MacGuffin

MacGuffin is en Begreep ut dat Filmgewarf, de inst vun Alfred Hitchcock prägt worrn is. De Begreep steiht för Objekten oder Personen, de in en Speelfilm dorför dor sünd, de Geschicht vorantobringen oder överhaupt eerst uttolösen, ahn dat em oder ehr dorbi sülvst en grote Bedüden tokummt. Blangen den klass’schen Whodunit is de MacGuffin sünners in Kriminalfilmen un Thrillers en verbreedt Middel, üm de Spannung över den helen Film weg oprecht to hollen.

En tyypschen MacGuffin künn to’n Bispeel en Dokument mit en geheeme Formel oder Informatschonen, de en wichtige Person blotstellen künnen, wesen, dat in de Hannen vun en Minschen kummt, de an sik gor nix mit den Fall to doon hett. Jüst so kann dat en Tasch mit de Büüt vun en Bankroof wesen. För den Verloop vun’n Film is dat opletzt egal, wat in de Tasch is, oder wat op dat Dokument steiht. De Afloop dreiht sik veel mehr üm de Jager-Büüt-Konstellatschoon, de dör den Wessel vun’n Besitter tostanen kummt und de dormit verbunnen spannenden Situatschonen vun Verfolgen un Weglopen. De Tokieker sleiht sik dorbi op de Siet vun’n Jager oder vun den, de jaagt warrt.

Wat en MacGuffin is, hett Hitchcock 1939 bi en Reed an de Columbia-Universität mit de nafolgen Geschicht verkloort, wo egal dat is, wat nipp un nau de MacGuffin in en Geschicht is:
„Dat künn en schottischen Naam wesen ut en Geschicht över twee Mannslüüd, de mit de Iesenbahn föhrt. De een fraagt: ‚Wat is dat för’n Paket in de Aflaag?‘
‚Jo nu‘, antert de annere, ‚dat is en MacGuffin.‘
‚Wat is denn en MacGuffin?‘
‚En MacGuffin is en Apparat, mit den man in’t schottsche Hoochland Löwen fangen kann.‘
‚Dat gifft aver doch gor keen Löwen in’t schottsche Hoochland!‘
‚Na, denn is dat woll ok keen MacGuffin‘.
Kiek woll, en MacGuffin is rein gor nix.“

Slavoj Žižek hett den Ring in Richard Wagner sien Der Ring des Nibelungen as den „gröttsten MacGuffin vun all Tieten“ betekent un as Bispeel för dat so nöömte Objekt lütt a in de Theorioe vun de Psychoanalyys na Jacques Lacan.

Bispelen

Bispelen ut de Filmen vun Hitchcock

de Melodie in The Lady Vanishes
de „Formel för den Weltfreden“ in Torn Curtain
de „39 Stopen“ in The 39 Steps, över de man bit kort för’t Enn vun’n Film nix wies warrt.
de „Regerensgeheemnissen“ in North by Northwest
de Inholt vun de Wienbuddels in Notorious
de 40.000 Dollar in Psycho
de Mikrofilm in Topaz

Bispelen ut annere Filmen

de Transit-Visa in Casablanca
de klaute Kuffer in Kiss Me Deadly
der Kuffer in Pulp Fiction. All, de rinkiekt sünd aflenkt, aver to Tokieker warrt nich wies, wat dor nu binnen is.
de Teppich in The Big Lebowski
de mysteriöse Inholt vun’n Kufferruum vun’n Chevrolet Malibu in Repoman
die Rode Materie in Star Trek, 2009
de „C4“ in Knight and Day, 2010

Literatur

Mike Digou: Hitchcock’s MacGuffin in the Works of David Mamet. In: Literature - film quarterly (LFQ). 31/4 (2003), 270–275.
Anton Fuxjäger: Der MacGuffin: Nichts oder doch nicht? Definition und dramaturgische Aspekte eines von Alfred Hitchcock angedeuteten Begriffs. In: Maske und Kothurn 52/2 (2006), 123-154.
François Truffaut: Mr. Hitchcock, wie haben Sie das gemacht?. Heyne, 2003. ISBN 3-453-86141-8

Weblenken

MacGuffin-Websteed (engelsch)