Mairie Blomendal
De Mairie Blomendal weer in de Franzosentied (1810 bet 1813) een von de veer Mairien, in de de Kanton Vesack indeelt weer. De Seet weer in Blomendal. Se harr 3201 Inwahners.[1]
Historie
ännernDe Ümgegend von Blomendal hett vör de Franzosentied to dat Amt Blomendal in dat Hartogdom Bremen höört, wat in dat Kurförstendom Hannover leeg. Dat Kurförstendom Hannover weer in de Tied von de Koalitschoonskriege siet 1801 von Franzosen un Prüßen besett. To’n 1. März 1810 is dat Rebeed denn Deel von dat Königriek Westfalen worrn, wat en Satellitenstaat von Frankriek weer.
Binnen Westfalen weer de Mairie Blomendal een von de teihn Mairien in’n Kanton Blomendal von’n Distrikt Bremervöör, Departement von de Elv- un Wersermünnen.[2] Man al to’n 1. Januar 1811 harr dat wedder en Enn. Dat Königriek Westfalen müss dat Departement direkt an dat Franzöösche Kaiserriek afgeven. De Mairie Blomendal weer nu een von de veer Mairien in’n Kanton Vesack, Distrikt Bremerleh, Departement von de Wersermünnen. De Mairie weer nu düüdlich grötter, dor sünd Öörd in tohoopfaat worrn, de vörher in Westfalen to de söven Mairien Blomendal, Beckdorp, Rönnebeck, Aumund, Rekum, Ne’enkarken un Rade (all söven in’n Kanton Blomendal) höört harrn. Den Oort Bockhorn, de in Westfalen to de Mairie Blomendal höört harr, hett de Mairie ünner de Franzosen an de Mairie Swonewebel afgeven müsst. Von de Mairie Beckdorp sünd de Öörd Beckdorp un Hammersbeek an de Mairie Blomendal gahn, de Rest keem an de Mairie Swonewebel. Von de Mairie Aumund keem de Oort Lobbendörp, de Rest güng an de Mairie Vesack.
1813/1814 hebbt de Russen de Franzosen slahn un dat Rebeed befreet. Dat Kurförstendom Hannover is denn wedder herstellt worrn un de ole Stand von vör 1810 wedder dor. Mit’n Wiener Kungress is 1815 ut dat Kurförstendom dat Königriek Hannover worrn.
Öörd
ännernDor hebbt düsse Öörd tohöört:
- Kaiserriek Frankriek:[1]
- Blomendal (240 Inwahners), Lüssum (245), Beckdorp (69), Lobbendörp (25), Rönnebeck (480), Fleet (327), Farge (195), Hammersbeek (120), Ne’enkarken (345), Vörbrook (303), Rade (328), Rekum (484), Stell, Stellerbrook (30), Witteborg (10)
Vondaag sünd düsse Öörd Deel von de Gemeen Swonewebel un de Stadt Bremen.
Footnoten
ännern- ↑ a b Albrecht Friedrich Ludolph Lasius: Der französische Kayser-Staat unter der Regierung des Kaysers Napoleon des Großen, im Jahre 1812, Band 1. Kißling 1813, Sied 106
- ↑ a b Bulletin des lois du Royaume de Westphalie. Königliche Bookdruckeree, Kassel 1810, Sied 14