Büttel (Landkreis Cuxhoben)
Büttel (hoochdüütsch Büttel) is en lütten Oort in de Gemeen Lox in’n Landkreis Cuxhoben, Neddersassen. Binnen de Gemeen billt de Oort en polietsche Oortschop.
| Wapen/Flagg | Koort | |
|---|---|---|
|
|
| |
| Basisdaten | ||
| Flach: | 3,64 km² | |
| Inwahners: | 257 (31. Dezember 2016) | |
| Inwahnerdicht: | 70,6 Inwahners pro km² | |
| Hööchd: | 1 m över NHN | |
| Postleettall: | 27612 | |
| Vörwahl: | 04740 | |
| Geograafsche Laag: | Koordinaten:53° 26′ N, 8° 33′ O53° 26′ N, 8° 33′ O | |
 | ||
|
| ||
To Büttel höört ok de lüttjeren Öörd Büttelersiel, Indiek, Swingenborg un Swingenfeld mit to.
Geografie
ännernDe Oort liggt in de Masch von Oosterstood an de Werser un an dat Noordöver von de Luun.
De Naveröörd sünd Maihusen in’n Noorden, Fleest, Stotel un Speckje in’n Noordoosten, Holt in’n Oosten, Swingenborg un Swegen in’n Süüdoosten, Neenlann in’n Süden, Neenlannersiel in’n Süüdwesten, Büttelersiel un Indiek in’n Westen un Olendörp, Deesdorp un Wiemsdörp in’n Noordwesten.
Historie
ännernBüttel kummt 1105 toeerst in en Oorkunn von’n Bremer Arzbischop Friedrich I. vör. De Oort höört to de -büttel-Öörd.
Dat Dörp weer von öllers in twee Delen deelt. De ene Deel weer en egen Kaspel in dat Arzstift Bremen (later Kurförstendom Hannover un Königriek Hannover) un de annere Deel hett to de Graafschop Ollnborg (later Hartogdom Ollnborg un Groothartogdom Ollnborg) un dor to dat Kaspel Deesdorp tohöört. De ollnbörgsche Deel is fakener ok Buttel nöömt worrn. De Grenz twüschen de beiden Delen weer de hüdige Werserstraat. De lüttjen Öörd Büttelersiel, Indiek, Swingenborg un Swingenfeld hebbt all in’n ollnbörgschen Deel legen.
An dat Över von de Luun liggt de Oort eerst siet dat 20. Johrhunnert. Fröher is dat Water över dat Bütteler Sieldeep na de Werser afflaten un deelwies ok na de Drept. Eerst mit’n Havenutbo in Bremerhoben hett de Luun denn ehr ne’e Münn kregen, de ehr an Büttel langsföhrt.
Verwaltungsgeschicht
ännernIn de Franzosentied hett de Oort toeerst 1810 bet 1811 binnen dat Königriek Westfalen to de Mairie Neenlann in’n Kanton Stotel höört un denn von 1811 bet 1814 to dat Franzöösche Kaiserriek ünner Napoleon un dor to de Mairie Deesdorp in’n Kanton Bremerleh.
Dat hannöversche Büttel hett vör 1885 to dat Amt Hagen tohöört un leeg dor in’n Bezirk von de Oosterstoder Masch. Na 1885 weer dat in’n Kreis Geestmünn. 1932 is dat Deel von’n Kreis Wersermünn worrn un 1977 von’n Landkreis Cuxhoben.
De ollnbörgsche Deel leeg fröher in dat Amt Landwörden, dat 1879 an dat Amt Braak kamen is. Ut dat Amt Braak is 1933 dat Amt Wersermasch worrn, dat 1939 in’n Landkreis Wersermasch ümwannelt worrn is.
De hannöversche Deel weer fröher en egenstännige Gemeen. De ollnbörgsche Deel hett to de Gemeen Landwörden höört. Mit de Gemeenreform in Neddersassen an’n 1. März 1974 sünd de Gemeen Büttel un de Gemeen Landwörden all beid Deel von de Gemeen Lox worrn. Sietdem billt Büttel binnen de Gemeen Lox en Oortschop mit egen Oortsvörsteiher.
Inwahnertall
ännernHannöverschen Deel:
| Johr | Inwahners |
|---|---|
| 1791[1] | 17 Füürsteden |
| 1812[2] | 174 |
| 1824[3] | 17 Füürsteden |
| 1848[4] | 38 Lüüd, 13 Hüüs |
| 1. Dezember 1871[5] | 62 Lüüd, 13 Hüüs |
| 1. Dezember 1885[6] | 74 Lüüd, 13 Hüüs |
| 1. Dezember 1905[7] | 58 Lüüd, 14 Hüüs |
| 1. Dezember 1910[8] | 85 |
| 1925[9] | 92 |
| 1933[9] | 74 |
| 1939[9] | 78 |
Religion
ännernDe Deel von Büttel noorden de Werserstraat is evangeelsch-luthersch präägt un billt mit de Marienkark en egen Kaspel. De annere Deel süden de Werserstraat höört to dat Kaspel von de Laurentius-Kark in Deesdorp.
För de Kathoolschen is de Hillig-Hart-Jesu-Kark in Geestmünn tostännig.
Wapen
ännernDat Wapen von Büttel wiest op roden Grund över en gollen Dreebarg in’n Schildfoot dree sülvern Duven.
De Dreebarg steiht för de Laag op Worten un de Duven staht för de Saag von Hake Betken. Nadem Hake Betken von Rövers överfullen worrn is, röppt he en Duvenswarm to Hülp. As een von de Rövers later en Duvenswarm ansichtig warrt, verraadt he sik sülvs.
Dat Wapen hett de Heraldiker Gustav Völker utklamüsert.
Oortsvörsteihers
ännern- opstunns: Lars Behrje
Kultur
ännernVerenen
ännernSport warrt in’n TSV Büttel-Neenlann von 1862 dreven.
Weertschop un Infrastruktur
ännernBüttel hett tohoop mit Neenlann en egene freewillige Füürwehr.
Verkehr
ännernDör Büttel löppt de Kreisstraat 50, de in’n Noordwesten to de Landsstraat 121 warrt un na Deesdorp föhrt. Twüschen Büttel un Deesdorp is de K 50/L 121 anbunnen an de Bundsstraat 437, de in’n Westen dör den Wersertunnel na Stadland löppt un in’n Oosten na Stotel. In’n Süden geiht de K 50 na Neenlann, Rechtenfleth un Saans. Von de K 50 geiht na Süüdoosten de K 54 af, de över Swegen un Neenlannermoor an de L 135 ran föhrt. In Swingenborg geiht von de K 54 wedder de K 55 af un löppt över Holt un Speckje na de B 437 un Stotel.
De nächste Autobahn is de Autobahn 27 (Afsnidd Bremen–Bremerhoben). De Opfohrt 11 Stotel liggt so veer Kilometer in’n Noordoosten von Büttel an de B 437.
De nächste Bahnhoff is so bi 13 Kilometer wied weg in’n Noordoosten de Bahnhoff Lox an de Bahnlien Bremen–Bremerhoben. Von 1911 bet 1931 hett dat ok op de Nedderwerserbahn Personenverkehr geven. In düsse Tied harr Büttel en egen Bahnhoff.
Footnoten
ännern- ↑ Christoph Barthold Scharf: Statistisch-Topographische Samlungen zur genaueren Kentnis aller das Churfürstenthum Braunschweig-Lüneburg ausmachenden Provinzen. Meier, Bremen 1791, Sied 42
- ↑ Albrecht Friedrich Ludolph Lasius: Der französische Kayser-Staat unter der Regierung des Kaysers Napoleon des Großen, im Jahre 1812, Band 1. Kißling, Ossenbrügge 1813, Sied 102
- ↑ Curt Heinrich Conrad Friedrich Jansen: Statistisches Handbuch des Königreichs Hannover. Hannover 1824, Sied 100
- ↑ Friedrich Wilhelm Harseim, Carl Schlüter: Statistisches Handbuch für das Königreich Hannover. Schlütersche Hoffbookdruckeree, Hannover 1848, Sied 133
- ↑ Die Gemeinden und Gutsbezirke des Preussischen Staates und ihre Bevölkerung. Berlin 1873, Sied 154
- ↑ Gemeindelexikon für das Königreich Preußen. Auf Grund der Materialien der Volkszählung vom 1. Dezember 1885. Verlag des Königlichen statistischen Bureaus, Berlin 1888, Sied 162
- ↑ Gemeindelexikon für das Königreich Preußen. Auf Grund der Materialien der Volkszählung vom 1. Dezember 1905. Verlag des Königlichen statistischen Landesamtes, Berlin 1908, Sied 50
- ↑ Inwahnertallen op gemeindeverzeichnis.de
- ↑ a b c Inwahnertallen op verwaltungsgeschichte.de
Weblenken
ännern- Websteed över dat Dörp (hoochdüütsch)
Büttel (Landkreis Cuxhoben). Mehr Biller, Videos oder Audiodateien to’t Thema gifft dat bi Wikimedia Commons.
