Lüttwöhrn

Lüttwöhrn (hoochdüütsch Kleinwörden) is en Dörp in de Gemeen Heckthusen, Samtgemeen Hemmoor, in’n Landkreis Cuxhoben, Neddersassen.

Wapen/Flagg	Koort
Basisdaten
Bundsland: Neddersassen Landkreis: Cuxhoben Samtgemeen: Hemmoor Gemeen: Heckthusen
Inwahners:
Postleettall:	21755
Vörwahl:	04774
Geograafsche Laag:	53° 40′ N, 9° 15′ O
Laag von Lüttwöhrn in de Gemeen Heckthusen (Koort lett sik anklicken)

Geografie

Dat Dörp liggt in de Masch an de Oost. In’n Noordwesten von Lüttwöhrn münnt de Ihlbeker Kanaal in de Oost.

De Naveröörd sünd Grootweurn in’n Noorden, Neeland in’n Oosten, Host in’n Süüdoosten (all dree op de anner Sied Oost in’n Landkreis Stood), Wisch in’n Süden un Heckthusen in’n Süüdwesten.

Historie

Toeerst in de Oorkunnen kummt de Oort 1346 vör.

Bi de Stormflood in’n Januar 1661, bi de Katharinenflood an’n 25. November 1685, bi de Flood an’n 28. April 1686 un bi de Flood an’n 22. Oktober 1874 sünd bi Lüttwöhren de Dieken braken.

En Windmöhl in Lüttwöhrn, de de Familie Marschalck von Bachtenbrock tohören dee, kummt 1637 toeerst in de Oorkunnen vör. Dat weer dormaals en Buckmöhl. De hüdige Hollanner-Windmöhl is 1845 boot worrn un hett bet 1955 lopen. Vondaag hett de Möhl keen Windrad mehr un warrt as Feernhuus bruukt.

Verwaltungsgeschicht

De Oort hett vör 1850 to dat Gericht Heckthusen höört. 1850 is dat denn Deel von dat Amt Himmelpoorten worrn, dor aver man twee Johr bleven un is 1852 an dat Amt Oosten kamen. 1885 is dat Amt Oosten in’n Kreis Neehuus opgahn. 1932 is de Oort an’n Landkreis Land Hadeln kamen un 1977 Deel von’n Landkreis Cuxhoben worrn.

1962 is de Oord mit de Dörper Bornbarg, Heckthusen, Klint, Lohmöhlen un Wisch to de Samtgemeen an de Oost tohoopleggt worrn, de denn an’n 1. Juli 1972 sülvs to en Gemeen un Deel von de Samtgemeen Hemmoor worrn is.

Inwahnertall

Johr	Inwahners
1848-00-001848	385 Lüüd, 69 Hüüs
1910-12-011. Dezember 1910	319
1925-00-001925	261
1933-00-001933	233
1939-00-001939	217

Religion

Lüttwöhrn is evangeelsch-luthersch präägt un höört to dat Kaspel Heckthusen.

För de Kathoolschen is de St.-Nikolaus-Kapell in Heckthusen tostännig, de siet 1. September 2010 to de Karkengemeen Hillig Geist in Stood tohöört.

Wapen

Dat Wapen wiest en sülvern Huusgevel över en gröne Woort in’n Schildfoot un en sülvern Wellenlien, de för de Oost steiht.

Kultur

Verenen

Lüttwöhrn hett en Schüttenvereen, de 1928 grünnt worrn is, un fiert sien Schüttenfest jümmer an’nt veerte Wekenenn in’n Mai.

Weertschop un Infrastruktur

As freewillige Füürwehr is de Füürwehr Heckthusen för Lüttwöhrn mit tostännig.

Verkehr

Na Noorden un Oosten is de Oord dör de Oost von’n Verkehr sperrt. Lüttjere Straten loopt na Süden över Wisch in Heckthusen an de Bundsstraat 73, in’n Westen över de Wriethstraat na Bornbarg ok an de Bundsstraat 73 ran un in’n Noordwesten an’n Oostendiek langs na Sethlerhemm un in Basbeek ok wedder an de B 73.

De nächste Autobahn is de Autobahn 26 (Afsnidd Stood–Hamborg). De Opfohrt 2 Stood-Süüd liggt so 24 Kilometer in’n Süüdoosten von Lüttwöhrn.

De nächste Bahnhoff is so bi veer Kilometer wied weg in’n Süden de Bahnhoff Heckthusen an de Nedderelvbahn.

Weertschop

Lüttwöhrn is vondaag vör allen von de Bueree präägt. Fröher hett dat an de Oost ok Tegeleen geven, de ut de Kleieerd Tegels brennt hebbt. 1800 sünd dat in Lüttwöhrn veer Stück wesen.

Scholen

De Schölers ut Lüttwöhrn gaht na de Grundschool Heckthusen. Later köönt se op de Oberschool Loomst wesseln oder alternativ op de Haupt- un Realschool Hemmoor. As Gymnasium is dat Gymnasium Warstood för den Oort tostännig.

Literatur

• 650 Jahre Kleinwörden: 1346–1996. 1997

Weblenken

Lüttwöhrn. Mehr Biller, Videos oder Audiodateien to’t Thema gifft dat bi Wikimedia Commons.