Gasthaus als Tor zur Welt. Archäologische Funde aus norddeutschen Schenken zurzeit des Aufbruchs in die Moderne (ca. 1780-1880). In: Mitteilungen der Deutschen Gesellschaft für Archäologie des Mittelalters und der Neuzeit, Heft 30, 2017, Sieden 151–162
- ↑ a b Angelika Franz: Rätsel um den Nordsee-Gasthof, Der Spiegel an’n 4. Januar 2016
- ↑ Thorsten Penz: Pfeifen, Münzen und Bierkrüge, Wochenblatt an’n 2. September 2015
- ↑ Christoph Barthold Scharf: Statistisch-Topographische Samlungen zur genaueren Kentnis aller das Churfürstenthum Braunschweig-Lüneburg ausmachenden Provinzen. Meier, Bremen 1791, Sied 132
- ↑ Curt Heinrich Conrad Friedrich Jansen: Statistisches Handbuch des Königreichs Hannover. Hannover 1824, Sied 344
- ↑ Gemeindelexikon für das Königreich Preußen. Auf Grund der Materialien der Volkszählung vom 1. Dezember 1885. Verlag des Königlichen statistischen Bureaus, Berlin 1888, Sied 150
Koordinaten:53° 38′ N, 9° 14′ O