Clüversbossel
| Wapen/Flagg | Koort | |
|---|---|---|
 |
| |
| Basisdaten | ||
| Inwahners: | ||
| Postleettall: | 27367 | |
| Vörwahl: | 04264 | |
| Geograafsche Laag: | Koordinaten:53° 8′ N, 9° 14′ O53° 8′ N, 9° 14′ O | |
|
| ||
Clüversbossel (hoochdüütsch Clüversborstel) is en Dörp in de Gemeen Reeßen (Samtgemeen Söttmer) in’n Landkreis Rodenborg, Neddersassen.
Geografie ännern
Clüversbossel liggt op beide Sieden von de Wiest.
De Naveröörd sünd Bittst un Sleßel in’n Noordoosten, Jeerhoff un Hassendörp in’n Süüdoosten, Lütt un Groot Söttmer in’n Süden, Stuckenbossel in’n Süüdwesten, Reeßen in’n Westen un Northauen un Taaken in’n Noordwesten.
Historie ännern
Clüversbossel geiht trügg op de Borg Clüversbossel, de üm 1478 rüm anleggt worrn is, üm de Grenz von dat Arzstift Bremen gegen dat Hoogstift Veern to verdeffenderen. De Grenz weer hier de Wiest. Rund üm de Borg hebbt sik denn Minschen ansiedelt. De Borg sülvs is 1645 in’n Dörtigjohrigen Krieg dalreten worrn. In de Neegd hett de Familie Clüver 1661 denn dat Good Clüversbossel anleggt. An de Wiest hett dat von 1602 af an ok en Watermöhl geven, de aver 1944 dör Blitzslag afbrennt is.
Verwaltungsgeschicht ännern
In de Franzosentied von 1810 bet 1814 hett de Oort to de Mairie Horß in’n Kanton Otterbarg höört. Dat Rebeed hett in disse Tied 1810 to dat Königriek Westfalen un von 1811 bet 1814 to dat Franzöösche Kaiserriek ünner Napoleon höört.
De Oort hett vör 1859 to de Huusvaagdie Otterbarg in dat Amt Otterbarg tohöört un denn von 1859 bet 1885 to dat Amt Rodenborg. Na 1885 weer dat in’n Kreis Rodenborg, de 1977 mit’n Landkreis Bremervöör tohoopgahn is un den hüdigen Landkreis Rodenborg billt hett.
De Oort is an’n 1. März 1974 mit de Gemeenreform in Neddersassen Deel von de Gemeen Reeßen worrn.
Inwahnertall ännern
| Johr | Inwahners |
|---|---|
| 1791[1] | 5 Füürsteden |
| 1812[2] | 55 |
| 1824[3] | 15 Füürsteden |
| 1848[4] | 121 Lüüd, 18 Hüüs |
| 1. Dezember 1871[5] | 120 Lüüd, 23 Hüüs |
| 1. Dezember 1885[6] | 128 Lüüd, 25 Hüüs |
| 1. Dezember 1905[7] | 149 Lüüd, 27 Hüüs |
| 1. Dezember 1910[8] | 167 |
| 1925[9] | 172 |
| 1933[9] | 142 |
| 1939[9] | 143 |
Religion ännern
Clüversbossel is evangeelsch-luthersch präägt un höört to dat Kaspel von de Georg-Kark in Groot Söttmer.
För de Kathoolschen is de Corpus-Christi-Kark in Rodenborg tostännig.
Wapen ännern
Dat Wapen von Clüversbossel is dat ole Wapen von de Familie Clüver. Dat wiest op gollen Grund en swarte Klau von en Boor.
Börgermeesters ännern
| Tied | Naam | Partei |
|---|---|---|
| -1868 | Johann Mahnke | |
| 1868-1885 | Peter Wahlers | |
| 1885-1912 | Diedrich Wahlers | |
| 1912-1914 | Johann Hüsing | |
| 1914-1919 | Hinrich Rathjen | |
| 1919-1946 | Carl Röhrs | |
| 1946-1949 | Johann Bösen | |
| 1949-1956 | Hinrich Intemann | |
| 1956-1968 | Friedrich Röhrs | |
| 1968-1972 | Johann-Friedrich Wahlers | |
| 1972–1974 | Hermann Michaelis |
Kultur ännern
Dat Dörp hett en egen Dörpgemeenschopshuus.
Weertschop un Infrastruktur ännern
Clüversbossel hett en egene freewillige Füürwehr, de 1949 grünnt worrn is.
Verkehr ännern
Dör Clüversbossel löppt de Kreisstraat 204, de in’n Süden na Söttmer an de Bundsstraat 75 geiht un in’n Noordoosten na Sleßel an de K 202. De B 75 föhrt von Söttmer in’n Westen na Otterbarg un in’n Oosten na Rodenborg. En lüttjere Straat gifft dat ans noch von Clüversbossel na Reeßen.
De nächste Autobahn is de Autobahn 1 (Afsnidd Hamborg–Bremen). De Opfohrt 50 Stuckenbossel liggt so veer Kilometer in’n Süüdwesten von Clüversbossel an de B 75.
De nächste Bahnhoff is so bi fiev Kilometer wied weg in’n Süden de Bahnhoff Söttmer an de Bahnlien Hamborg–Bremen.
Scholen ännern
Den eersten Ünnerricht hett dat in Clüversbossel 1797 geven, nadem Amalie von Hassell von dat Good Clüversbossel Geld geven hett, üm en Schoolmeester to betahlen. Dat hett to de Tied noch keen Schoolhuus geven, de Ünnerricht weer in Privathüüs. Von 1850 bet 1867 un von 1874 bet 1878 güngen de Kinner in Reeßen na School, von wegen dat de Schölertall to ring weer för en egen Schoolmeester. 1891 hett de Oort denn en egen Schoolhuus kregen. Düsse School is 1932 von de Regerung in Stood dichtmaakt worrn. 1949 hett de School denn aver wedder apenmaakt. 1956/1957 is en neet Schoolhuus boot worrn. Later hett de School denn aver doch wedder dichtmaakt.
Footnoten ännern
- ↑ Christoph Barthold Scharf: Statistisch-Topographische Samlungen zur genaueren Kentnis aller das Churfürstenthum Braunschweig-Lüneburg ausmachenden Provinzen. Meier, Bremen 1791, Sied 48
- ↑ Albrecht Friedrich Ludolph Lasius: Der französische Kayser-Staat unter der Regierung des Kaysers Napoleon des Großen, im Jahre 1812, Band 1. Kißling, Ossenbrügge 1813, Sied 97
- ↑ Curt Heinrich Conrad Friedrich Jansen: Statistisches Handbuch des Königreichs Hannover. Hannover 1824, Sied 116
- ↑ Friedrich Wilhelm Harseim, Carl Schlüter: Statistisches Handbuch für das Königreich Hannover. Schlütersche Hoffbookdruckeree, Hannover 1848, Sied 138
- ↑ Die Gemeinden und Gutsbezirke des Preussischen Staates und ihre Bevölkerung. Berlin 1873, Sied 166
- ↑ Gemeindelexikon für das Königreich Preußen. Auf Grund der Materialien der Volkszählung vom 1. Dezember 1885. Verlag des Königlichen statistischen Bureaus, Berlin 1888, Sied 179
- ↑ Gemeindelexikon für das Königreich Preußen. Auf Grund der Materialien der Volkszählung vom 1. Dezember 1905. Verlag des Königlichen statistischen Landesamtes, Berlin 1908, Sied 150
- ↑ Inwahnertallen op gemeindeverzeichnis.de
- ↑ a b c Inwahnertallen op verwaltungsgeschichte.de
Weblenken ännern
- Websteed över dat Dörp (hoochdüütsch)