Wikipedia

From Russia with Love (Film)

From Russia with Love (op Platt so veel as „Ut Russland mit Leev“; dt. Titel: Liebesgrüße aus Moskau) is de tweete Film ut de James-Bond-Reeg. Dat is en Verfilmen vun den Roman From Russia with Love vun Ian Fleming, de 1963 – söss Johr na de Publikatschoon vun’n Roman – in de Kinos kamen is. Vun de Kritikers warrt de as een vun de besten James-Bond-Filmen ansehn, as ok vun’n Hööftdorsteller Sean Connery sülvst. Dat Titelleed heet ok From Russia With Love un weer vun Matt Monro sungen. Dat is blots an’t Enn vun’n Film to hören, wiel bi’n Vörspann en instrumentale Version bruukt worrn is. De Filmmusik kummt ditmol kumplett vun John Barry, de in’n Vörlöper, Dr. No, de Instrumenteren maakt harr. Dorünner is ok to’n eersten mol en musikaalsch Action-Thema, dat de Beteken „007“ driggt, dat bit to’n James-Bond-Film Moonraker in Variatschonen to de Filmmusik höört hett.

Filmdaten
Plattdüütsch Titel: —
Originaltitel: From Russia with Love
Düütsch Titel: Liebesgrüße aus Moskau
Produkschoonsland: USA
Grootbritannien
Johr vun’t Rutkamen: 1962
Läng: 110 Minuten
Originalspraak: Engelsch
Russ’sch
Törksch
Öllersfreegaav in Düütschland: FSK 16
Filmkru
Speelbaas: Terence Young
Dreihbook: Richard Maibaum
Produkschoon: Albert R. Broccoli
Harry Saltzman
Musik: John Barry
Matt Monro (Titelleed)
Kamera: Ted Moore
Snitt: Peter R. Hunt
Szenenbild: Syd Cain
Kledaasch: Jocelyn Rickards
Dorstellers

Inholt

ännern

In den Film geiht dat üm en Plaan vun de Verbrekerorganisatschoon S.P.E.C.T.R.E. (Special Executive for Counter Intelligence, Terrorism, Revenge, Extortion, in de düütschen Faten „Phantom“ nöömt), üm den Dood vun jemehr Liddmaat Dr. No torüch to betahlen. As Lockmiddel stellt se den britischen Geheemdeenst en Entslötelmaschien mit de Beteken Lector in Utsicht. Liekers dat sik all Bedeeligten vun’n Geheemndeenst seker sünd, dat dat en Fall wesen mutt, kriggt James Bond den Opdrag na Istanbul to reisen un de Maschien in sien Besitt to bringen. Bi den Opdrag mutt he sik jümmers wedder mit Moordanslääg uteneensetten. In Istanbul töövt de smucke Entslötel-Spezialistin Tatiana Romanova op em, de bi't russ’sche Konsulat arbeit un em de Lector övergeven schall. Se smitt sik Bond glieks an’n Hals un will mit em en Romanze anfangen. Bond warrt glieks kloor, dat de Machien blots en Vörwand is, üm em in en döödliche Fall to locken.

Bond kann de Lector aver an sik bringen un ritt mit Tatiana tosamen ut. Mit den Orient-Express fohrt se midden dör Jugoslawien, woneem en Söhn vun Ali Kerim Bey, den Baas vun’n Geheemdeenst in Instanbul, jem opnehmen un wieterbringen schall. In den Tog befinnt sik aver to gliek ok en Agent vun de Russen as ok de Agent 'Red' Grant vun S.P.E.C.T.R.E. Den Agenten künnt Kerim Bey un Bond fast setten, man vun Grant weet se nix af. Bond finnt in een Afdeel den russ’schen Agenten as ok Kerim Bey op, de beid vun Grant ümbröcht worrn sünd. Dorna warrt 007 sülvst vun em in en Fall lockt, ut de sik Bond blots mit Help vun de Gadgets vun Major Boothroyd („Q“) wedder freemaken kann. Dorbi kummt dat in’t Afdeel to’n Kamp mit Grant, bi den de S.P.E.C.T.R.E.-Agent doodblifft. Bond kann mit Tatiana vun’n Tog afspringen un versöcht sik wieter dörtoslahn. Se warrt aver vun en Heevschruver mit wietere Lüüd vun S.P.E.C.T.R.E. angrepen. Opletzt kamt se mit’n Boot na Venedig, man vörher warrt se noch mol wedder vun Verfolgers mit Bööd in de Mangel nahmen. Bond kann aver all Gefohren dör sien velen Insichten, dör List un Geschick överstahn. Dorüm lett Blofeld, de Baas vun S.P.E.C.T.R.E., sien Lüüd Kronsteed, den böversten Strategen vun de Organisatschoon, un Rosa Klebb, de den Plaan ümsetten schüll, to sik ropen. As sik beide gegensietig de Schuld toschuuvt, dat de Plaan Bond an de Siet to maken nich henhaut hett, lett Blofeld Kronsteed henrichten.

Klebb kriggt en tweete Chance, sik to bewiesen un Bond nu ut’n Weg to rümen. Se slikt sik as Putzfro in de Hotelkamer vun Tatiana un Bond, woneem se mit Tatiana un de Lector utneihn will. Toeerst kennt Bond er nich, man denn fallt in, dat se Klebb is, de vun’n KGB weglopen is. An’n Schoh hett se en Spitz mit Gift, mit de se versöcht Bond dood to maken. Tatiana weet nich, dat Klebb nich mehr för den KGB arbeiten deit. Klebb gifft ehr Order, ehr to helpen, man in de Twüschentiet hangt se so dull an Bond, dat se den nich nakummt. Se schütt Klebb doot un rett Bond dormit dat Leven.

Anners wat

ännern
  • In dissen Film warrt de rull vun Q to’n eersten mol vun Desmond Llewelyn speelt, de in disse Rull beropen worrn is. De lütten Kappeleen twüschen Q und 007, de in de Filmen dorna tyypsch worrn sünd, geev dat in Form Russia with Love aver noch nich.
  • To hören weer, dat Ian Fleming , de Schriever vun de James-Bond-Romanen, en korten Optritt in en Szeen an’n Bahnhoff hatt hebben schall. Dat hett sik aver as verkehrt rutstellt.
  • De Rull vun de Tatiana Romanova is nasynschroniseert[1] worrn, vun wegen dat de Makers menen, dat dat Engelsch vun de Schauspelersche Daniela Bianchi nich goot noog weer.
  • Daniela Bianchi hett en Autounfall op’n Weg to de Dreiharbeiten blots knapp överleevt. En wieteren Unfall geev dat mit’n Heevschruver bi de Dreiharbeiten, in den ünner annern ok de Speelbaas Terence Young seten hett.
  • De Schauspeler Pedro Armendáriz (Ali Kerim Bey) weer krebskrank un künn blots ünner gresige Wehdaag an de Dreiharbeiten deelnehmen. De Dreihplään sünd egens för em ümstellt worrn. An’n 18. Juni 1963 hett he sik doodschaten un hett de Filmpremiere in London nich mehr beleevt. Dit weer ok de letzte Bond-Premiere, an de Ian Fleming sülvst deelnehmen künn.

Gadgets

ännern

De so nöömten Gadgets (technische Speelereen) sünd in de James-Bond-Film-Reeg to’n fasten Bestanddeel worrn. Man dat füng eert mit dissen Film an. In den eersten Bond-Film, Dr. No, is noch keen Gadget opduukt.

Dat eerste Gadget vun 007 is de Aktenkuffer, den he vun’t Q-Afdeel övergeven warrt. De Kuffer bargt en Scharpschüttengewehr mit Nachtsichtreedschop to’n uteneenboen. In de Grött as dat wiest worrn is, weer dat technisch to de Tiet aver noch nich mööglich. Man de Wapen weer en „AR-7 Survival Rifle“ Kaliber .22 LR vun de Firma ArmaLite, de as Nootfallwapen för de US Air Force herstellt worrn is[2]. Wieter bargt de Kuffer Munitschoon un Goldstücken un en Versluss mit en Tranengaspatroon, de utlööst warrt, wenn de Kuffer nich richtig apenmaakt warrt.

In den Film kummt ok en Pager vör, de eerst lange Johren na den Film eerst utfunnen worrn sünd. In den Film hett Bond so en Reedschop, mit den de Geheemdeenst MI6 to jede Tiet Kuntakt to em opnehmen künnt. Sünners is ok, dat Bond sien Auto (Bentley Mark IV)) al mit en Telefon utrüst weeer.

Kritiken

ännern

Lexikon vun’n internatschonalen Film: Höhepunkt der ironisch servierten Abenteuer ist die Jagd auf den flüchtenden Bond mit Hubschrauber und Schnellbooten.

Utteken

ännern

De Film weer för tosamen söss Filmpriesen nomineert, dorünner ok för den Golden Globe in de Kategorie Best Filmleed. Uttekent worrn is de Film mit veer Priesen:

Dreihöörd

ännern

Literatur

ännern
  • Danny Morgenstern, Manfred Hobsch: James Bond XXL. Schwarzkopf & Schwarzkopf, ISBN 3-89602-545-7

Borns

ännern
  1. ↑ Liebesgrüße aus Moskau Audiokommentar, Ultimate Edition DVD.
  2. ↑ http://www.notpurfect.com/main/AR7.html

Weblenken

ännern
James-Bond-Filmreeg

Filmreeg vun Eon
1962: Dr. No | 1963: From Russia with Love | 1964: Goldfinger | 1965: Thunderball | 1967: You Only Live Twice | 1969: On Her Majesty’s Secret Service | 1971: Diamonds Are Forever | 1973: Live and Let Die | 1974: The Man with the Golden Gun | 1977: The Spy Who Loved Me | 1979: Moonraker | 1981: For Your Eyes Only | 1983: Octopussy | 1985: A View to a Kill | 1987: The Living Daylights | 1989: Licence to Kill | 1995: GoldenEye | 1997: Tomorrow Never Dies | 1999: The World Is Not Enough | 2002: Die Another Day | 2006: Casino Royale | 2008: Quantum of Solace | 2012: Skyfall | 2015: Spectre

Annere
1954: Casino Royale (Feernsehfilm) | 1967: Casino Royale | 1983: Never Say Never Again

 
Vun „https://nds.wikipedia.org/w/index.php?title=From_Russia_with_Love_(Film)&oldid=950323“