Octopussy

Octopussy is de Titel vun en britischen Actionfilm ut de James-Bond-Reeg vun Eon Productions Ltd. ut dat Johr 1983. In disse Reeg is dat de dörteihnste Film, de ünner de Regie vun John Glen dreiht worrn is. In de bundsdüütschen Kinos lööp de Film an’n 5. August 1983 an.

Filmdaten
Plattdüütsch Titel:	—
Originaltitel:	Octopussy
Düütsch Titel:	Octopussy
Produkschoonsland:	Grootbritannien
Johr vun’t Rutkamen:	1983
Läng:	131 Minuten
Originalspraak:	Engelsch
Öllersfreegaav in Düütschland:	FSK 12
Filmkru
Speelbaas:	John Glen
Dreihbook:	George MacDonald Fraser Richard Maibaum Michael G. Wilson
Produkschoon:	Albert R. Broccoli Michael G. Wilson Tom Pevsner
Musik:	John Barry Rita Coolidge (Titelleed)
Kamera:	Alan Hume
Snitt:	Peter Davies Henry Richardson
Szenenbild:	John Fenner
Kledaasch:	Emma Porteous
Dorstellers
Roger Moore: James Bond Maud Adams: Octopussy Louis Jourdan: Kamal Khan Kristina Wayborn: Magda Kabir Bedi: Gobinda Steven Berkoff: General Orlov David & Tony Meyer: Tweeschen Desmond Llewelyn: Q Robert Brown: M Lois Maxwell: Miss Moneypenny Michaela Clavell: Penelope Smallbone Walter Gotell: General Gogol Vijay Amritraj: Vijay Albert Moses: Sadruddin Geoffrey Keen: Sir Frederick Gray Douglas Wilmer: Jim Fanning Andy Bradford: 009

Inholt

To de Tiet vun’t Wettrüsten (SS-20-Statschoneren, NATO-Dubbelbesluss) versöcht de britische Agent 009 as Clown verkleedt vun Oost-Berlin över de Sektergrenz na West-Berlin to kamen. He warrt vun twee as Artisten verkleedte Möörders verfolgt un vun en Worpmess drapen. Mit letzte Kraft sleept he sik bit na de britischen Bottschop, woneem he den Bottschoper en Fabergé-Ei gifft, vördem he doodblifft.

Dat Ei warrt in’t MI6 as namaakt kennt. Bond warrt dorüm mit en Kunstfackmann na Sotheby’s schickt, woneem dat Original veraukschoneert warrn schall. Bond kann dor dat Original gegen dat namaakte Ei uttuuschen un gifft ok sülvst en Bott af, üm to kieken, wokeen dat Ei hebben will. Dat is de afghaansche Prinz Kamal Khan, de in Indien in’t Exil leevt. He is för Kunsthannel un Hehleree bekannt. Bond warrt op em ansett un folgt em na Udaipur. Dor versöcht he glieks Kamal Khan mit dat Ei in Raasch to bringen, de em op gau sien Lüüd op’n Hals schickt.

Bond warrt fangen un in Khan sien Palast bröcht – dat weer ok de Plaan vun Bond. Dor kriggt he mit, dat Khan en Vedrag mit de russ’schen General Orlov ingeiht, de as politischen Hardliner en militäärschen Präventivslag gegen Europa föhren will. De beiden snackt af, sik in Karl-Marx-Stadt in de DDR to drapen. Wieter warrt Bond gewohr, dat dat noch en drüdde Verbünnte gifft, neemlich Octopussy. De stellt sik as Dochter vun en britischen Agenten rut, op den Bond inst ansett weer. Octopussy leevt op en Eiland un hett en Reeg vun Fronslüüd üm sik sammelt, de ehr schuult. Bito bedrifft se en Wannerzirkus, mit den se ok internatschonal op Tour geiht. Togliek is de Zirkus en Vörwand för de Smuggelee, de se mit Kamal Khan tosamen afwickelt. Disse Tour schall dat russ’sche Zarengold smuggelt warrn, dat Orlov klaut un dör Kopien uttuuschen laten hett (dorher ok dat Fabergé-Ei). Octopussy sleiht sik op Bond sien Siet, vunwegen dat he ehrn Vadder dormols de Mööglichkeit geven hett, sien Geischt to wohren. As Kamal Khan sien Möörders schicken deit, blifft Bond to’n Schien doot un duukt ünner.

Över Berlin reist Bond na Karl-Marx-Stadt, woneem de Octopussy-Zirkus en Gastspeel gifft. Na de letzten Veranstalten schall de Tog mit den Zirkus wieter na den US-Air-Force-Stüttpunkt in’t westdüütsche Feldstadt fohren. Bond kriggt nu aver den Plaan vun Orlov un Khan mit: Se tuuscht den Schatt ut gegen en Atombomb mit en Tiettünnerer, ahn dat Octopussy dorvun wat spitz kriggt. De Bomb schall op den Stüttpunkt exploderen, dat dat utsütt as weer dat en Unfall. Dordör schall de Druck to’n Afrüsten dör de Fredensbewegen in Westdüütschland grötter maakt warrn. Bond slickt sik in den Tog, warrt aver dör de beiden Artisten-Tweeschen opdeckt un ut’n Tog smeten. Bond maakt sik op egen Fuust op’n Weg na Feldstadt, vunwegen dat de Tiettünnerer vun de Atombomb al in Gang is. Ünner gröttste Möh kann he den Tünnerer kort vör’t Enn vun’n Countdown afstellen.

Kamal is in de Twüschentiet torüch na Indien un maakt sik praat to’n Ünnerduken. Bond neiht em achteran un verfolgt em bit in sien Privatfleger, in den ok Octopussy fangen sitt, nadem se bi’t Störmen vun Kamal sien Palast fangen nahmen weer. An Boord kummt dat to’n Showdown twüschen em un Kamal sien Liefwächter Gobinda. Tosamen mit Octopussy kann Bond rechttietig ut’n Fleger afspringen as se to’n Lannen ansett. Kamal dorgegen kummt nich mehr rut as de Fleger in en Afgrund neiht.

Kritik

• Hans-Christoph Blumenberg schreev in Die Zeit, dat Moore sien James Bond, en laschen Leevmann, in’t Duerfüerwark vun de Sensatschonen vullstännig ünnergahn de.
• Raymond Benson hett den Film een Johr na sien Rutkamen in sien Standardwark The James Bond Bedside Companion eher en Bond-Actionkummedie as en Bond-Thriller. He faat tosamen, dat de Film ünnerholen de un spaßig weer, man opletzt Middelmaat.
• James Berardinelli beteken Octopussy in’t Johr 1996 as een vun de beiden appeldwatschsten Bond-Filmen. De Inholt weer so ümständlich un verschachelt, dat he nich veel Sinn geev. Ut sien Sicht weern dat de Stunts un Verfolgensjagden, de den Film vör’n Müllammel bewohren deen.

Utteken

Octopussy weer alltohopen fiefmol för Filmpriesen vörslahn, dorünner ok tweemol för den Saturn-Pries. Uttekent weer de Film mit twee Priesen:

• 1984: mit den Golden Reel Award in de Kategorie Best Toonsnitt/Tooneffekten
• 1984: mit de Golden Lienwand

Produkschoon

Dreihbook

Dat oorsprüngliche Dreihbook is vun’n Produzent Albert R. Broccoli, den Speelbaas John Glen un vun George MacDonald Fraser schreven worrn. Later is dat dör en nee uttuuscht worrn, dat Richard Maibaum tosamen mit Michael G. Wilson verfaat hett. Fraser is liekers as een vun de Schrievers nöömt worrn.

Vun’n Inholt her hett de Film nich veel mit Ian Fleming sien Kortgeschicht to doon, de den glieken Naam hett un in de Geschicht de Ökelnaam vun de Figur is, de Maud Adams in den Film dorstellt. En Deel vun de Kortgeschicht warrt in’n Film navertellt in en Snack twüschen Bond un Octopussy.

Besetten

De Rull vun James Bond schüll in Octopussy egentlich vun James Brolin övernahmen warrn. As Moore denn doch noch kort vörher toseggt hett, hebbt de Produzenten em vörtogen, vunwegen dat he as Star mehr Lüüd antehn schüll. Brolin harr to Proov al en poor Szenen dreiht, de as Bigaav op de DVD to sehn is.

As Octopussy weern eerst Faye Dunaway, Persis Khambatta oder Sybil Danning vörsehn, vördem de Rull denn an Maud adams gahn is. för ehr is dat na de Rull in The Man with the Golden Gun al de tweete Bond-Film wesen, in den se mitspeel.

Robert Brown, de al in The Spy Who Loved Me to sehn weer, hett in Octopussy to’n eersten mol de Rull vun M övernahmen, nadem Bernard Lee doodbleven weer. Tosamen mit Roger Moore hett he Enn vun de 1950er Johren al in de Feernsehreeg Ivanhoe vör de Kamera stahn.

Penelope Smallbone, de as Helpersche vun Miss Moneypenny in’n Film vörstellt warrt, weer vun Michaela Clavell speelt, de Dochter vun den Roamnschriever James Clavell. Tracy Llewelyn, de Dochter vun Desmond Llewelyn, weer as een vun de Dansersches to sehn. Butendem is de ProduzentMichael G. Wilson in twee Cameo-Optreden to sehn: eenmol as Mitfohrer op dat indische Urlauberboot, dat annere mol as russ’sch General bi de sowjetschen Sekerheitskunferenz.

Dreiharbeiten

De Film weer vun’n 10. August 1982 bit to’n 25. Januar 1983 dreiht. De eersten veer Daag weer in Berlin dreiht, woneem ünner annern an’n Checkpoint Charlie un an de Berliner Muer arbeit weer. De Verfolgen mit den Alfa Romeo is op de AVUS opnahmen worrn. Dreiht weer butendem in Grootbritannien, in de USA un in Indien.

Filmmusik

De Musik to’n Film hett ditmol wedder John Barry komponeert, nadem he bi den vörigen nich bedeeligt weer. Vun em weer ok de Musik to dat Titelleed All Time High. De Text dorto keem vun Tim Rice. Dat heet, dat de Produzenten de Vörgaav maakt harrn, dat dat Leed nich Octopussy heten dröff. Barry wull as Singersche toeerst Elaine Paige, mit de he al faken tosamenarbeit harr. Vördem opletzt Rita Coolidge utwählt worrn is, weer ok Shirley Bassey in de Utwahl kamen.

Premiere

De eerste Opföhren vun den Film weer an’n 6. Juni 1983 in’n Odeon Leicester Square in London in’t Biwesen vun Prinz Charles un Prinzessin Diana. De Kinostart in de USA weer an’n 10. Juni 1983. In Düütschland keem Octopussy an’n 5. August 1983 in den Kinos.

Literatur

• Danny Morgenstern, Manfred Hobsch: James Bond XXL. Schwarzkopf & Schwarzkopf, Berlin 2006, ISBN 3-89602-545-7.

Weblenken

• Octopussy in de Internet Movie Database (engelsch)
• offizielle Octopussy-Websteed vun MGM
• Kritik to Octopussy op Rotten Tomatoes

James-Bond-Filmreeg

Filmreeg vun Eon
1962: Dr. No | 1963: From Russia with Love | 1964: Goldfinger | 1965: Thunderball | 1967: You Only Live Twice | 1969: On Her Majesty’s Secret Service | 1971: Diamonds Are Forever | 1973: Live and Let Die | 1974: The Man with the Golden Gun | 1977: The Spy Who Loved Me | 1979: Moonraker | 1981: For Your Eyes Only | 1983: Octopussy | 1985: A View to a Kill | 1987: The Living Daylights | 1989: Licence to Kill | 1995: GoldenEye | 1997: Tomorrow Never Dies | 1999: The World Is Not Enough | 2002: Die Another Day | 2006: Casino Royale | 2008: Quantum of Solace | 2012: Skyfall | 2015: Spectre

Annere
1954: Casino Royale (Feernsehfilm) | 1967: Casino Royale | 1983: Never Say Never Again