The Man with the Golden Gun (Film)
The Man with the Golden Gun (op plattdüütsch so veel as: „De Kerl mit de goldene Pistool“; dt. Titel: Der Mann mit dem goldenen Colt) is de Titel vun den negten James-Bond-Film ut de Produkschoon vun Eon Productions Ltd. De Film weer 1974 publiezeert un baseert op den gliek nöömten Roman vun Ian Fleming. In Düütschland is de Film an’n 20. Dezember 1974 anlopen. In dissen Film is Roger Moore to’n tweeten mol in de Titelrull to sehn.
| Filmdaten | |
|---|---|
| Plattdüütsch Titel: | — |
| Originaltitel: | The Man with the Golden Gun |
| Düütsch Titel: | Der Mann mit dem goldenen Colt |
| Produkschoonsland: | Grootbritannien |
| Johr vun’t Rutkamen: | 1974 |
| Läng: | 125 Minuten |
| Originalspraak: | Engelsch |
| Öllersfreegaav in Düütschland: | FSK 16 |
| Filmkru | |
| Speelbaas: | Guy Hamilton |
| Dreihbook: | Richard Maibaum Tom Mankiewicz |
| Produkschoon: | Albert R. Broccoli Harry Saltzman |
| Musik: | John Barry Lulu (Titelleed) |
| Kamera: | Ted Moore Oswald Morris |
| Snitt: | Raymond Poulton John Shirley |
| Szenenbild: | Peter Murton |
| Kledaasch: | Elsa Fennell |
| Dorstellers | |
| |
Inholt
ännernBond is dormit befaat en verswunnenen Wetenschopler to söken, de mit Solarenergie experimenteert un den so nöömten Solex-Generater utklamüstert hett. Man, jüst hett he den Opdrag kregen, dröpt bi’n Geheemdeenst en goldene Pistolenkugel in, dat Markenteken vun den Opdragsmöörder Scaramanga. In de Kugel is butendem „007“ ingraveert. De MI6 glöövt nu, dat Scaramanga den Opdrag kregen hett, Bond ut’n Weg to rümen. De maakt sik dorophen op de Söök na Scaramanga. En Spoor föhrt em toeerst na Macao un denn wieter na Hong Kong, woneem he unfreewillig Tüüg warrt, as de vermisste Wetenschoppler Gibson vun Scaramanga dootschoten warrt. Sien lüttwossen Macker Nick Nack (in de düütschen Faten Schnick Schnack) klaut den Doden den Solex-Generater ut de Tasch, vördem de Polizei indrapen deit.
Bond glöövt nu, dat Scaramanga egentlich op den Solex-Generater ansett weer un de Kugel blots schickt worrn is, üm dat MI6 un em sülvst aftolenken. Also kriggt he den Opdrag, den Generater torüch to holen. Tosamen mit de Geheemdeenst-Mitarbeiters Hip un Mary Goodnight finnt he in Bangkok rut, dat de Industrielle Hai Fat dorachter steken deit. He versöcht sik sülvst as Scaramanga uttogeven, üm Kuntakt to Hai Fat to kriegen. Man de Versöök geiht dorneven, aver he överleevt de Fall, de se em stellt hebbt. Hai Fat kriggt dorophen Panik un will weglopen, warrt vun Scaramanga aver dootschoten. De övernimmt glieks sien Firma un warrt dormit ok gliek Besitter vun de Solex-Technologie.
Unvermodens dröpt Bond Scaramanga sien Leefste, Andrea Anders, wedder, de em vörher al holpen hett, Scaramanga to finnen. Se gifft to, dat se de goldene Kugel an’t MI6 schickt hett. Dormit wull se Bond dorto bringen, Scaramanga an de Siet to maken. Bond seggt to ehr to schulen, will dorför aver vun ehr den Solex-Generater hebben. Ofschoonst Andrea vun Scaramanga ümbröcht warrt, geiht de Övergaav toeerst mit Spood vör sik. Denn aver kummt Scaramanga em op de Spoor. He roovt Bond sien tappsche Hülpersche Goodnight mitsams den Solex-Generater. Bond kann Scaramanga mit en lütten Waterfleger op sien privat Eiland folgen, vun wo ut he de ne’e Solartechnik mitsams en ne’e Superwapen in Form vun en Laser verköpen will. As so en Oort Hobby vun em foddert Scaramanga Bond to en Pistolen-Duell op un lockt em in en Irrgoorn ut Spegels. Dör en optischen Trick kann Bond opletzt Scaramanga in en Fall locken un schütt em doot. He kann den Solex-Generater finnt he, kort vördem de Fabrikanlagen op dat Eiland dör en Explosion tonichten maakt warrt. Goodnight un Bond künnt utneihn, warrt opletzt aver noch vun Nick Nack angrepen, de sik op jemehr Schipp insleken harr. Bond winnt den Tweekamp mit em un bringt de Misschoon so to en spoodriek Enn.
Kritik
ännernDat Lexikon vun’n internatschonalen Film schreev vun en opwännig Agentenspektakel, dat to wenig originelle Akschoon un Spannung harr.[1]
Utteken
ännern
De Film ist 1977 mit de Goldenen Lienwand uttekent worrn.
Achtergrund
ännernDisse Bond-Film weer de letzte, den dat Produzenten-Duo Saltzman & Broccoli tosamen maakt hett. Se sünd dorna ut’nanner gahn, wat to’n een an persönliche Differenzen över dat Utgestalten vun de Bond-Filmen leeg un to’n annern för de finanzelle Laag vun Saltzman. De hett sien Andeel an Danjaq S.A. (later in Danjaq LLC. ümnöömt) un dat Dochterünnernehmen Eon Productions Ltd. an United Artists verköfft.
In The Man with the Golden Gun speelt Maus Adams en Hööftrull. Se hett later in Octopussy noch mol wedder en Hööftrull speelt un is de eenzige Fro, de disse Ehr harr. Butendem harr se ok en Gastoptritt in A View to a Kill, weer dor aver nich in’n Afspann opföhrt.
In den Film schütt Bond ok to’n eersten mol sien Hööftgegner doot. Dat passeert blots noch in twee annere Filmen, neemlich The Spy Who Loved Me un The World Is Not Enough.
Dreiht worrn is de Film in en Reeg vun Länner[2]: De Studio-Opnahmen weern wedder in de Pinewood Studios in Grootbritannien dreiht, dorto kemen eenige Öörd in Hong Kong, dat dormols ok noch to Grootbritannien höört hett. En wieteren Oort in de hüütigen Volksrepubliek China weer Macao, dat dormols noch to Portugal höört hett. Butendem weer ok an en poor Steden in Thailand dreiht.
Literatur
ännern- Ian Fleming: Der Mann mit dem goldenen Colt. Roman (Originaltitel: The Man with the Golden Gun). Deutsch von Willy Thaler. Scherz, Bern, München un Wien 1999, 154 S., ISBN 3-502-79225-9
- Danny Morgenstern, Manfred Hobsch: James Bond XXL. Schwarzkopf & Schwarzkopf, ISBN 3-89602-545-7
Borns
ännern- ↑ Filmrkitk in’t Lexikon vun’n internatschonalen Film
- ↑ Siegfried Tescher: Der große James Bond-Atlas. Wissen Media Verlag, Gütersloh/München 2008, ISBN 978-3-577-07305-9
Weblenken
ännern- The Man with the Golden Gun in de Internet Movie Database (engelsch)
- Kritiken to’n Film op Rotten Tomatoes
- offizielle Websteed vun MGM
Filmreeg vun Eon
1962: Dr. No |
1963: From Russia with Love |
1964: Goldfinger |
1965: Thunderball |
1967: You Only Live Twice |
1969: On Her Majesty’s Secret Service |
1971: Diamonds Are Forever |
1973: Live and Let Die |
1974: The Man with the Golden Gun |
1977: The Spy Who Loved Me |
1979: Moonraker |
1981: For Your Eyes Only |
1983: Octopussy |
1985: A View to a Kill |
1987: The Living Daylights |
1989: Licence to Kill |
1995: GoldenEye |
1997: Tomorrow Never Dies |
1999: The World Is Not Enough |
2002: Die Another Day |
2006: Casino Royale |
2008: Quantum of Solace |
2012: Skyfall |
2015: Spectre
Annere
1954: Casino Royale (Feernsehfilm) |
1967: Casino Royale |
1983: Never Say Never Again