Mairie Groot Zittens
De Mairie Groot Zittens weer in de Franzosentied (1810 bet 1813) een von de veer Mairien, in de de Kanton Zeven indeelt weer. De Seet weer in Groot Zittens. Se harr 2584 Inwahners.[1]
Historie ännern
De Ümgegend von Groot Zittens hett vör de Franzosentied to de Böörden Zittens un Elsdörp von dat Amt Zeven un to de Amtsvaagdie Scheeßl von dat Amt Rodenborg in dat Hartogdom Bremen höört, wat in dat Kurförstendom Hannover leeg. Dat Kurförstendom Hannover weer in de Tied von de Koalitschoonskriege siet 1801 von Franzosen un Prüßen besett. To’n 1. März 1810 is dat Rebeed denn Deel von dat Königriek Westfalen worrn, wat en Satellitenstaat von Frankriek weer.
Binnen Westfalen weer de Mairie Groot Zittens een von de negen Mairien in’n Kanton Zeven von’n Distrikt Stood, Departement von de Elv- un Wersermünnen.[2] Man al to’n 1. Januar 1811 harr dat wedder en Enn. Dat Königriek Westfalen müss dat Departement direkt an dat Franzöösche Kaiserriek afgeven. De Mairie Groot Zittens weer nu een von de veer Mairien in’n Kanton Zeven, Distrikt Stood, Departement von de Elvmünnen. De Mairie weer nu düüdlich grötter, dor sünd Öörd in tohoopfaat worrn, de vörher in Westfalen to de veer Mairien Groot Zittens, Stemmen, Groot Meckels un Vierden (all veer in’n Kanton Zeven) höört harrn.
1813/1814 hebbt de Russen de Franzosen slahn un dat Rebeed befreet. Dat Kurförstendom Hannover is denn wedder herstellt worrn un de ole Stand von vör 1810 wedder dor. Mit’n Wiener Kungress is 1815 ut dat Kurförstendom dat Königriek Hannover worrn.
Öörd ännern
Dor hebbt düsse Öörd tohöört:
- Königriek Westfalen:[2]
- Kaiserriek Frankriek:[1]
- Groot Zittens, Lütt Zittens, Kön’hoff, Kalf, Tiss, Borgzittens, Homersen, Hanschhorst (836 Inwahners)
- Stemmen, Helsch, Rehr, Griemshoop, Hunhorn, Sootel, Westeresch, Wenkeloh, Appel (578 Inwahners)
- Groot Meckels, Lütt Meckels, Kohmöhlen, Nüddel, Maschhorst, Alpershusen, Freyersen, Volkens[Notiz 1], Rüspel, Nindörp (598 Inwahners)
- Vierden, Freetz, Groot Woonst, Lütt Woonst, Groot Ippens, Lütt Ippens, Ramshuus, Lengenbossel (572 Inwahners)
Vondaag sünd düsse Öörd Deel von de Samtgemenen Zittens, Fintel un Zeven un de Gemeen Scheeßl.
Footnoten ännern
- ↑ a b Albrecht Friedrich Ludolph Lasius: Der französische Kayser-Staat unter der Regierung des Kaysers Napoleon des Großen, im Jahre 1812, Band 1. Kißling 1813, Sied 69
- ↑ a b Bulletin des lois du Royaume de Westphalie. Königliche Bookdruckeree, Kassel 1810, Sied 11
Notizen ännern
- ↑ In dat Bulletin des lois du Royaume de Westphalie steiht an düsse Steed Stockensen, aver so en Oort gifft dat nich. Volkens dükert in dat Book nich op un passt an düsse Steed von de Geografie her rin.