De Pioneer-Plaketten sünd twee golden Platten, de an de beiden Ruumsonden Pioneer 10 und Pioneer 11 fastmaakt un mit jüm in den Weltruum schoten weern.

Dat Bild zeigt, wat op de Pioneer-Plakette op wör.

De Platten sünd ut Aluminium un denn mit Gold övertogen worrn. Se hebbt een Grött von 229 mm x 152 mm un sünd 1,27 mm dick. Maakt worrn sünd se för den Fall, dat villich in't Weltall irgendwo noch anneret intelligent Leven to finnen is. Disse Levformen künnen dör de Platten von de Minschen to Weten kriegen und villich ok jümmer Herkommen in’n Weltruum rutfinnen – ok wenn dat unwohrschienlich wörr.

Sünners opfällig weer en Bild von en Mann un en Fru. Doröver weer to de Tiet en scharp Diskuschoon of man de nackigten Afbiller överhaupt so dorstellen dröff oder nich, as man jo de Geslechtsdeelen open sehn kunn. Ok de oprekte Hand von den Mann weer ümstreeden; Eenigen Wetenschopplers dücht, dat künn woll verkehrt as aggressiv düüd warrn.

In den Achtergrund sütt man de Silhouette von de Pioneer-Sonden. Links dorneven is de Oord von de Eer in'n Vegliek to 14 Pulsaren un to den Middelpunkt von de Melkstraat verschlötelt. Ünnen steiht ok een Bild von uns Sünnsystem mit de 8 Planeten un den Dwargplanet Pluto – de to de Tiet jo noch as „richtigen“ Planet tellt hett – mit den planten Weg, den de Ruumsonden nehmen schullen. Baven links befinnt sik toletzt noch en Afbild von en Hyperfeinstrukturövergang bi dat Waterstoffatom.

De Voyager 1 un 2, de een paar Johr later losschickt weern, harrn mit de Sounds of Earth-Schallplatten (engelsch: Kläng von de Eer ähnliche Narichten dorbi.