Mairie Loomst
De Mairie Loomst weer in de Franzosentied (1810 bet 1813) een von de dree Mairien, in de de Kanton Bremervöör indeelt weer. De Seet weer in Loomst. Se harr 3465 Inwahners.[1]
Historie ännern
De Ümgegend von Loomst hett vör de Franzosentied to de Vaagdie Loomst von dat Amt Bremervöör un de Vaagdien Lintig un Kührst von dat Amt Beers in dat Hartogdom Bremen höört, wat in dat Kurförstendom Hannover leeg. Dat Kurförstendom Hannover weer in de Tied von de Koalitschoonskriege siet 1801 von Franzosen un Prüßen besett. To’n 1. März 1810 is dat Rebeed denn Deel von dat Königriek Westfalen worrn, wat en Satellitenstaat von Frankriek weer.
Binnen Westfalen weer de Mairie Loomst een von de acht Mairien in’n Kanton Bremervöör von’n Distrikt Bremervöör, Departement von de Elv- un Wersermünnen.[2] Man al to’n 1. Januar 1811 harr dat wedder en Enn. Dat Königriek Westfalen müss dat Departement direkt an dat Franzöösche Kaiserriek afgeven. De Mairie Loomst weer nu een von de dree Mairien in’n Kanton Bremervöör, Distrikt Stood, Departement von de Elvmünnen. De Mairie weer nu düüdlich grötter, dor sünd Öörd in tohoopfaat worrn, de vörher in Westfalen to fiev Mairien höört harrn: de Mairien Loomst, Armsdörp, Mittelsnohn un Warstood ut’n Kanton Bremervöör un de Mairie Lintig ut’n Kanton Beers. Von de Mairie Warstood sünd blots de lütten Dörper, aver nich Warstood sülvs in de Mairie Loomst wesselt. Warstood güng an de Mairie Heckthusen. Von de Mairie Lintig is de gröttere Deel an de Mairie Loomst gahn. De Rest keem an de Mairie Ringst.
1813/1814 hebbt de Russen de Franzosen slahn un dat Rebeed befreet. Dat Kurförstendom Hannover is denn wedder herstellt worrn un de ole Stand von vör 1810 wedder dor. Mit’n Wiener Kungress is 1815 ut dat Kurförstendom dat Königriek Hannover worrn.
Öörd ännern
Dor hebbt düsse Öörd tohöört:
- Königriek Westfalen:[2]
- Kaiserriek Frankriek:[1]
- Loomst, Hockmöhlen, Rahden, Nindörp, Lüttmöhlen (tohoop 1254 Inwahners)
- Armsdörp, Abbenseet, Langeln, Doornsood, Westerbeek, Alfs[Notiz 1] (622 Inwahners)
- Mittelsnohn, Nordahn, Stinst, Maurismaur, Varrel (734 Inwahners)
- Lintig, Kanaalhütt (233 Inwahners)
- Ankloh (99 Inwahners)
- Meckelst (111 Inwahners)
- Schuppenfeld, Heeßel, Wedelsforth, Wohlenbeek, Wohlenbekermoor (412 Inwahners)
Vondaag sünd düsse Öörd Deel von de Samtgemenen Loomst, Hemmoor un Geestborn un de Städer Bremervöör un Geestland.
Footnoten ännern
- ↑ a b Albrecht Friedrich Ludolph Lasius: Der französische Kayser-Staat unter der Regierung des Kaysers Napoleon des Großen, im Jahre 1812, Band 1. Kißling 1813, Sied 63
- ↑ a b Bulletin des lois du Royaume de Westphalie. Königliche Bookdruckeree, Kassel 1810, Sied 6
Notizen ännern
- ↑ De Oort Alfs warrt in dat Book Der französische Kayser-Staat unter der Regierung des Kaysers Napoleon des Großen, im Jahre 1812 dubbelt optellt: eenmaal bi de Mairie Loomst un eenmaal bi de Mairie Bremervöör. Wohrschienlich is dat en Fehler.