Mairie Deesdorp

De Mairie Deesdorp weer in de Franzosentied (1811 bet 1813) een von de fiev Mairien, in de de Kanton Bremerleh indeelt weer. De Seet weer in Deesdorp. Se harr 2075 Inwahners.

Historie

De Ümgegend von Deesdorp hett vör de Franzosentied to de Vaagdie Landwörden in dat Hertogdom Ollnborg höört. Blots lüttjere Delen hebbt to de Böörd Braamst un den Bezirk Oosterstood von dat Amt Hagen (Hartogdom Bremen) höört, wat in dat Kurförstendom Hannover leeg. Dat Kurförstendom Hannover weer in de Tied von de Koalitschoonskriege siet 1801 von Franzosen un Prüßen besett. To’n 1. März 1810 is dat hannöversche Rebeed denn Deel von dat Königriek Westfalen worrn, wat en Satellitenstaat von Frankriek weer. Ollnborg weer en Tiedlang ok von frömme Truppen besett, kunn toeerst aver noch egenstännig blieven. 1808 is dat Land den Rhienbund bipeddt. Aver ok dat hett nix hulpen.

In’n Dezember 1810 hett Frankriek Ollnborg annekteert un ok dat Königriek Westfalen müss Delen von sien Rebeed direkt an Frankriek afgeven. To’n 1. Januar 1811 is de Mairie Deesdorp as een von de fiev Mairien in’n Kanton Bremerleh, Distrikt Bremerleh, Departement von de Wersermünnen nee schapen worrn. De Mairie is tosätzlich dör enkelte Öörd vergröttert worrn, de vörher in Westfalen legen un dor to annere Mairien höört hebbt: dat weren de Mairien Wittst un Neenlann (all beid in’n Kanton Stotel, Distrikt Bremervöör, Departement von de Elv- un Wersermünnen). De Mairie Neenlann is kumplett an de Mairie Deesdorp gahn. Von de Mairie Wittst is blots de Oort Swegen in de Mairie Deesdorp wesselt. De Rest is op de Mairien Dammhagen un Stotel opdeelt worrn.

1813/1814 hebbt de Russen de Franzosen slahn un dat Rebeed befreet. Dat Hertogdom Ollnborg un dat Kurförstendom Hannover sünd denn wedder herstellt worrn un de ole Stand von vör 1810 wedder dor. Mit’n Wiener Kungress is 1815 ut dat Hertogdom dat Groothertogdom Ollnborg worrn un ut dat Kurförstendom dat Königriek Hannover.

Öörd

Dor hebbt düsse Öörd tohöört:

• Kaiserriek Frankriek:

  Deesdorp (184 Inwahners), Üterlann (241), Overwarf (232), Wiemsdörp (311), Olendörp (37), Maihusen (91), Indiek (41), Swingenborg (39), Swingenfeld (32), Eidewarden (225), Neenlann (294), Swegen (49), Reepen (81), Neenlannermoor (17), Büttel (174), Bütteler Siel (27)

Vondaag sünd düsse Öörd all Deel von de Gemeen Lox.