Maurismaur

Maurismaur (hoochdüütsch Moorausmoor) is en Dörp in de Gemeen Stinst, Samtgemeen Loomst in’n Landkreis Cuxhoben, Neddersassen.

Wapen/Flagg	Koort
Basisdaten
Bundsland: Neddersassen Landkreis: Cuxhoben Samtgemeen: Loomst Gemeen: Stinst
Inwahners:	186 (2009-12-3131. Dezember 2009)
Postleettall:	21772
Vörwahl:	04756
Geograafsche Laag:	53° 38′ N, 8° 58′ O
Laag von Maurismaur in de Gemeen Stinst (Koort lett sik anklicken)

Geografie

Maurismaur liggt in’t Rebeed von’t Lange Moor.

De Naveröörd sünd Stinst in’n Noorden, Mittelsnohn in’n Noordoosten, Loomst in’n Oosten, Hoorn, Armsdörp un Langenmoor in’n Süüdoosten, Meckelst in’n Süüdwesten, Ankloh in’n Westen un Neebachenbrook un Ooldbachenbrook in’n Noordwesten.

Historie

Maurismaur is an’t Enn von dat 18. Johrhunnert as Moorkolonie grünnt worrn. Dat is aver as Kolonie nich systemaatsch anleggt worrn. Dat weren enkelte Personen, de op private Initiativ sik dor ansiedelt hebbt. De Oort hett nich de för Moorkolonien typische Form von en Stratendörp. Maurismaur liggt op en lüttje Geestinsel in’t Moor.

Üm dat Johr 1900 is en Buckwindmöhl in Maurismaur boot worrn, de bet 1938 in Bedriev weer. 1922 is de Oort an dat Stroomnett anslaten worrn. An dat Waternett is de Oort eerst in’n Dezember 1964 anslaten worrn. Eerdgas is 2000 kamen.

In’n Eersten Weltkrieg sünd ölven Soldaten ut Maurismaur fullen oder vermisst un in’n Tweten 23. An’t Enn von’n Tweten Weltkrieg an’n 1. Mai 1945 hebbt de Briten Maurismaur innahmen.

Verwaltungsgeschicht

In de Franzosentied von 1810 bet 1814 hett de Oort to de Mairie Loomst in’n Kanton Bremervöör höört. Dat Rebeed hett in disse Tied 1810 to dat Königriek Westfalen un von 1811 bet 1814 to dat Franzöösche Kaiserriek ünner Napoleon höört.

Vör 1859 weer Maurismaur in de Vaagdie Loomst von dat Amt Bremervöör un denn von 1859 bet 1885 in dat Amt Oosten. 1885 is dat an’n Kreis Neehuus gahn un 1932 an’n Kreis Land Hadeln. 1977 is dat denn Deel von’n Landkreis Cuxhoben worrn.

De Oort is an’n 1. Juli 1972 mit de Gemeenreform in Neddersassen Deel von de ne’e Gemeen Stinst worrn.

Inwahnertall

Johr	Inwahners
1824-00-001824	7 Füürsteden
1848-00-001848	114 Lüüd, 23 Hüüs
1910-12-011. Dezember 1910	218
1925-00-001925	249
1933-00-001933	244
1939-00-001939	250
2009-12-3131. Dezember 2009	186

Religion

Maurismaur is evangeelsch-luthersch präägt un höört to dat Kaspel von de Bartelmees-Kark in Loomst.

För de Kathoolschen is de St.-Ansgar-Kark in Warstood tostännig, de siet 2010 Deel von de Karkengemeen Hillig Geist in Stood is.

Wapen

Dat Wapen von dat Dörp wiest över en Wellenlien en Escher.

Kultur

En Denkmaal för de Fullenen ut Maurismaur ut de twee Weltkrieg’ steiht bi’n Karkhoff.

Verenen

Maurismaur hett en egen freewillige Füürwehr, de 1942 grünnt worrn is un sied Dezember 2012 den Naam Freewillige Füürwehr Maurismaur-Neebachenbrook driggt. De Füürwehr hett 2012 en neet Füürwehrhuus kregen. Dat ole weer 1944/1945 boot worrn un nich mehr op’n Stand von de Technik. De Oort hett ok en Schüttenvereen, de 1920 grünnt worrn is.

De Krieger- un Soldatenkameraadschop Stinst-Maurismaur is 1909 grünnt worrn.

Infrastruktur

Verkehr

Maurismaur liggt an de Landsstraat 116, de in’n Oosten na Mittelsnohn un bi Loomst an de Bundsstraat 495 ranlöppt un in’n Westen na Lintig un över de L 119 na Beers löppt. Lüttjere Straten loopt na Armsdörp in’n Süüdoosten, Bachenbrook in’n Noordwesten (Kreisstraat 33) un na Stinst in’n Noorden.

Scholen

Den eersten Schoolmeester hett de Oort 1837 kregen. Vörher güngen de Kinner in Neebachenbrook na School. De Ünnerricht weer toeerst in dat Gemeenhuus, 1851 hett Maurismaur en egen Schoolhuus kregen. De School is 1968 dichtmaakt worrn un de Kinner sünd sied disse Tied in Stinst un Loomst na School gahn.

Literatur

• Otto Heitmann: Moorausmoor: vom Agrardorf zur modernen Wohngemeinschaft. 1995

Weblenken

Maurismaur. Mehr Biller, Videos oder Audiodateien to’t Thema gifft dat bi Wikimedia Commons.