Fähren an de Oost
Dat hett fröher en ganze Reeg Fähren an de Oost geven. Vondaag föhrt över de Oost blots noch de Fähren in Brobargen un in Gröpel.
De Oost mit ehre Fähren, Brüggen un de Sweevfähr is Deel von de Düütsche Fährstraat.
De Oost is bet an dat Wehr in Bremervöör en Tiedenstroom mit Ebb un Flood. In Bremervöör hett al siet 1746 en Brügg bestahn, aver von Bremervöör bet an de Münn von de Oost hett dat bet in dat 20. Johrhunnert keen Brüggen geven.
Dat hett lüttje Personenfähren geven, wat lüttje Kahns weren, de rodert oder wriggt worrn sünd, un gröttere Fähren, mit de ok Wagens över de Oost föhrt warrn kunnen. Düsse Wagenfähren weren Seilfähren. Dat heet, dat en Reep an beide Övers fastmaakt weer un op’n Grund von de Oost langsleeg. So kunnen de Scheep över dat Reep över weg föhren un de Fähr kunn an dat annere Över föhren, ahn wegtodrieven. De Fähren sünd an dat Reep per Hand na dat annere Över tagen worrn oder as Gierfähr. In dat 20. Johrhunnert sünd vele Fähren ok mit en Motoor utrüst worrn.
1935 anfungen in Heckthusen, 1974 in Oosten 1977 in Öberndörp un toletzt 1988 in Geversdörp sünd Brüggen boot worrn, dör de de Fähren denn jümmer weniger bruukt worrn sünd.
Neehuus
ännernTwüschen Neehüserdiek bi Neehuus un Neenhoff hett dat en lüttje Bootsfähr geven. As in de Johren 1960 dat Oostsparrwark boot worrn is, is düsse Afsnidd von de Oost mit Dämm afslaten worrn. De Steed, an de de Fähr föhrt is, liggt vondaag an’n Ostesee, dor wo nu de Basisstatschoon von de Waterski-Anlaag is.
Dingwöörden
ännernDe Fähr in Dingwöörden weer en Prahmfähr, de vör allen bruukt worrn is, üm Veh in dat Geversdörper Butendieksland op dat rechte Över to bringen. De Fähr leeg an kene groten Straten, Dörgangsverkehr hett dat dorüm nich veel geven.
De Fähr is bi en Stormflood afsapen un dorüm hett Dingwöörden 1937 en ne’e Fähr kregen.
Geversdörp
ännernDe Fähr Geversdörp kummt 1423 as nyge vere toeerst in de Oorkunnen vör un is bet 1988 föhrt, as de Oostbrügg Geversdörp trech worrn is.
Öberndörp
ännernDe Fähr in Öberndörp is in dat 17. Johrhunnert toeerst nawiest. Bet 1838 weer dat Fährrecht in Besitt von de Kark in Otterbarg un is denn in Privatbesitt övergahn. 1977 is de Fähr instellt worrn, as de Oostbrügg Öberndörp trech worrn is. De letzte Prahm, en Seilfähr, de dor föhrt is, weer von 1911. De Fähr is op de Schippswarft Schwieger in Achthöben boot worrn un hett 5800 Goldmark köst.
De Fähr is ok Karkenfähr nöömt worrn, von wegen, dat dat Kaspel Öberndörp op beide Sieden von de Oost leeg un Karkenbesökers un Liekentöög von dat rechte Över jümmer över de Fähr müssen.
Ohrensfluchterdiek
ännernDe Fähr twüschen Ohrensfluchterdiek un Nedderstrekerdiek weer en lüttje Bootsfähr.
Swartenhütten
ännernVon Swartenhütten bi Hemmoor güng en Kahnfähr röver na Achthöbenerdiek.
Oosten
ännern
De Fähr in Oosten hett den Oort mit dat Dörp Basbeek verbunnen un is bet 1909 föhrt. In dat Johr is de Sweevfähr Oosten trech worrn, de nu den Verkehr mit Basbeek övernehmen dee. De Sweevfähr sülvs is bet 1974 lopen, as denn de Oostbrügg Oosten trech worrn is.
Hermann Boßdorf sien Book De Fährkrog speelt in’n Fährkroog von Oosten. Boßdorf weer twüschen 1896 un 1917 bi de Post in Basbeek anstellt.
Sethlerhemm
ännernDe Fähr in Sethlerhemm weer en Wagenfähr. 1945 hett Sethlerhemm den Prahm ut Geversdörp övernahmen, de dor denn bet 1961 lopen is. In dat Johr is de Fährverkehr instellt worrn. De Fähr is denn as Reserveprahm na Geversdörp kamen.
En twete Fähr in Sethlerhemm hett dat in’n Noorden geven. Dat weer blots en lüttje Kahnfähr, de na’n Oostener Oortsdeel Oostdiek röverföhrt is.
Grootweurn
ännernDe Fähr in Grootweurn weer en lüttje Bootsfähr.
Lüttwöhrn
ännernIn Lüttwöhrn weer en Prahm un en lüttje Bootsfähr.
Heckthusen
ännernDe Fähr in Heckthusen geiht trügg op en Schippbrügg, de de Sweden 1659 ut 14 Evers boot hebbt. De Brügg hett blots för korte Tied bestahn. Na disse Tied hett dat an de Steed aver en Fähr geven. Disse Fähr hett bet 1935 bestahn. In dat Johr is de hüdige Brügg över de Oost (Deel von de B 73) boot worrn.
De ene Prahm, de bet 1935 in Heckthusen föhrt is, is 1938 na Schönau verköfft worrn. De twete keem na Geversdörp.
Blomendol
ännern53° 38′ N, 9° 14′ O In Blomendol hett dat an de Krooghörn en Kroog un en Fähr geven. Kroog un Fähr sünd an dat Enn von dat 19. Johrhunnert ingahn.
Kronenborg
ännernDat hüdige Dörp Kronenborg op dat rechte Över is as Borg von de Familie Marschalck von Bachtenbrock anleggt worrn. De Familie harr ok Besitt op dat linke Över von de Oost in Heckthusen un Klint. Twüschen den Damm in Kronenborg un den Geesthoff in Klint hett dat in dat 16./17. Johrhunnert en Togbrügg geven, de aver 1628 in’n Dörtigjohrigen Krieg von Tilly sien Truppen afbrennt worrn is. Na disse Tied hett dat denn en Prahmfähr geven. De Fähr is ok von Karkengängers un Kumfermanden bruukt worrn, denn dat Dörp Kronenborg hett bet 1926 to dat Kaspel Heckthusen höört.
Lohmöhlen
ännernDe Fähr in Lohmöhlen weer en lüttje Bootsfähr.
Brobargen
ännern
De Fähr Brobargen verbinnt den Höben (dat fröhere Good Brobargen) op dat linke Över mit dat Dörp Brobargen op dat rechte Över. Dat Good Brobargen is üm 1280 rüm anleggt worrn. In dat 16. un 17. Johrhunnert hett in Brobargen en Togbrügg bestahn, de 1628 in’n Dörtigjohrigen Krieg von Tilly afbrennt worrn is. Na disse Tied hett dat dor denn en Fähr geven. As üm 1840 rüm de Buurn von Brobargen dat Good Brobargen köfft hebbt, hett en Realverband den Bedriev von de Fähr övernahmen. Siet 2007 bedrifft de Fähr- un Geschichtsvereen Brobargen de Fähr.
De hüdige Fähr is 1973 ut Geversdörp köfft worrn.
Gröpel
ännern
De Fähr Gröpel verbinnt dat Dörp Gröpel op dat rechte Över mit de Gröpeler Wischen op dat linke Över. De Buurn in Gröpel hebbt üm 1600 rüm anfungen, de Wischen op dat annere Över von de Oost to bewirtschaften. Dat harr hier en Foor geven, dör de een to Foot dör de Oost kamen kunn. Later hett dat en Flott geven. Eerst üm 1910 hebbt de Buurn en Intressengemeenschop grünnt un en Prahm köfft.
Tosätzlich warrt noch von’n Hoff Schönau bi Gröpel en rein private Prahmfähr bedreven, de blots bruukt warrt, üm mit Veh un Fohrtüüg na de Wischen op dat annere Över to kamen. De Prahm in Schönau is fröher in Heckthusen föhrt un 1938 na Schönau kamen.
Huud
ännernDe Fähr in Huud weer en lüttje Bootsfähr.
Neer-Ochenhusen
ännernDe Fähr twüschen Neer-Ochenhusen un Beeß weer en lüttje Bootsfähr.
Öölm
ännernIn Öölm hett dat twee lüttje Kahnfähren geven, de aver all beid blots von de Anwahners bruukt worrn sünd, üm na de Wischen op dat annere Över bi Neer-Ochenhusen un Möhlheim to kamen.
